അവനെന്നെ വാതുവെപ്പുകാരന്‍ എന്ന് വിളിച്ചുകൊണ്ടിരുന്നു; ഗംഭീറിനെതിരെ ശ്രീശാന്ത്

മുന്‍ ഇന്ത്യന്‍ താരങ്ങളായ ഗൗതം ഗംഭീറും എസ്. ശ്രീശാന്തും തമ്മിലുള്ള വാഗ്വാദങ്ങളാണ് ക്രിക്കറ്റ് ലോകത്ത് ചര്‍ച്ചയായത്. ലെജന്‍ഡ്‌സ് ലീഗ് ക്രിക്കറ്റിലെ ഗുജറാത്ത് ജയന്റ്‌സും ഇന്ത്യ ക്യാപ്പിറ്റല്‍സും തമ്മിലുള്ള മത്സരത്തിനിടെയാണ് ഇരുവരും തമ്മില്‍ തര്‍ക്കമുണ്ടായത്.

ഗംഭീര്‍ തനിക്കെതിരെ മോശം പദപ്രയോഗം നടത്തിയെന്ന് ശ്രീശാന്ത് മത്സര ശേഷം പറഞ്ഞിരുന്നു. ഗംഭീര്‍ തന്നെ വിളിച്ചതെന്താണെന്ന് ഇന്നല്ലെങ്കില്‍ നാളെ ആരാധകരെ അറിയിക്കുമെന്നും ശ്രീശാന്ത് പറഞ്ഞിരുന്നു.

ഇപ്പോള്‍ ഗംഭീര്‍ തന്നെ വിളിച്ചതെന്തെന്ന് പറയുകയാണ് ശ്രീശാന്ത്. പിച്ചില്‍ വെച്ച് വാതുവെപ്പുകാരന്‍ (ഫിക്‌സര്‍) എന്ന് നിരന്തരം വിളിക്കുകയായിരുന്നു എന്നാണ് ശ്രീശാന്ത് പറയുന്നു. ലൈവില്‍ വന്നാണ് താരം ഇക്കാര്യം പറഞ്ഞത്.