ലഖ്നൗ: ഉത്തര്പ്രദേശിലെ മുഹമ്മദ് അലി ജൗഹര് സര്വകലാശാലയിലെ കെട്ടിടങ്ങള് ഇടിച്ചു നിരത്തുന്നതിന് കോടതിയുടെ ഇടക്കാല സ്റ്റേ. മൊറാദാബാദ് ഡിവിഷണല് കമ്മീഷണര് കോടതിയാണ് നടപടി സ്റ്റേ ചെയ്തത്.
റാംപൂരിലുള്ള മുഹമ്മദ് അലി ജൗഹര് സര്വകലാശാലയിലെ 40 കെട്ടിടങ്ങളില് 38 എണ്ണവും ഇടിച്ചുനിരത്താനാണ് യു.പിയിലെ യോഗി ആദിത്യനാഥ് സര്ക്കാരിന്റെ നീക്കം. ഇതിനെതികരെ വലിയ പ്രതിഷേധവും ഉയരുന്നുണ്ട്.
കെട്ടിടങ്ങള് പൊളിക്കുന്നതുമായി ബന്ധപ്പെട്ട കേസ് കോടതിയുടെ പരിഗണനയിലുണ്ട്. ഈ കേസില് അന്തിമ വാദം കേള്ക്കുന്നത് വരെയാണ് കെട്ടിടം പൊളിക്കുന്നതിനുള്ള ഇടക്കാല സ്റ്റേ.
സര്വകലാശാല സമിതി ഒരു അപേക്ഷ സമര്പ്പിച്ചതിനാലാണ് കെട്ടിടങ്ങള് പൊളിക്കാനുള്ള നടപടിയില് ഇടക്കാല സ്റ്റേയ്ക്ക് അനുമതി നല്കിയതെന്ന് ഡിവിഷനല് കമ്മീഷണര് ആഞ്ജനേയ സിങ് അറിയിച്ചതായി പി.ടി.ഐ വാര്ത്താ ഏജന്സി റിപ്പോര്ട്ട് ചെയ്തു.
നാളെയായിരുന്നു (ജൂലൈ 28, ചൊവ്വ) ഈ വിഷയം കോടതി പരിഗണിക്കേണ്ടിയിരുന്നത്. എന്നാല് മൊറാദാബാദിലെ ഒരു അഭിഭാഷകന്റെ മരണത്തില് അനുശോചനം അറിയിച്ചുള്ള യോഗം നാളെ നടക്കുന്നതിനാല് കേസ് മറ്റൊരു ദിവസത്തേക്ക് മാറ്റി.
ജൗഹര് സര്വകലാശാലയ്ക്കെതിരെ ഈ വിവേചനവും ദ്രോഹവും എന്തിനാണെന്ന് അഖിലേഷ് കഴിഞ്ഞ ദിവസം ഒരു എക്സ് പോസ്റ്റില് ചോദിച്ചിരുന്നു. യു.പി സര്ക്കാരിന് ഭരണപരമായ ഉത്തരവിറക്കി മറ്റ് പല നിര്മ്മാണ പ്രവര്ത്തനങ്ങളും ക്രമപ്പെടുത്താന് സാധിക്കുന്നുണ്ട്. അത് ജൗഹര് സര്വകലാശാലയുടെ കാര്യത്തില് എന്തുകൊണ്ടാണ് ചെയ്യാന് പറ്റാത്തതെന്നും അദ്ദേഹം ചോദിച്ചു.
യുവാക്കളുടെ ഭാവിയെ ബി.ജെ.പി അവരുടെ പ്രതികാര തീയിലേക്ക് വലിച്ചെറിയരുതെന്നാണ് തങ്ങള് ആവശ്യപ്പെടുന്നതെന്നും അഖിലേഷ് അഭിപ്രായപ്പെട്ടു.
Content Highlight: Court grants interim stay on demolition of Jauhar University
കേരള പ്രസ് അക്കാദമിയില് നിന്നുംപബ്ലിക് റിലേഷന്സ് ആന്ഡ് അഡ്വര്ടൈസിങില് പി.ജി ഡിപ്ലോമ. തേജസ്, തത്സമയം, ഇന്ത്യന് എക്സ്പ്രസ് മലയാളം എന്നീ മാധ്യമങ്ങളില് പ്രവര്ത്തിച്ചു. 2026 മെയ് മുതല് ഡൂള്ന്യൂസില് ജോലി ചെയ്യുന്നു.
