പാലക്കാട്: കെ.എസ്.ആര്.ടി.സിയുടെ പ്രിയദര്ശിനി ബസിലെ സ്ത്രീകളുടെ സൗജന്യ യാത്രയുമായി ബന്ധപ്പെട്ട് താന് നടത്തിയ പ്രസംഗം വിവാദമായ പശ്ചാത്തലത്തില് വിശദീകരണവുമായി ഗതാഗതമന്ത്രി സി.പി. ജോണ്.
പ്രസംഗിക്കുമ്പോള് വളരെയധികം ശ്രദ്ധിക്കേണ്ടതുണ്ട് എന്ന വലിയ പാഠമാണ് ഈ വിവാദത്തിലൂടെ താന് പഠിച്ചതെന്ന് അദ്ദേഹം പാലക്കാട് മാധ്യമങ്ങളോട് പറഞ്ഞു.
കേരള ബസ് ട്രാന്സ്പോര്ട്ട് അസോസിയേഷന് സംസ്ഥാന സമ്മേളനത്തില് സംസാരിക്കവെ മന്ത്രി നടത്തിയ ചില പരാമര്ശങ്ങളാണ് വലിയ പ്രതിഷേധങ്ങള്ക്ക് വഴിവെച്ചത്.
പണമില്ലാത്തതിനാല് സ്ത്രീകള് സൗജന്യ ട്രാന്സ്പോര്ട്ട് ബസ്സുകളില് തള്ളിക്കയറുന്നുവെന്നും, എന്നാല് അതേ ആളുകള് തന്നെ വലിയ ഫീസ് നല്കി മക്കളെ സ്വകാര്യ സ്കൂളുകളില് ചേര്ക്കുന്നുവെന്നുമായിരുന്നു മന്ത്രിയുടെ വാക്കുകള്.
ഇതിനുപുറമെ, അസുഖം വന്നാല് പണമില്ലാത്തതിനാല് സ്വകാര്യ ആശുപത്രിയില് പോകാതെ സര്ക്കാര് ആശുപത്രികളുടെ വരാന്തയില് കിടക്കുന്ന ആളുകള്, കുട്ടികളുടെ വിദ്യാഭ്യാസ കാര്യത്തില് കാണിക്കുന്ന പെരുമാറ്റം അതിശയിപ്പിക്കുന്നുവെന്നും അദ്ദേഹം പറഞ്ഞിരുന്നു.
തന്റെ വാക്കുകള് വളച്ചൊടിക്കപ്പെട്ടതാണെന്നും താന് തെറ്റായ പരാമര്ശങ്ങളൊന്നും നടത്തിയിട്ടില്ലെന്നും മന്ത്രി വിശദീകരിച്ചു. വര്ക്കിങ് ക്ലാസ്സിന്റെ ആഗ്രഹങ്ങള് മനസ്സിലാക്കുന്നതില് താനടക്കമുള്ള രാഷ്ട്രീയ നേതൃത്വത്തിന് സംഭവിച്ച വീഴ്ചയെക്കുറിച്ചുള്ള സ്വയം വിമര്ശനമാണ് താന് നടത്തിയത്.
സൗജന്യയാത്ര സ്ത്രീകളുടെ അവകാശമാണെന്നും സര്ക്കാര് അത് നല്കുക തന്നെ ചെയ്യുമെന്നും അദ്ദേഹം പറഞ്ഞു.
സാമ്പത്തിക ബുദ്ധിമുട്ട് മൂലമാണ് ആളുകള് സര്ക്കാര് ആശുപത്രികളെ ആശ്രയിക്കുന്നത്; എന്നാല് തങ്ങളുടെ മക്കള്ക്കെങ്കിലും മെച്ചപ്പെട്ട ജീവിതസാഹചര്യങ്ങള് ഉണ്ടാകണമെന്ന ആഗ്രഹം കൊണ്ടാണ് കഷ്ടപ്പെട്ട് പൈസയുണ്ടാക്കി കുട്ടികളെ സ്വകാര്യ സ്കൂളുകളിലേക്ക് അയക്കുന്നത്. ഇതാണ് താന് ഉദ്ദേശിച്ചതെന്ന് മന്ത്രി വിശദീകരിച്ചു.
പ്രിയദര്ശിനി സൗജന്യയാത്രാ പദ്ധതിയില് നിന്ന് സര്ക്കാര് ഒരിഞ്ച് പോലും പിന്നോട്ട് പോകില്ലെന്നും മന്ത്രി മാധ്യമപ്രവര്ത്തകര്ക്ക് മുമ്പില് പറഞ്ഞു. എല്ലാവരും തന്റെ വാക്കുകളെ സൂക്ഷ്മമായി നിരീക്ഷിക്കുന്ന സാഹചര്യത്തില്, ഇനിമുതല് കൂടുതല് ശ്രദ്ധയോടെയും ജാഗ്രതയോടെയും മാത്രമേ സംസാരിക്കുകയുള്ളൂവെന്നും അദ്ദേഹം കൂട്ടിച്ചേര്ത്തു.
Content Highlight: Minister C.P. John offers explanation regarding the Priyadarshini controversy.
