ആഷിക് ഐമര്‍ രചന നിര്‍വഹിച്ച് അഹമ്മദ് കബീര്‍ സംവിധാനം ചെയ്ത സീരീസായിരുന്നു കേരള ക്രൈം ഫയല്‍സ്. മലയാളത്തില്‍ എത്തിയ ആദ്യ ക്രൈം വെബ് സീരീസ് ആയിരുന്നു ഇത്.

2023 ജൂണ്‍ 23ന് ഡിസ്‌നി പ്ലസ് ഹോട്ട്സ്റ്റാറില്‍ റിലീസ് ചെയ്ത സീരീസില്‍ അജു വര്‍ഗീസ്, ലാല്‍ തുടങ്ങിയ മികച്ച താരനിരയായിരുന്നു ഒന്നിച്ചത്. ഈ സീരീസിന്റെ രണ്ടാം ഭാഗമാണ് കേരള ക്രൈം ഫയല്‍സ് – ദ സെര്‍ച്ച് ഫോര്‍ സി.പി.ഒ അമ്പിളി രാജു.

അര്‍ജുന്‍ രാധാകൃഷ്ണന്‍ നായകനായി എത്തുന്ന ഈ സീസണിന്റെ രചന നിര്‍വഹിച്ചത് ബാഹുല്‍ രമേശ് ആയിരുന്നു. കിഷ്‌കിന്ധാ കാണ്ഡം സിനിമക്ക് ശേഷം ബാഹുലിന്റെ രചനയില്‍ എത്തിയ സീരീസായിരുന്നു ഇത്.

ഇപ്പോള്‍ ‘ഒരു ക്രൈം ത്രില്ലര്‍ എഴുതുമ്പോള്‍ അത് തുടങ്ങുന്നത് ആ കഥാപാത്രത്തില്‍ നിന്നാണോ, ക്രൈമില്‍ നിന്നാണോ അല്ലെങ്കില്‍ പശ്ചാത്തലത്തില്‍ നിന്നാണോ’ എന്ന ചോദ്യത്തിന് മറുപടി നല്‍കുകയാണ് സംവിധായകന്‍ അഹമ്മദ് കബീര്‍. ദി നെക്‌സ്റ്റ് 14 മിനിട്ട്‌സ് എന്ന യൂട്യൂബ് ചാനലിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം.

‘കേരള ക്രൈം ഫയല്‍സ് സീരീസിന്റെ ആദ്യ സീസണ്‍ എഴുതുമ്പോള്‍ നമുക്ക് ഒരു ഇന്‍സിഡന്റ് കിട്ടിയിരുന്നു. ആദ്യമേ തന്നെ ഒരു പ്ലോട്ടും സ്‌റ്റോറി ലൈനും ഉണ്ടായിരുന്നു. പക്ഷെ ഈ സീരീസിന്റെ അടുത്ത ഭാഗം എഴുതിയത് മറ്റൊരാളാണ്.

ബാഹുല്‍ രമേശാണ് രണ്ടാമത്തെ ഭാഗം എഴുതുന്നത്. ആദ്യത്തെ സീസണിലെ കുറച്ച് ആളുകള്‍ ഇവിടെയും വരണമെന്ന് ഞാന്‍ അവനോട് തുടക്കത്തില്‍ തന്നെ പറഞ്ഞിരുന്നു. അതുപോലെ സീരീസിലേക്ക് പുതിയൊരാളെ ഇന്‍ട്രഡ്യൂസ് ചെയ്യണമെന്നും പറഞ്ഞു.

ബാഹുലിന് ഫുള്‍ ഫ്രീഡം കൊടുത്തിരുന്നു. വേറൊന്നും ഞാന്‍ അവനോട് പറഞ്ഞിരുന്നില്ല. ആദ്യത്തെ സീസണ്‍ ഒരു സിംഗിള്‍ പ്ലോട്ട് ആയിരുന്നല്ലോ. പക്ഷെ അടുത്ത സീസണില്‍ കുറേ ലെയറുകളുള്ള പ്രോപ്പര്‍ വെബ് സീരീസ് ഫോര്‍മാറ്റ് വരണമെന്ന് എനിക്ക് ആഗ്രഹം ഉണ്ടായിരുന്നു.

ബ്രീഫ് ആയിട്ട് ഞാന്‍ ഇത്രയും കാര്യങ്ങളാണ് ബാഹുലിനോട് പറഞ്ഞിരുന്നത്. അമ്പിളി രാജു പ്രതിയെ ബസില്‍ കൊണ്ടു പോകുന്ന സീനുണ്ടല്ലോ. അതാണ് ആദ്യം കിട്ടിയ സീന്‍ എന്നാണ് ബാഹുല്‍ എന്നോട് പറഞ്ഞത്. അവന്റെ എഴുത്ത് പിന്നെ വളരെ വ്യത്യസ്തമാണല്ലോ,’ അഹമ്മദ് കബീര്‍ പറയുന്നു.

Content Highlight: Ahammed Khabeer Talks About Bahul Ramesh And Kerala Crime Files2