ഫീഡില്‍ മുഴുവന്‍ ആളുകളുടെ സഹായഭ്യര്‍ത്ഥനയും സഹായങ്ങളും; സര്‍ക്കാരിനെ അര്‍ഹിക്കുന്നുണ്ടോ എന്നതല്ല, ഈ സര്‍ക്കാര്‍ നിങ്ങളെ ഒരിക്കലും അര്‍ഹിക്കുന്നില്ല; ബോളിവുഡ് താരം വീര്‍ദാസ്

മുംബൈ: കൊവിഡ് പ്രതിരോധത്തിലെ കേന്ദ്ര സര്‍ക്കാരിന്റെ വീഴ്ച്ചകളെ രൂക്ഷമായി വിമര്‍ശിച്ച് ബോളിവുഡ് താരവും സ്റ്റാന്‍ഡ് അപ്പ് കോമെഡിയനുമായ വീര്‍ദാസ്.

തന്റെ സോഷ്യല്‍ മീഡിയ ഫീഡ് മുഴുവനും സഹായ അഭ്യര്‍ത്ഥനകളും സഹായങ്ങള്‍ വിവിധ വ്യക്തികളും എത്തിച്ചു നല്‍കുന്നതാണ്. ഈ സര്‍ക്കാരിനെ നിങ്ങള്‍ അര്‍ഹിക്കുന്നുണ്ടോ എന്നത് അവിടെ നിക്കട്ടെ, നിങ്ങളെ ഈ സര്‍ക്കാര്‍ ഒരിക്കലും അര്‍ഹിക്കുന്നില്ല എന്നായിരുന്നു അദ്ദേഹത്തിന്റെ പ്രതികരണം.

താന്‍ ഓണ്‍ലെെന്‍ ഷോ സംഘടിപ്പിക്കാന്‍ ഉദ്ദേശിക്കുന്നുണ്ടെന്നും ഈ തുക മുഴുവനായി കൊവിഡ് വാക്സിന്‍ വാങ്ങുന്നതിനും വാക്സിന്‍ ബോധവല്‍ക്കരണത്തിനുമായി ഉപയോഗിക്കുന്ന ചാരിറ്റിക്ക് ഉപയോഗിക്കുമെന്നും അദ്ദേഹം പറഞ്ഞിരുന്നു.

നടന്‍ സിദ്ധാര്‍ത്ഥും ബി.ജെ.പി സര്‍ക്കാരിനെതിരെ രൂക്ഷ വിമര്‍ശനവുമായി രംഗത്ത് എത്തിയിരുന്നു. അധികാരത്തില്‍ നിന്ന് ബി.ജെ.പി പുറത്താകുന്ന ദിവസം രാജ്യം യഥാര്‍ത്ഥത്തില്‍ പ്രതിരോധ ശേഷി നേടുമെന്നായിരുന്നു അദ്ദേഹത്തിന്റെ പ്രതികരണം.

ഇന്ത്യയില്‍ പുതുതായി 3.46 ലക്ഷം പേര്‍ക്കാണ് കൊവിഡ് സ്ഥിരീകരിച്ചത്. 2600 മരണങ്ങളാണ് ഇരുപത്തിനാല് മണിക്കൂറിനിടെ രാജ്യത്ത് സ്ഥിരീകരിച്ചത്. മൂന്ന് ദിവസത്തിനിടെ പത്ത് ലക്ഷത്തിനടുത്ത് (9.94 ലക്ഷം) കൊവിഡ് കേസുകളാണ് രാജ്യത്ത് സ്ഥിരീകരിച്ചത്.

തുടര്‍ച്ചയായ നാല് ദിവസങ്ങളില്‍ രാജ്യത്ത് രണ്ടായിരത്തിന് മുകളിലാണ് കൊവിഡ് കേസുകള്‍ റിപ്പോര്‍ട്ട് ചെയ്തിരിക്കുന്നത്. ലോകത്ത് കൊവിഡ് കേസില്‍ രണ്ടാം സ്ഥാനത്തുള്ള ബ്രസീലില്‍ 79,719 കേസുകളും യു.എസില്‍ 62,642 ഉം തുര്‍ക്കിയില്‍ 54,791 ഉം കേസുകളുമാണ് റിപ്പോര്‍ട്ട് ചെയ്തത്.

Content Highlights:  Covid 19 India It doesn’t matter if you deserve the government, this government never deserved you; Bollywood star Vir Das