ഇന്ന് മലയാള സിനിമയിലെ മുന്‍നിര സംവിധായകരില്‍ ഒരാളാണ് ജിസ് ജോയ്. കുറഞ്ഞ ചിത്രങ്ങളിലൂടെ തന്നെ പ്രേക്ഷകര്‍ക്കിടയില്‍ സ്വീകാര്യനാവാന്‍ അദ്ദേഹത്തിന് കഴിഞ്ഞിട്ടുണ്ട്. സംവിധാനത്തിന് പുറമെ ഡബ്ബിങ്ങിലും കഴിവ് തെളിയിച്ച ആളാണ് ജിസ്.

മലയാളത്തില്‍ മൊഴിമാറ്റിയിറക്കുന്ന അല്ലു അര്‍ജുന്‍ ചിത്രങ്ങള്‍ക്ക് സ്ഥിരമായി ഡബ്ബ് ചെയ്യാറുള്ളതും ജിസ് ജോയ് ആണ്. ഇപ്പോള്‍ അല്ലു അര്‍ജുന് മലയാളത്തില്‍ വേറെ ആരെങ്കിലും ഡബ്ബ് ചെയ്യേണ്ട സാഹചര്യം ഉണ്ടായിട്ടുണ്ടോ എന്ന ചോദ്യത്തിന് മഹിളാരത്‌നത്തോട് മറുപടി പറയുകയാണ് ജിസ് ജോയ്.

‘ഒരുതവണ അങ്ങനെയൊരു സാഹചര്യം ഉണ്ടായിട്ടുണ്ട്. അന്ന് ആനന്ദവല്ലി ചേച്ചിയാണ് എന്നെ വിളിക്കുന്നത്. അല്ലുവിന് വേണ്ടി ഒരു സിനിമയില്‍ ഡബ്ബ് ചെയ്യണമെന്ന് പറഞ്ഞു. ഞാന്‍ ചെയ്യാം എന്ന് മറുപടിയും കൊടുത്തു.

എന്നാല്‍ പ്രൊഡക്ഷന്റെ ഭാഗത്ത് നിന്ന് സംസാരിച്ചപ്പോള്‍ എനിക്കൊരു മര്യാദ ഇല്ലാത്തപോലെ സംസാരിക്കുന്നതായിട്ടാണ് എനിക്ക് തോന്നിയത്. താന്‍ ഇല്ലെങ്കിലും ഞങ്ങള്‍ക്ക് വേറെ ആളെക്കിട്ടും എന്ന രീതിയില്‍ ആണ് ആള്‍ സംസാരിച്ചത്.

പക്ഷേ എനിക്കുള്ള കഞ്ഞി എനിക്ക് തന്നെ കിട്ടും. അത് മനുഷ്യന്‍ തരുന്നതല്ല ദൈവം തരുന്നതാണ് എന്ന് വിശ്വസിക്കുന്ന ഒരാളാണ് ഞാന്‍. അതുകൊണ്ട് തന്നെ ഞാന്‍ അത് വേണ്ടെന്ന് വെയ്ക്കുകയായിരുന്നു,’ ജിസ് ജോയ് പറയുന്നു.

അല്ലു അര്‍ജുനെ കുറിച്ചും അദ്ദേഹം അഭിമുഖത്തില്‍ സംസാരിച്ചു. ശരിക്കും ഒരു എന്റര്‍ടെയിന്‍മെന്റ് പാക്കേജാണ് അല്ലുവെന്ന് പറയുന്ന ജിസ്, അല്ലു നന്നായി കോമഡിയും ഡാന്‍സും ചെയ്യുമെന്നും കൂട്ടിച്ചേര്‍ത്തു.

‘അല്ലു ഓരോ പടം കഴിയുംന്തോറും അഭിനയത്തില്‍ ഒരുപാട് മെചോര്‍ഡ് ആയിട്ടുണ്ട്. ശരിക്കും ഒരു എന്റര്‍ടെയിന്‍മെന്റ് പാക്കേജാണ് അല്ലു. കോമഡി ചെയ്യുക എന്നത് വലിയ കഷ്ടപ്പാടുള്ള കാര്യമാണ്. അല്ലു പക്ഷേ നന്നായി കോമഡി ചെയ്യും, നന്നായി ഡാന്‍സ് ചെയ്യും.

ഇത് രണ്ടും സിനിമയില്‍ വലിയ ബുദ്ധിമുട്ടുള്ള കാര്യങ്ങളാണ്. അതിനാല്‍ തന്നെ അതുരണ്ടും ഗംഭീരമായി ചെയ്യുമ്പോള്‍ നമുക്കും ശ്രദ്ധിക്കാതിരിക്കാനാവില്ല. മികച്ച നടനുള്ള നാഷണല്‍ അവാര്‍ഡ് പോലും ആ സംസ്ഥാനത്തേയ്ക്ക് ആദ്യമായി കൊണ്ടുചെല്ലുന്നത് അല്ലുവാണ്. ഓരോ സിനിമകള്‍ കഴിയുന്തോറും അല്ലു സ്വയം മെച്ചപ്പെടുകയാണ്,’ ജിസ് ജോയ് പറയുന്നു.

Content Highlight: Jis Joy Talks About Dubbed Movies Of Allu Arjun