ആട് സീരിസോ അഞ്ചാം പാതിരയോ അല്ല; ഇതുവരെ സംവിധാനം ചെയ്തതില്‍ ഇഷ്ട ചിത്രം പറഞ്ഞ് മിഥുന്‍ മാനുവല്‍ തോമസ്

മലയാള സിനിമയിലെ യുവ സംവിധായകരില്‍ ശ്രദ്ധേയനാണ് മിഥുന്‍ മാനുവല്‍ തോമസ്. ആട് സീരിസിലൂടേയും അഞ്ചാം പാതിരയിലൂടേയും തന്റേതായൊരു ഇടം മിഥുന്‍ ഇതിനോടകം തന്നെ നേടിയിട്ടുണ്ട്.

ഇപ്പോഴിതാ താന്‍ ഇതുവരെ ചെയ്തതില്‍ ഏറ്റവും ഇഷ്ടപ്പെട്ട സിനിമയെക്കുറിച്ച് പറയുകയാണ് സംവിധായന്‍. അത് പ്രേക്ഷകര്‍ ആഘോഷമാക്കിയ ആട് സീരിസോ അഞ്ചാം പാതിരയോ അല്ലെന്ന സൂചനയാണ് മിഥുന്‍ നല്‍കുന്നത്.

ആന്‍മരിയ കലിപ്പിലാണ് താന്‍ ഇതുവരെ സംവിധാനം ചെയ്തതില്‍ ഏറ്റവും ഇഷ്ടപ്പെട്ട ചിത്രമെന്ന് മിഥുന്‍ മാനുവല്‍ തോമസ് പറഞ്ഞു. ചിത്രം റിലീസ് ചെയ്തതിന്റെ വാര്‍ഷിക ദിനമായ ആഗസ്റ്റ് 5ന് ഇന്‍സ്റ്റഗ്രാമിലൂടെയായിരുന്നു മിഥുന്‍ ഇക്കാര്യം പറഞ്ഞത്.

‘ഇതുവരെ ചെയ്തതിലെ ഏറ്റവും പ്രിയപ്പെട്ട സിനിമയുടെ അഞ്ചാം വാര്‍ഷികം. ആന്‍മരിയ കലിപ്പിലാണ്,’ മിഥുന്‍ കുറിച്ചു.

സണ്ണി വെയിന്‍, സാറ അര്‍ജുന്‍ എന്നിവരാണ് ചിത്രത്തില്‍ മുഖ്യവേഷത്തിലെത്തിയത്. ദുല്‍ഖര്‍ സല്‍മാന്‍ ചിത്രത്തില്‍ അതിഥി വേഷത്തിലെത്തിയിരുന്നു.

ആന്‍ മരിയ എന്ന കുട്ടിയും പൂമ്പാറ്റ ഗിരീഷ് എന്ന ഗുണ്ടയും തമ്മിലുള്ള സൗഹൃദത്തിന്റെ കഥയായിരുന്നു ചിത്രം പറഞ്ഞിരുന്നത്. 2016 ആഗസ്റ്റ് 5 നായിരുന്നു ചിത്രം തീയറ്ററുകളിലെത്തിയത്.

CONTENT HIGHLIGHTS: Midhun Manuel Thomas Talking about my favorite movie ever made