മലയാള സിനിമയിലെ മികച്ച സംവിധായകരില് ഒരാളാണ് ലാല് ജോസ്. സംവിധായകന് കമലിന്റെ അസിസ്റ്റന്റ് ഡയറക്ടറായിട്ടാണ് അദ്ദേഹം തന്റെ സിനിമാ ജീവിതം ആരംഭിച്ചത്. കമലിനൊപ്പം നിരവധി സിനിമകളില് ലാല് ജോസ് പ്രവര്ത്തിച്ചു.
പിന്നീട് 1998ല് പുറത്തിറങ്ങിയ ഒരു മറവത്തൂര് കനവ് എന്ന മമ്മൂട്ടി ചിത്രത്തിലൂടെയാണ് അദ്ദേഹം ആദ്യമായി സംവിധായകനായത്. ശേഷം സിനിമാപ്രേമികള്ക്ക് നിരവധി ഹിറ്റ് സിനിമകള് നല്കാന് ലാല് ജോസിന് സാധിച്ചിരുന്നു.
മൈല്സ്റ്റോണ് മേക്കേഴ്സിന് നല്കിയ അഭിമുഖത്തില് പല പ്രധാന നടന്മാരും അഭിനയിക്കാന് മടിച്ച് നിന്ന ചില സന്ദര്ഭങ്ങള് ഉണ്ടായിട്ടുണ്ടെന്ന് പറയുകയാണ് സംവിധായകന്. അതിന് ഉദാഹരണമായി ലാല് ജോസ് പറയുന്നത് മമ്മൂട്ടിയെ കുറിച്ചും പട്ടാളം സിനിമയെ കുറിച്ചുമാണ്.
‘നമ്മുടെ സിനിമകളില് അഭിനയിച്ച പല പ്രധാന നടന്മാരും അഭിനയിക്കാന് മടിച്ച് നിന്ന ചില സന്ദര്ഭങ്ങള് ഉണ്ടായിട്ടുണ്ട്. ആ സമയത്ത് അവര് കണ്ഫ്യൂസ്ഡാകുന്നതാണ്. ഇതെന്തിനാണ് ഇങ്ങനെ ചെയ്യുന്നതെന്ന് അവര് ചോദിച്ചേക്കാം.
സിനിമയില് ആര്ത്ത് നിലവിളിക്കേണ്ട സമയത്ത് അങ്ങനെ നിലവിളിക്കുക തന്നെ വേണം. അങ്ങനെയല്ലേ മനുഷ്യര് ചെയ്യുക. അതിന് അവരെ കണ്വീന്സ് ചെയ്യുക എന്നതാണ് കാര്യം. മമ്മൂക്കയുടെ കൂടെ സിനിമ ചെയ്യുമ്പോള് അത്തരം അനുഭവങ്ങള് ഉണ്ടായിട്ടുണ്ട്.
ഡൗട്ടുള്ള സീനുകളില് ചിലപ്പോഴൊക്കെ ‘ഞാന് ഇത് ചെയ്യില്ല. ചെയ്താല് വളരെ ഓവറാകും. ഞാന് ഓവറായി അഭിനയിച്ചുവെന്ന് പറയും’ എന്നൊക്കെ മമ്മൂക്ക പറയാറുണ്ട്. അത് എപ്പോഴും ഒരു ആക്ടറിന് ഉള്ളിലുള്ള കാര്യമാണ്.
പട്ടാളം സിനിമയില് ഒരു ഡാന്സ് മൂവ്മെന്റ് ചെയ്യാന് മമ്മൂക്കയോട് ഞാന് പറഞ്ഞിരുന്നു. അന്ന് അദ്ദേഹം പറഞ്ഞത് ‘അയ്യോ ഞാന് ഡാന്സ് ചെയ്താല് ശരിയാവില്ല. എനിക്ക് അറിയില്ല’ എന്നായിരുന്നു. ഡാന്സ് അറിയാത്ത ഒരാള് എങ്ങനെയാണോ ചെയ്യുക, അങ്ങനെയാണ് ചെയ്യേണ്ടത് എന്നാണ് ഞാന് അന്ന് അദ്ദേഹത്തോട് മറുപടി പറഞ്ഞത്.
‘നിങ്ങള് സിനിമയില് ഒരു മേജറാണ്. അയാള് അങ്ങനെ ഡാന്സൊന്നും കളിക്കില്ല. ആഘോഷത്തിനൊപ്പം കൂടുമ്പോള് അയാളും ഡാന്സ് കളിച്ചു പോകുകയാണ്’ എന്നൊക്കെ ഞാന് പറഞ്ഞു. അങ്ങനെയൊക്കെ പറഞ്ഞ് നിര്ബന്ധിച്ചിട്ടാണ് നമ്മള് പല അഭിനേതാക്കളെയും കൊണ്ട് പല കാര്യങ്ങളും ചെയ്യിക്കുന്നത്,’ ലാല് ജോസ് പറയുന്നു.
Content Highlight: Lal Jose Talks About Mammootty And Pattalam Movie
