ലോക ഫുട്ബോളിലെ ഇതിഹാസങ്ങളാണ് ലയണൽ മെസിയും ക്രിസ്റ്റ്യാനോ റൊണാൾഡോയും. പുതിയ താരങ്ങൾ സ്പോട്ട്ലൈറ്റിലെത്തിയിട്ടും ഇരുവരും യൂറോപ്പ് വിട്ടിട്ടും ഫുട്ബോൾ ആരാധകരുടെ ചർച്ചകളിൽ സജീവമാണ് ഈ രണ്ട് പേരുകൾ.

തലമുറ മാറ്റമുണ്ടായിട്ടും മെസിയും റോണോയും തന്നെയാണ് ആരാധകരുടെ പ്രിയപ്പെട്ടവര്‍ എന്നാണ് ഇത് തെളിയിക്കുന്നത്. ഇരുവരെയും കുറിച്ച് ആരാധകര്‍ പരാമര്‍ശിക്കാത്ത ദിവസങ്ങള്‍ കടന്നുപോകുന്നത് വളരെ വിരളമാണ്. ഇവരില്‍ മികച്ച താരമാര് എന്ന ചോദ്യം ഇപ്പോഴും ഫുട്ബോള്‍ ലോകത്തെ ഇരു ചേരിയില്‍ നിര്‍ത്താന്‍ കെല്‍പ്പുള്ളതാണ്.

ക്ലബ് ലോകകപ്പ് ഇരുവരിലുമാരാണ് മികച്ചതെന്ന ഈ ചോദ്യം വീണ്ടും മുഖ്യധാരയിൽ എത്തിച്ചിരിക്കുകയാണ്. ഈ സാഹചര്യത്തിൽ മെസിയുടെ സഹതാരമായ എയ്‌ഞ്ചൽ ഡി മരിയയുടെ ഒരു ഇന്റർവ്യൂ വീണ്ടും ചർച്ചയാവുകയാണ്. 2024ൽ താരം മെസി, റൊണാൾഡോ എന്നിവരിൽ മികച്ച താരത്തെ തെരഞ്ഞെടുത്ത വീഡിയോയാണ് വീണ്ടും ചർച്ച ചെയ്യപ്പെടുന്നത്.

മെസിക്കും റൊണാൾഡോയ്ക്കും അവിശ്വസനീയമായ വിജയ മനോഭാവമുണ്ടെന്നും തനിക്ക് ഏറ്റവും മികച്ച താരം ഏറ്റവും കൂടുതൽ ബാലൺ ഡി ഓർ നേടിയ മെസിയാണെന്നും അദ്ദേഹം പറഞ്ഞു. ഇരുവരുടെയും റൈവൽറി ലോകത്തെ ഫുട്ബോളുമായി പ്രണയത്തിലാക്കിയെന്ന് അദ്ദേഹം കൂട്ടിച്ചേർത്തു.

‘മെസിക്കും റൊണാൾഡോയ്ക്കും അവിശ്വസനീയമായ വിജയ മനോഭാവമുണ്ട്. എന്നാൽ എനിക്ക് ഏറ്റവും മികച്ച താരം ഏറ്റവും കൂടുതൽ ബാലൺ ഡി ഓർ നേടുന്നവനാണ്. മെസിക്ക് എട്ട് എണ്ണമുണ്ട്. അത് ഇരുവർക്കുമിടയിൽ ഇടയിൽ ഒരു നിശ്ചിത അകലം സൃഷ്ടിക്കുന്നു.

അവർ സൗദിയിലേക്കും യു.എസിലേക്കും മാറിയിട്ടും ഇപ്പോഴും അവരെ കുറിച്ചാണ് ആളുകൾ സംസാരിക്കുന്നത്. അവരുടെ മത്സരം ലോകത്തെ ഫുട്ബോളുമായി പ്രണയത്തിലാക്കി. മെസി ഇപ്പോൾ യു.എസിൽ ഉള്ളതിനാൽ, അമേരിക്കക്കാർ ഈ സ്പോർട്സിനെ വീണ്ടും സ്നേഹിക്കുന്നു,’ ഡി മരിയ പറഞ്ഞു.

Content Highlight: Football: Angel Di Maria selects Lionel Messi as best player in the world ahead of Cristiano Ronaldo