മേജര് ലീഗ് ക്രിക്കറ്റില് സിയാറ്റില് ഓര്ക്കസിനെതിരെ ടെക്സാസ് സൂപ്പര് കിങ്സ് തകര്പ്പന് വിജയമായിരുന്നു സ്വന്തമാക്കിയത്. മത്സരത്തില് ആറ് വിക്കറ്റിനാണ് ഫാഫ് ഡുപ്ലെസിയുടെ സൂപ്പര് കിങ്സ് വിജയം സ്വന്തമാക്കിയത്.
ടെക്സസില് ഗ്രാന്ഡ് പ്രൈറി ക്രിക്കറ്റ് സ്റ്റേഡിയത്തില് നടന്ന പോരാട്ടത്തില് ആദ്യം ബാറ്റ് ചെയ്ത സിയാറ്റില് രണ്ട് വിക്കറ്റ് നഷ്ടത്തില് 220 റണ്സാണ് അടിച്ചെടുത്തത്. മറുപടി ബാറ്റിങ്ങിനിറങ്ങിയ സൂപ്പര് കിങ്സ് ഒമ്പത് പന്തുകളും ആറ് വിക്കറ്റും ബാക്കിനില്ക്കെ ലക്ഷ്യം മറികടന്നു.
സെഞ്ച്വറി നേടിയ ക്യാപ്റ്റന് ഫാഫ് ഡുപ്ലെസിയുടെ കരുത്തിലാണ് സൂപ്പര് കിങ്സ് വമ്പന് വിജയം കൈപ്പിടിയിലാക്കിയത്. മത്സരത്തില് 52 പന്തില് പുറത്താവാതെ 113 റണ്സാണ് ഫാഫ് നേടിയത്. ഒമ്പത് ഫോറും ഏഴ് കൂറ്റന് സിക്സും അടങ്ങുന്നതാണ് താരത്തിന്റെ ഇന്നിങ്സ്.
ഈ സെഞ്ച്വറിക്ക് പിന്നാലെ ഒരു ചരിത്രനേട്ടവും ഫാഫ് ഡുപ്ലെസിസ് സ്വന്തമാക്കിയിരിക്കുകയാണ്. ടി-20യില് ഏറ്റവും കൂടുതല് സെഞ്ച്വറികള് നേടുന്ന നാലാമത്തെ താരമായിരിക്കുകയാണ് ഫാഫ്. ഈ നേട്ടത്തില് പ്രോട്ടിയാസ് താരം ക്വിന്റണ് ഡി കോക്കിനൊപ്പമാണ് ഫാഫ് റെക്കോഡ് പങ്കിടുന്നത്. മാത്രമല്ല ഇന്ത്യന് വെടിക്കെട്ട് വീരന് സഞ്ജു സാംസണ് അടക്കമുള്ള ഏഴ് സൂപ്പര് താരങ്ങളെ മറികടന്നാണ് ഫാഫ് ഈ നേട്ടത്തില് മുന്നേറിയത്.
അതേസമയം മത്സരത്തില് ആദ്യം ബാറ്റ് സിയാറ്റില് ഓര്ക്കസിനായി ന്യൂസിലാന്ഡ് വിക്കറ്റ് കീപ്പര് ടിം സൈഫര്ട്ടും സെഞ്ച്വറി നേടി മിന്നും പ്രകടനമാണ് നടത്തിയത്. 66 പന്തുകളില് നിന്നും എട്ട് വീതം ഫോറുകളും ആറ് സിക്സുകളും അടക്കം 104 റണ്സാണ് സൈഫര്ട്ട് സ്വന്തമാക്കിയത്. ഷായാന് ജഹാംഗീര് 47 പന്തില് 78 റണ്സും നേടി മികച്ച പ്രകടനം നടത്തി.
Content Highlight: Faf Du Plessis Surpass Sanju Samson In A Great Record Achievement
