ടെന്ഡുല്ക്കര് – ആന്ഡേഴ്സണ് ട്രോഫിയിലെ ആദ്യ ടെസ്റ്റില് ഇന്ത്യയെ ഇംഗ്ലണ്ട് പരാജയപ്പെടുത്തിയിരുന്നു. ഇതോടെ അഞ്ച് മത്സരങ്ങളുള്ള പരമ്പരയില് ആതിഥേയര് മുമ്പിലെത്തി. ജൂലൈ രണ്ടിന് ബുധനാഴ്ചയാണ് പരമ്പരയിലെ രണ്ടാം ടെസ്റ്റ് അരങ്ങേറുന്നത്. ഇതോടെ ഇരു ടീമുകളും വലിയ തയ്യാറെടുപ്പിലാണ്.
ഒന്നാം ടെസ്റ്റിലെ ആദ്യ ഇന്നിങ്സില് ഇന്ത്യയ്ക്ക് വേണ്ടി യശസ്വി ജെയ്സ്വാള് സെഞ്ച്വറി നേടി മികച്ച ബാറ്റിങ് പ്രകടനം നടത്തിയിരുന്നു. 159 പന്തില് നിന്ന് 101 റണ്സാണ് താരം നേടിയത്. എന്നാല് ഫീല്ഡിങ്ങില് താരത്തിന് മികവ് പുലര്ത്താന് സാധിച്ചില്ലായിരുന്നു. ആദ്യ ടെസ്റ്റില് നാലോളം ക്യാച്ചാണ് താരം വിട്ടുകളഞ്ഞത്. അതില് മൂന്ന് ക്യാച്ചും ഒന്നാം ഇന്നിങ്സില് ബുംറയുടെ പന്തിലായിരുന്നു. ഇതോടെ ഒരു ടെസ്റ്റ് ഇന്നിങ്സില് ഏറ്റവും കൂടുതല് ക്യാച്ചുകള് വിട്ടുകളയുന്ന മോശം റെക്കോഡില് ജെയ്സ്വാള് ഒന്നാമനായിരുന്നു.
ഇതിനെല്ലാം പുറമെ മറ്റൊരു മോശം റെക്കോഡിലും ജെയ്സ്വാള് ഒന്നാമനായിരിക്കുകയാണ്. ടെസ്റ്റില് ഏറ്റവും കൂടുതല് ക്യാച്ചുകള് വിട്ടുകളയുന്ന ഇന്ത്യന് താരമായാണ് ജെയ്സ്വാള് നാണക്കേട് ഏറ്റുവാങ്ങിയത്. ഈ നേട്ടത്തില് ഇന്ത്യന് വൈസ് ക്യാപ്റ്റന് റിഷബ് പന്തും മുന് ടെസ്റ്റ് ക്യാപ്റ്റന് രോഹിത് ശര്മയുമായിരുന്നു മുന്നില്. എന്നാല് ഇരുവരേയും മറികടന്നാണ് ജെയ്സ്വാള് ഇങ്ങനെയൊരു ലിസ്റ്റില് ഒന്നാമനായത്.
യശസ്വി ജെയ്സ്വാള് – 8
റിഷബ് പന്ത് – 7
രോഹിത് ശര്മ – 7
വിരാട് കോഹ്ലി – 6
കെ.എസ്. ഭരത് – 6
കെ.എല്. രാഹുല് – 5
പിഴവുകള് സംഭവിച്ചെങ്കിലും ഫീല്ഡിങ്ങില് ജെയ്സ്വാള് മികച്ച തിരിച്ചുവരവ് നടത്തുമെന്നാണ് ആരാധകര് വിശ്വസിക്കുന്നത്. അതേസമയം ആദ്യ ടെസ്റ്റില് പരാജയപ്പെട്ടതോടെ വരാനിരിക്കുന്ന മത്സരങ്ങള് ഇന്ത്യയ്ക്ക് ഏറെ നിര്ണായകമാണ്.
രോഹിത് ശര്മയുടെയേും വിരാട് കോഹ്ലിയുടേയും വിരമിക്കലിന് ശേഷം ക്യാപ്റ്റന്സി ഏറ്റെടുത്ത ശുഭ്മന് ഗില്ലിന് വിജയത്തോടെ തുടങ്ങാന് സാധിച്ചില്ലെങ്കിലും രണ്ടാം ടെസ്റ്റില് ഇന്ത്യ വലിയ പ്രതീക്ഷയുമായാണ് കളത്തിലിറങ്ങുക. ഇംഗ്ലണ്ടിനെതിരെയുള്ള രണ്ടാം ടെസ്റ്റിനുള്ള ഇന്ത്യന് ഇലവന് ജൂലൈ രണ്ടിന് പുറത്ത് വിടും.
Content Highlight: India VS England: Yashasvi Jaiswal In Unwanted Record Achievement In Test Cricket
