2025ലെ ഏഷ്യാ കപ്പിനുള്ള തയ്യാറെടുപ്പിലാണ് ഇന്ത്യന് ടീം. സൂര്യകുമാര് യാദവിനെ ക്യാപ്റ്റനായും ശുഭ്മന് ഗില്ലിനെയും വൈസ് ക്യാപ്റ്റനായുമാണ് സെലക്ഷന് കമ്മിറ്റി നിയമിച്ചത്.
ടൂര്ണമെന്റില് ഇന്ത്യയും പാകിസ്ഥാനും ഒരേ ഗ്രൂപ്പിലാണ് മത്സരിക്കുന്നത്. എന്നാല് പഹല്ഗാം ഭീകരാക്രമണത്തിന്റെ പശ്ചാത്തലത്തില് ഇന്ത്യയും പാകിസ്ഥാനും തമ്മിലുള്ള മത്സരം ബഹിഷ്കരിക്കണമെന്നാണ് ഒരു വിഭാഗം ആളുകള് ഉന്നയിക്കുന്നത്.
ഇന്ത്യന് ടീം പാകിസ്ഥാനെതിരെ കളിക്കണോ വേണ്ടയോ എന്ന വിഷയത്തെക്കുറിച്ചുള്ള തന്റെ നിലപാട് വ്യക്തമാക്കിയിരിക്കുകയാണ് ഇന്ത്യന് പേസര് മുഹമ്മദ് ഷമി.
‘വിവാദങ്ങളില് നിന്ന് ഞാന് വിട്ടുനില്ക്കാനാണ് ഞാന് ആഗ്രഹിക്കുന്നത്. മത്സരങ്ങളെക്കുറിച്ച് സര്ക്കാരും ബോര്ഡും തീരുമാനിക്കും, ഞങ്ങള് അത് പിന്തുടരും,’ ന്യൂസ് 24 ന് നല്കിയ അഭിമുഖത്തില് ഷമി പറഞ്ഞു.
മറ്റ് ടീമുകളെ അപേക്ഷിച്ച് പാകിസ്ഥാനെതിരെ കളിക്കുന്നത് വ്യത്യസ്തമാണോ, അല്ലെങ്കില് മറ്റേതെങ്കിലും മത്സരം പോലെ ഇതിനെ പരിഗണിക്കുന്നുണ്ടോ എന്ന് ചോദിച്ചപ്പോള്, അത് തീര്ച്ചയായും വ്യത്യസ്തമാണെന്ന് ഷമി പറഞ്ഞു.
‘ആരാധക ആവേശം കാരണം പാകിസ്ഥാനില് കളിക്കുന്നത് വ്യത്യസ്തമാണ്. പക്ഷേ കളിക്കാരെ സംബന്ധിച്ചിടത്തോളം അത് പ്രകടനത്തെക്കുറിച്ചാണ്,’ അദ്ദേഹം പറഞ്ഞു.
പാകിസ്ഥാനെതിരെ കളിക്കുമ്പോള് ഉണ്ടാകാവുന്ന സ്ലെഡ്ജിങ് സംഭവങ്ങളെക്കുറിച്ചും ഷമിയോട് ചോദിച്ചു. തനിക്ക് ഒന്നും നേരിടേണ്ടി വന്നിട്ടില്ലെന്ന് അദ്ദേഹം പറഞ്ഞു.
‘അങ്ങനെയൊന്നുമില്ല. ഒരു ടെസ്റ്റില് ഒരാള് സമയം പാഴാക്കുമ്പോള് ഒരിക്കല് മാത്രമേ ഞാന് അസ്വസ്ഥനായിട്ടുള്ളൂ. അവരുടെ കളി കളിക്കാന് ഞാന് അവരോട് പറഞ്ഞു. അതാണ് എന്റെ ആക്രമണോത്സുകത,’ ഷമി കൂട്ടിച്ചേര്ത്തു.
