'മലയാള സിനിമയില്‍ ഞാന്‍ കണ്ട ഏറ്റവും മനോഹരമായ പ്രണയം'; പുതിയ സിനിമകളിലെപ്പോലെ നാടകീയതയില്ല, വാഗ്ദാനങ്ങളില്ല: ജിസ് ജോയ്

ത്രില്ലറുകള്‍ മാത്രമല്ല, പ്രേക്ഷകരെ സന്തോഷിപ്പിക്കുകയും ഉള്ളില്‍ ഒരു നനവ് ബാക്കിവെക്കുകയും ചെയ്യുന്ന സിനിമകളും ചെയ്യണമെന്നാണ് ആഗ്രഹമെന്ന് സംവിധായകന്‍ ജിസ് ജോയ്. വീണ്ടും കണ്ടിരിക്കാനും സിനിമ അവസാനിച്ചാലും അതിലെ കഥാപാത്രങ്ങളെയും അവരുടെ ജീവിതത്തെയും കുറിച്ച് ചിന്തിക്കാനും തോന്നുന്ന ചിത്രങ്ങളാണ് അത്തരം സിനിമകളെന്നും അദ്ദേഹം പറയുന്നു. സത്യന്‍ അന്തിക്കാട് സംവിധാനം ചെയ്ത മോഹന്‍ലാല്‍ ചിത്രം ‘വരവേല്‍പ്പാണ് അത്തരത്തില്‍ തന്നെ സ്വാധീനിച്ച ചിത്രമെന്നും ജിസ് ജോയ് പറഞ്ഞു.

ഒരു കാലഘട്ടത്തെയും അന്നത്തെ സാമൂഹിക-രാഷ്ട്രീയ സാഹചര്യങ്ങളെയും ഗള്‍ഫില്‍ നിന്ന് തിരിച്ചെത്തുന്ന ഒരാളുടെ ജീവിതത്തെയും ഇത്ര മനോഹരമായി അടയാളപ്പെടുത്തിയ സിനിമ വേറെയില്ലെന്നും ജിസ് ജോയ് പറയുന്നു. ദി ക്യൂവിന് നല്‍കിയ അഭിമുഖത്തില്‍ സംസാരിക്കുകയായിരുന്നു ജിസ് ജോയ്.

ഗള്‍ഫില്‍ നിന്ന് നാട്ടിലെത്തി ബസ് സര്‍വീസ് ആരംഭിക്കുന്ന മുരളി എന്ന കഥാപാത്രം നേരിടുന്ന പ്രതിസന്ധികളിലൂടെ ഒരു കുടുംബത്തിന്റെയും സമൂഹത്തിന്റെയും കഥയാണ് ‘വരവേല്‍പ്പ്’ പറയുന്നത്. ബിസിനസ് തകര്‍ക്കപ്പെടുന്നതും നാട്ടില്‍ പിടിച്ചുനില്‍ക്കാന്‍ കഴിയാതെ വരുന്നതും ഒടുവില്‍ തിരിച്ചുപോകേണ്ടിവരുന്നതുമെല്ലാം അത്രയും മനോഹരമായാണ് ആ സിനിമയില്‍ അവതരിപ്പിച്ചിരിക്കുന്നതെന്നും ജിസ് ജോയ് പറയുന്നു.

മലയാള സിനിമയില്‍ താന്‍ കണ്ടിട്ടുള്ള ഏറ്റവും മനോഹരമായ പ്രണയങ്ങളിലൊന്നാണ് ‘വരവേല്‍പ്പി’ലേതെന്നും ജിസ് ജോയ് പറയുന്നു. ഇന്നത്തെ സിനിമകളില്‍ പലപ്പോഴും പ്രണയം പ്രകടിപ്പിക്കാന്‍ ഉപയോഗിക്കുന്ന നാടകീയതയോ വലിയ വാഗ്ദാനങ്ങളോ ഈ ചിത്രത്തിലെ ബന്ധത്തിലില്ല. പകരം, ജീവിതത്തിലെ പ്രതിസന്ധികള്‍ക്കിടയില്‍ പരസ്പരം താങ്ങായി നില്‍ക്കുന്ന രണ്ട് മനുഷ്യരെയാണ് സിനിമ കാണിക്കുന്നത്.

‘മലയാള സിനിമയില്‍ ഞാന്‍ കണ്ടിട്ടുള്ള ഏറ്റവും മനോഹരമായ പ്രണയമാണത്. എല്ലാ അര്‍ത്ഥത്തിലും. അതാണ് പ്രാക്ടിക്കല്‍ പ്രണയം. ഗിമ്മിക്കുകളൊന്നുമില്ലല്ലോ. രണ്ടുപേരും രണ്ടുപേരുടെ നിലനില്‍പ്പിനുവേണ്ടി ശ്രമിക്കുന്നു. ഒരാള്‍ കാലൊടിഞ്ഞ് കിടക്കുന്നു. മറ്റേയാള്‍ അയാള്‍ക്ക് മരുന്ന് വാങ്ങിക്കൊടുക്കുന്നു. ബസ് വെട്ടിപ്പൊളിച്ച പ്രശ്‌നത്തില്‍ അയാള്‍ വിഷമിച്ചിരിക്കുമ്പോള്‍ അവള്‍ കഞ്ഞിയുണ്ടാക്കി വരുന്നു, തുണിയലക്കിക്കൊടുക്കുന്നു. എത്ര മനോഹരമായ സിനിമയാണത്,’ ജിസ് ജോയ് പറയുന്നു.

മുരളി നാട്ടില്‍ നേരിട്ട തിരിച്ചടികള്‍ക്കൊടുവില്‍ ഗള്‍ഫിലേക്ക് മടങ്ങുന്ന രംഗമൊക്കെ എത്രമാത്രം നമ്മെ സ്പര്‍ശിച്ചിട്ടുള്ളതാണ്. ജീവിതം മുഴുവന്‍ അധ്വാനിച്ചിട്ടും സ്വന്തം നാട്ടില്‍ ഒന്നും നേടാനാകാതെ മടങ്ങേണ്ടിവരുന്ന ഒരാളുടെ അവസ്ഥയെ ആ രംഗം എത്രത്തോളം ഹൃദയസ്പര്‍ശിയായി അവതരിപ്പിച്ചിട്ടുണ്ട്.

ബസില്‍ കയറി തിരിച്ചുപോകുന്ന മുരളിയെ യാത്രയയക്കാന്‍ രേവതി മാത്രമാണ് അവിടെയുള്ളത്. വലിയ വൈകാരിക പ്രകടനങ്ങളോ നാടകീയതയോ ഇല്ലാതെ ഒരു മനുഷ്യന്റെ നിസ്സഹായാവസ്ഥ പ്രേക്ഷകരിലേക്ക് എത്തിക്കുന്ന സത്യന്‍ അന്തിക്കാടിന്റെ സംവിധാനമികവ് പറയാതിരിക്കാനാവില്ല. സത്യന്‍ അന്തിക്കാടിനെപ്പോലൊരു സംവിധായകന് എങ്ങനെയാണ് ഇത്തരം രംഗങ്ങള്‍ ചിന്തിച്ചെടുക്കാന്‍ കഴിയുന്നതെന്ന് അത്ഭുതപ്പെട്ടുപോകുമെന്നും അദ്ദേഹം പറയുന്നു.

ഒരുപാട് തവണ കണ്ടിട്ടും മതിവരാത്ത ചിത്രമാണ് ‘വരവേല്‍പ്പ്’. മോഹന്‍ലാലിനും രേവതിക്കും പുറമെ മുരളി, തിക്കുറിശി തുടങ്ങിയ അഭിനേതാക്കളുടെ സാന്നിധ്യവും സിനിമയെ കൂടുതല്‍ ഓര്‍മയില്‍ നില്‍ക്കുന്നതാക്കുന്നുണ്ട്. കുടുംബബന്ധങ്ങള്‍ക്കും പ്രണയത്തിനും സാമൂഹിക യാഥാര്‍ഥ്യങ്ങള്‍ക്കും ഒരുപോലെ ഇടം നല്‍കുന്ന ചിത്രത്തിന്റെ മികവ് ഇന്നും ചര്‍ച്ച ചെയ്യപ്പെടുന്നതിന്റെ കാരണവും അതുതന്നെയാണെന്നും ജിസ് ജോയ് പറഞ്ഞു.

Content Highlight: The Most Beautiful Love I’ve Seen in Malayalam Cinema’; No Drama or Promises Like in Today’s Films: Jis Joy