![?php echo $post['title']; ?>](https://assets.doolnews.com/w/900x473/2023/07/rohit-sharma.jpg)
ഇന്ത്യന്‍ ക്രിക്കറ്റ് കണ്ട എക്കാലത്തെയും മികച്ച ബാറ്റര്‍മാരില്‍ ഒരാളാണ് രോഹിത് ശര്‍മ. നിലയുറപ്പിച്ചാല്‍ രോഹിത്തിനോളം അപകടകരിയായ ബാറ്റര്‍മാര്‍ ക്രിക്കറ്റ് ലോകത്ത് വിരളമാണ്. ഐ.പി.എല്ലില്‍ മുംബൈ ഇന്ത്യന്‍സിന്റെ നായകനായും ഇന്ത്യന്‍ ടീമിന്റെ നായകനായും അദ്ദേഹം ഒരുപാട് നേട്ടങ്ങള്‍ കൊയ്തിട്ടുണ്ട്.
വിരാട് കോഹ്‌ലിക്ക് ശേഷമാണ് അദ്ദേഹം ഇന്ത്യന്‍ ടീമിന്റെ മുഴുവന്‍ സമയം നായകനായി ചുമതലയേറ്റത്. 2021ല്‍ നടന്ന ട്വന്റി-20 ലോകകപ്പില്‍ ഗ്രൂപ്പ് സ്റ്റേജില്‍ തന്നെ ഇന്ത്യ പുറത്തായതോടെയാണ് വിരാടിനെ ക്യാപ്റ്റന്‍സിയില്‍ നിന്നും മാറ്റിയത്. അതിന് മുമ്പ് വിരാട് വിശ്രമമെടുക്കുന്ന പരമ്പരകളിലും ടൂര്‍ണമെന്റുകളിലും രോഹിത് ഇന്ത്യയെ നയിച്ചിരുന്നു.
രോഹിത് വന്നിട്ടും ഇന്ത്യന്‍ ടീമിന് ട്രോഫി ക്ഷാമം മാറിയിട്ടില്ല. അതിന് ശേഷം നടന്ന ഏഷ്യാ കപ്പിലും ട്വന്റി-20 ലോകകപ്പിലും ഐ.സി.സി വേള്‍ഡ് ടെസ്റ്റ് ചാമ്പ്യന്‍ഷിപ്പ് ഫൈനലിലും ഇന്ത്യ രോഹിത്തിന്റെ കീഴില്‍ തോറ്റിരുന്നു. ഇതിന് ശേഷം രോഹിത്തിനെ ക്യാപ്റ്റന്‍സിയില്‍ നിന്നും മാറ്റണമെന്ന മുറവിളികള്‍ ഒരുപാടുണ്ടായിരുന്നു. എന്നാല്‍ രോഹിത്തിന് പിന്തുണയുമായി രംഗത്തെത്തിയിരിക്കുകയാണ് ഇതിഹാസ സ്പിന്നറായ ഹര്‍ഭജന്‍ സിങ്.
രോഹിത് ഒരു അസാധ്യ ലീഡറാണെന്നും അദ്ദേഹത്തിനെ മാറ്റാന്‍ പറയുന്നവര്‍ മുമ്പ് വിരാടിനെ മാറ്റാന്‍ പറഞ്ഞവര്‍ തന്നെയാണെന്നും ഭാജി പറഞ്ഞു. മുംബൈ ഇന്ത്യന്‍സില്‍ രോഹിത്തിന്റെ കീഴില്‍ ഭാജി കളിച്ചിട്ടുണ്ട്.
‘ഞാന്‍ രോഹിത് ശര്‍മക്കൊപ്പം കളിച്ചിട്ടുണ്ട്, അവന്‍ ഒരു മികച്ച ക്യാര്യക്റ്ററാണ്, ഡ്രസിങ് റൂമില്‍ അദ്ദേഹത്തിന് ബഹുമാനം ലഭിക്കുന്നു. നേരത്തെ ആളുകള്‍ വിരാടിനെ മാറ്റാന്‍ പറഞ്ഞുകൊണ്ടിരുന്നു, ഇപ്പോള്‍ ആളുകള്‍ രോഹിത്തിനെ മാറ്റാന്‍ പറയുന്നു, ഇതേ ആളുകള്‍ ഭാവി ലീഡര്‍മാരോടും ഇത് പറയും, അതിനാല്‍ അവര്‍ക്ക് പരിഹരിക്കാന്‍ സമയം നല്‍കുക. അവരില്‍ വിശ്വസിക്കുക, അവര്‍ രാജ്യത്തിന് അഭിമാനിക്കാനുള്ളത് കൊണ്ടുവരും,’ ഭാജി പറഞ്ഞു.
Harbhajan Singh said “I have played with Rohit Sharma, he is a great character, commands respect in dressing room – earlier people were saying to remove Virat, now people are saying to remove Rohit and same guys will say this to future leaders so give them time to settle & have… pic.twitter.com/1mPHck0EPh
— Johns. (@CricCrazyJohns) July 18, 2023
നിലവില്‍ ഏകദിന ലോകകപ്പിനുള്ള തയ്യാറെടുപ്പിലാണ് ടീം ഇന്ത്യ. വിന്‍ഡീസില്‍ പരമ്പര കളിക്കുന്ന ടീം ലോകകപ്പിനുള്ള സ്‌ക്വാഡിനെ വാര്‍ത്തെടുത്തുകൊണ്ടിരിക്കുകയാണ്. പരിക്ക് മാറി ജസ്പ്രീത് ബുംറ തിരിച്ചുവരുന്നത് ഇന്ത്യന്‍ ടീമിന് ഒരുപാട് പ്രതീക്ഷ നല്‍കുന്നുണ്ട്.
Content Highlight: Harbhajan backs Rohit Sharma as Captain
