മിമിക്രിയിലൂടെ സിനിമയിലേക്കെത്തിയ നടനാണ് ലാല്‍. റാംജിറാവു സ്പീക്കിങ് എന്ന ചിത്രം സിദ്ദിഖുമൊത്ത് സംവിധാനം ചെയ്ത ലാല്‍ അഭിനയത്തിലും നിര്‍മാണത്തിലും തന്റെ കയ്യൊപ്പ് ചാര്‍ത്തിയിട്ടുണ്ട്. സിദ്ദിഖുമായി പിരിഞ്ഞ ശേഷവും അദ്ദേഹം ടു ഹരിഹര്‍ നഗര്‍, ഇന്‍ ഗോസ്റ്റ് ഹൗസ് ഇന്‍ എന്നീ ഹിറ്റുകള്‍ ഒരുക്കി.

സിദ്ധിഖ് ലാൽ കൂട്ടുകെട്ടിൽ പിറന്ന സൂപ്പർഹിറ്റ് ചിത്രമായിരുന്നു വിയറ്റ്നാം കോളനി. മോഹൻലാൽ, കനക, ഇന്നസെന്റ് തുടങ്ങിയവർ പ്രധാന വേഷത്തിൽ എത്തിയ ചിത്രം മോഹൻലാൽ ഈ കൂട്ടുകെട്ടിനൊപ്പം ഒന്നിച്ച ആദ്യ സിനിമയായിരുന്നു. സിനിമയുടെ ഷൂട്ടിന്റെ ആദ്യ ദിനങ്ങളിൽ മോഹൻലാലിന്റെ അഭിനയം തനിക്കും സിദ്ധിഖിനും ഓക്കെയായി തോന്നിയില്ലെന്നും അദ്ദേഹം വെറുതെ ഡയലോഗ് പറയുന്ന പോലെയാണ് ഫീൽ ചെയ്തതെന്നും ലാൽ പറയുന്നു.

എല്ലാ ഷോട്ടിലും അത് പ്രകടമായിരുന്നുവെന്നും എന്നാൽ കുറച്ച് ഭാഗങ്ങൾ എഡിറ്റ് ചെയ്ത ശേഷമാണ് ഇങ്ങനെയാണ് അഭിനയിക്കേണ്ടതെന്ന തിരിച്ചറിവ് തനിക്ക് ഉണ്ടായതെന്നും ലാൽ പറയുന്നു. കണ്ണിന്റെ ചെറിയ ചലനത്തിലെല്ലാം അഭിനയമുണ്ടെന്ന് അന്നാണ് താൻ മനസിലാക്കിയതെന്നും ലാൽ കൂട്ടിച്ചേർത്തു.

‘വിയറ്റ്നാം കോളനി എന്ന സിനിമ സംവിധാനം ചെയ്യുമ്പോൾ ആദ്യത്തെ ദിവസം തന്നെ മനസിലായി മോഹൻലാൽ അത്ര പോരായെന്ന്. ഓരോ ഷോട്ട് എടുക്കുമ്പോഴും അഭിനയം ഇല്ലാത്ത പോലെ. അഭിനയിക്കുകയാണെന്ന് തോന്നണ്ടേ. ഒന്നും ചെയ്യുന്നില്ല, വെറുതെ വന്ന് ഡയലോഗ് പറയുന്നു എന്നൊരു അവസ്ഥ.

ഞാനത് സിദ്ധിഖിനോട് പറയുകയും ചെയ്തു, സിദ്ധിക്കേ ഒന്നും വരുന്നില്ലല്ലോ, വെറുതെ വന്ന് പറഞ്ഞങ്ങ് പോവുകയാണല്ലോയെന്ന്. സിദ്ധിഖും പറഞ്ഞു, അതെ ഒരു അഭിനയം ഇല്ലായെന്ന്. പക്ഷെ പിന്നെ ആദ്യത്തെ കുറെ ഭാഗങ്ങൾ എഡിറ്റ് ചെയ്ത് കണ്ടപ്പോഴാണ് മനസിലായത്, സിനിമയിൽ അഭിനയിക്കേണ്ടത് അഭിനയിച്ചിട്ടല്ല അഭിനയിക്കാതെയാണ് അഭിനയിക്കേണ്ടതെന്ന്.

കണ്ണിലുള്ള ചെറിയ ചലനത്തിലൊക്കെയാണ് അഭിനയം ഇരിക്കുന്നതെന്ന് അന്നാണ് എനിക്ക് മനസിലായത്. ഞാനൊക്കെ അഭിനയത്തിൽ എന്തെങ്കിലും ആയിട്ടുണ്ടെങ്കിൽ അദ്ദേഹത്തിന്റെ അഭിനയത്തിന്റെ ക്ലാസ് ഒക്കെ എന്നെ വളരെ സഹായിച്ചിട്ടുണ്ട്,’ലാൽ പറയുന്നു.

Content Highlight: Lal About Mohanlal’s Acting In Viyatnam Colony Movie