ഇന്ത്യന് ടി-20 ടീമില് നിന്നും മലയാളി താരം സഞ്ജു സാംസണിനെ ഒഴിവാക്കിയതിനെ ചോദ്യം ചെയ്തിരിക്കുകയാണ് മുന് ഇന്ത്യന് താരം ഹനുമ വിഹാരി. അഭിഷേക് ശര്മക്ക് ഒരുപാട് അവസരങ്ങള് ലഭിക്കുന്നതിനെക്കുറിച്ചും വിഹാരി സംസാരിച്ചു.
അഭിഷേകിന് നല്കുന്ന പിന്തുണ എന്തുകൊണ്ട് സഞ്ജുവിന് നല്കുന്നില്ലെന്നും ശ്രീകാന്ത് ചോദിച്ചു. തന്റെ യൂട്യൂബ് ചാനലിലൂടെ സംസാരിക്കുകയായിരുന്നു മുന് ഇന്ത്യന് താരം.
‘ലോകകപ്പില് സഞ്ജു സാംസണ് മൂന്ന് മത്സരങ്ങള് കളിച്ചു. ആ മൂന്ന് മത്സരങ്ങളിലും അദ്ദേഹം അര്ധ സെഞ്ചുറി നേടിയിട്ടുണ്ട്. മറുഭാഗത്ത് അഭിഷേക് ശര്മ അഞ്ച് മത്സരങ്ങള് കളിച്ചിട്ടും അദ്ദേഹത്തിന്റെ ഉയര്ന്ന സ്കോര് 16 റണ്സ് മാത്രമാണ്. എന്നിട്ടും ഇതിനെക്കുറിച്ച് അധികം ചര്ച്ച ചെയ്യപ്പെടുന്നില്ല. സഞ്ജുവിന്റെ കാര്യത്തില് മാത്രം അവന് സ്ഥിരതയില്ലാത്ത താരമാണെന്നാണ് പലരും പറയുന്നത്.
ഇത് ഒരു പരിധി വരെ ശരിയാണ്. എന്നാല് തന്റെ ദിവസമാണെങ്കില് വലിയ സമ്മര്ദമുള്ള മത്സരങ്ങള് പോലും വിജയിപ്പിക്കാന് അദ്ദേഹത്തിന് സാധിക്കും. അഭിഷേക് വളരെ ഹൈപ്പുള്ള താരമാണ്. എന്നാല് സഞ്ജുവും അത്രത്തോളം കഴിവുള്ള താരമാണ്. ഐ.പി.എല്ലിലും അദ്ദേഹം മികച്ച പ്രകടനങ്ങള് നടത്തി. എന്നാല് വ്യത്യസ്ത താരങ്ങള്ക്ക് വ്യത്യസ്ത മാനദണ്ഡങ്ങള് എന്തുകൊണ്ടാണ്?,’ ഹനുമ വിഹാരി പറഞ്ഞു.
സിംബാബ്വേക്കെതിരെയുള്ള മൂന്ന് ടി-20 മത്സരങ്ങളുടെ പരമ്പരയില് അഭിഷേക് നിരാശപ്പെടുത്തിയ പ്രകടനമാണ് നടത്തിയിരുന്നത്. മൂന്ന് മത്സരങ്ങളില് നിന്നും വെറും 11 റണ്സ് മാത്രമാണ് അഭിഷേകിന് നേടാനായത്.
മൂന്ന് ടി-20 മത്സരങ്ങളുടെ പരമ്പരയില്(ആദ്യ ഏഴ് ബാറ്റര്മാര്) ഏറ്റവും കുറവ് റണ്സ് നേടുന്ന ഇന്ത്യന് താരവും അഭിഷേകാണ്. ഇന്ത്യന് ക്യാപ്റ്റന് ശ്രേയസ് അയ്യരെ മറികടന്നുകൊണ്ടാണ് ഈ മോശം പട്ടികയില് അഭിഷേക് ഒന്നാമനായത്. 2019ല് വെസ്റ്റ് ഇന്ഡീസിനെതിരെയുള്ള ടി-20 പരമ്പരയില് 14 റണ്സായിരുന്നു ശ്രേയസ് നേടിയിരുന്നത്.
മറുഭാഗത്ത് സഞ്ജു സാംസണ് സിംബാബ്വേ പരമ്പരയുടെ ഭാഗമായിരുന്നില്ല. അയര്ലാന്ഡിനെതിരെയും ഇംഗ്ലണ്ടിനെതിരെയുമുള്ള പരമ്പരയിലെ മോശം പ്രകടനങ്ങള്ക്ക് പിന്നാലെയാണ് സഞ്ജുവിനെ ടീമില് നിന്നും ഒഴിവാക്കിയത്.
ഇംഗ്ലണ്ടിനെതിരെയുള്ള പരമ്പരയില് ഒരു മത്സരത്തില് മാത്രമായിരുന്നു സഞ്ജു ഇറങ്ങിയത്. സഞ്ജുവിന് പകരം യുവതാരം വൈഭവ് സൂര്യവംശിയായിരുന്നു ടീമില് ഇടം നേടിയത്.
Content Highlight: Hanuma Vihari talks about Sanju Samson and Abhishek Sharma performance
