![?php echo $post['title']; ?>](https://assets.doolnews.com/w/900x473/2019/10/modi-1.jpg)
ന്യൂദല്ഹി: ആള്ക്കൂട്ട ആക്രമണവും കൊലപാതകങ്ങളും രാജ്യത്ത് വര്ധിക്കുന്നതില് ആശങ്ക പ്രകടിപ്പിച്ച് പ്രധാനമന്ത്രിക്ക് തുറന്ന കത്തെഴുതിയവര്ക്കെതിരെ എഫ്.ഐ.ആര്. ചലച്ചിത്ര പ്രവര്ത്തകരടക്കമുള്ള 50 ഓളം പ്രമുഖ വ്യക്തികള്ക്കെതിരെയാണ് എഫ്.ഐ.ആര്.
അഭിഭാഷകനായ സുധീര് കുമാര് ഓജ സമര്പ്പിച്ച പരാതിയില് ചീഫ് ജുഡീഷ്യല് മജിസ്ട്രേറ്റ് സൂര്യകാന്ത് തിവാരിയാണ് ഇവര്ക്കെതിരെ കേസെടുക്കാന് ഉത്തരവിട്ടത്. ഗവേഷകനും എഴുത്തുകാരനുമായ രാമചന്ദ്ര ഗുഹ, സംവിധായകരായ മണിരത്നം, അടൂര് ഗോപാലകൃഷ്ണന്, ചലച്ചിത്ര പ്രവര്ത്തകരായ രേവതി, അപര്ണാ സെന് തുടങ്ങിയവര്ക്കെതിരെയാണ് എഫ്.ഐ.ആര്.
കത്ത് വിഘടനവാദ പ്രവണതകളെ പിന്തുണയ്ക്കുന്നതാണെന്ന ആരോപണമാണ് പരാതിയിലുള്ളത്. പ്രമുഖര് പ്രധാനമന്ത്രിക്കയച്ച കത്ത് രാജ്യത്തിന്റെ പ്രതിച്ഛായയ്ക്ക് കളങ്കമുണ്ടാക്കുന്നതായും പ്രധാനമന്ത്രിയെ താഴ്ത്തിക്കെട്ടാന് ശ്രമിച്ചതായും സുധീര് കുമാര് പരാതിയില് ആരോപിക്കുന്നു.
വാര്ത്തകള് ടെലഗ്രാമില് ലഭിക്കാന് ഇവിടെ ക്ലിക്ക് ചെയ്യൂ
രാജ്യദ്രോഹം, പൊതുജന ശല്യം, മതവികാരങ്ങളെ വ്രണപ്പെടുത്തുക, സമാധാന ലംഘനത്തിന് പ്രേരിപ്പിക്കുക എന്ന ഉദ്ദേശ്യത്തോടെ അപമാനിക്കല് എന്നിവയുള്പ്പെടെയുള്ള വകുപ്പുകള് പ്രകാരമാണ് എഫ്.ഐ.ആര് രജിസ്റ്റര് ചെയ്തിരിക്കുന്നതെന്ന് പോലീസ് പറഞ്ഞു.
ജയ് ശ്രീറാം ഇപ്പോള് പോര്വിളി ആയി മാറിയിട്ടുണ്ടെന്നും മുസ്ലികള്ക്കും ദളിതുകള്ക്കുമെതിരെ തുടര്ച്ചയായി ഉണ്ടാകുന്ന ആള്ക്കൂട്ട ആക്രമണത്തില് ആശങ്കയുണ്ടെന്നും കാണിച്ച് ജൂലായിലാണ് 50 ഓളം സാഹിത്യ-ചലച്ചിത്ര പൊതുരംഗത്തെ പ്രമുഖര് പ്രധാനമന്ത്രിക്ക് കത്തയച്ചത്. ജയ് ശ്രീറാം വിളിച്ച് ന്യൂനപക്ഷങ്ങളെ ആക്രമിക്കുന്നവര്ക്കെതിരെ ‘നിങ്ങള് എന്തു നടപടിയെടുത്തെന്ന ചോദ്യം കത്തില് ഉന്നയിച്ചിരുന്നു.
തുടര്ന്ന് കേരളത്തില് അടൂര് ഗോപാലകൃഷ്ണനെതിരെ സംഘ്പരിവാര് ആക്രമണമുണ്ടായിരുന്നു. അടൂര് ഗോപാലകൃഷ്ണന്റെ വീടിനു മുന്നിലും ജയ് ശ്രീറാം വിളിക്കുമെന്നും ജയ് ശ്രീറാം വിളിക്കുന്നത് കേള്ക്കേണ്ടെങ്കില് അടൂരിന് ചന്ദ്രനിലേയ്ക്ക് പോകാമെന്നുമായിരുന്നു ബി.ജെ.പി നേതാവ് ബി ഗോപാലകൃഷ്ണന്റെ പ്രസ്താവന. ഇത് വലിയ വിവാദങ്ങള്ക്ക് വഴിവച്ചിരുന്നു.
ഡൂൾന്യൂസ് യൂട്യൂബ് ചാനൽ സബ്സ്ക്രൈബ് ചെയ്യാനായി ഇവിടെ ക്ലിക്ക് ചെയ്യൂ
