കര്‍താര്‍പൂര്‍ ഇടനാഴി ഉദ്ഘാടനം ഇന്ന്
national news
കര്‍താര്‍പൂര്‍ ഇടനാഴി ഉദ്ഘാടനം ഇന്ന്
ന്യൂസ് ഡെസ്‌ക്
Saturday, 9th November 2019, 7:58 am

ന്യൂദല്‍ഹി: കര്‍താര്‍പൂര്‍ ഇടനാഴിയുടെ ഉദ്ഘാടനം ഇന്ന്. പ്രധാനമന്ത്രി നരേന്ദ്രമോദി ഗുരുദാസ് പൂരിലെ ദേരാ ബാബാ നാനാക് ഗുരുദ്വാരക്കടുത്തുള്ള ടെര്‍മിനല്‍ ഉദ്ഘാടനം ചെയ്യും. പാകിസ്താനിലെ കര്‍താര്‍പൂര്‍ സാഹിബില്‍ നിന്നുള്ള പാത പാക് പ്രധാനമന്ത്രി ഇംറാന്‍ഖാനും ഉദ്ഘാടനം ചെയ്യും. ഗുരുദാസ്പൂരില്‍ നിന്ന് കര്‍താര്‍പൂരിലേക്കുള്ള പാത തുറന്നു കൊടുക്കുന്നതോടെ മുന്‍ പ്രധാനമന്ത്രി മന്‍മോഹന്‍ സിംഗ്, പഞ്ചാബ് മുഖ്യമന്ത്രി ക്യാപ്റ്റന്‍ അമരീന്ദര്‍ സിംഗ്, നവജ്യോത് സിംഗ് സിദ്ദു, സണ്ണി ഡിയോള്‍ എന്നിവരടക്കമുള്ള പ്രതിനിധി സംഘം കര്‍താര്‍പൂരിലേക്ക് പോകും.

വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ

സിഖ് മതസ്ഥാപകനായ ഗുരു നാനാക്കിന്റെ ജന്മദിനത്തിന് മുന്നോടിയായാണ് ഇടനാഴി തീര്‍ത്ഥാടകര്‍ക്ക് തുറന്നുകൊടുക്കാന്‍ ഇരു രാജ്യങ്ങളും തീരുമാനിച്ചത്. ആദ്യ തീര്‍ത്ഥാടകരില്‍ നിന്നും ഫീസ് വാങ്ങേണ്ടതില്ലെന്നാണ് പാകിസ്താന്റെ തീരുമാനം. അതേസമയം തിരിച്ചറിയല്‍ രേഖയായി പാസ്‌പോര്‍ട്ട് തന്നെ വേണമെന്നാണ് നിര്‍ദേശം. ഒരു ദിവസം 5000 തീര്‍ത്ഥാടകര്‍ക്ക് വിസയില്ലാതെ സന്ദര്‍ശനം നടത്താന്‍ അനുമതി നല്‍കണമെന്നാണ് ഇരു രാജ്യങ്ങളുടേയും തീരുമാനം.

പഞ്ചാബിലെ ഗുരുദാസ്പൂര്‍ ജില്ലയില്‍ നിന്നും പാകിസ്താനിലെ പ്രശസ്തമായ കര്‍താര്‍പുര്‍ സാഹിബ് ഗുരുദ്വാരയിലേക്ക് പാത പണിയണമെന്ന് സിഖ് വിശ്വാസികളുടെ വര്‍ഷങ്ങളായുള്ള ആവശ്യമായിരുന്നു. ഗുരുനാനാക്ക് 18 വര്‍ഷത്തോളം ചിലവഴിച്ചെന്ന് കരുതപ്പെടുന്ന സ്ഥലമാണ് പാക് പഞ്ചാബ് പ്രവിശ്യയിലെ ലാഹോറില്‍ നിന്ന് 120 കിലോമീറ്റര്‍ ദൂരത്തായി സ്ഥിതി ചെയ്യുന്ന ഈ ഗുരുദ്വാര.

അമൃത്സറിലെ സുവര്‍ണ ക്ഷേത്രം കഴിഞ്ഞാല്‍ ഇന്ത്യയിലെ രണ്ടരക്കോടിയോളം വരുന്ന സിഖുമതവിശ്വാസികളുടെ പ്രധാന തീര്‍ത്ഥാടന കേന്ദ്രമാണ് കര്‍താര്‍പൂര്‍ സാഹിബ് ഗുരുദ്വാര.

ഡൂൾന്യൂസ് യൂട്യൂബ് ചാനൽ സബ്സ്ക്രൈബ് ചെയ്യാനായി ഇവിടെ ക്ലിക്ക് ചെയ്യൂ