പാളയം പ്രദീപിന്റെ നിയമനം: രമ്യ ഹരിദാസിനെതിരെ സ്പീക്കറും കോൺഗ്രസ് നേതൃത്വവും

തിരുവനന്തപുരം: പാർട്ടി സസ്പെൻഡ് ചെയ്ത പാളയം പ്രദീപിനെ പേഴ്സണൽ സ്റ്റാഫിൽ ഉൾപ്പെടുത്താൻ രമ്യ ഹരിദാസ് എം.എൽ.എ നിയമസഭാ സെക്രട്ടറിക്ക് കത്ത് നൽകിയ നടപടിയിൽ സ്പീക്കർക്കും കോൺഗ്രസ് നേതൃത്വത്തിനും കടുത്ത അതൃപ്തി.

ഇത്തരമൊരു കത്ത് തനിക്കോ ഓഫീസിനോ ലഭിച്ചിട്ടില്ലെന്ന് വ്യക്തമാക്കിയ സ്പീക്കർ, നിയമസഭയെ രാഷ്ട്രീയ വിവാദങ്ങളിലേക്ക് വലിച്ചിഴക്കാൻ അനുവദിക്കില്ലെന്നും കാര്യങ്ങൾ നിയമപരമായി മാത്രമേ മുന്നോട്ടുപോകൂ എന്നും വ്യക്തമാക്കി. ഇക്കാര്യം രമ്യ ഹരിദാസിനെ അറിയിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.

‘ഇതുപോലൊരു കത്ത് എനിക്ക് കിട്ടിയിട്ടില്ല, എന്റെ ഓഫീസിനും കിട്ടിയിട്ടില്ല. വിവാദങ്ങളിൽ ഒരിക്കലും സ്‌പീക്കറുടെ ഓഫീസിനെ കൊണ്ടുവരിക സാധ്യമല്ല. വേണ്ടവിധം നീതിന്യായം അനുസരിച്ച് കാര്യങ്ങൾ കൊണ്ടുപോകും.’ അദ്ദേഹം പറഞ്ഞു.

എം.എൽ.എയുടെ നീക്കത്തിനെതിരെ കോൺഗ്രസ് നേതൃത്വത്തിനും എതിർപ്പുണ്ട്. വിഷയം പരസ്യമാക്കി കത്ത് നൽകിയത് അഭികാമ്യമായില്ലെന്ന് കെ.പി.സി.സി പ്രസിഡന്റ് സണ്ണി ജോസഫ് പ്രതികരിച്ചു.

എം.എൽ.എയോ എം.പിയോ ആരായാലും പാർട്ടി അച്ചടക്കം പാലിക്കണമെന്നും, സസ്പെൻഡ് ചെയ്യപ്പെട്ടവർ പാർട്ടിക്ക് പുറത്തുതന്നെ നിൽക്കണമെന്നും മന്ത്രി കെ. മുരളീധരൻ മാധ്യമങ്ങളോട് പറഞ്ഞു. രമ്യ ഹരിദാസിനെ പാർട്ടിയിൽ നിന്ന് പുറത്താക്കണമെന്ന് കോഴിക്കോട് ഡി.സി.സി ജനറൽ സെക്രട്ടറി ഷാജിർ അറഫാത്ത് ആവശ്യപ്പെട്ടു.

ചിറയിൻകീഴ് കയ്യാങ്കളിയുമായി ബന്ധപ്പെട്ട് എം.എം. ഹസന്റെ നേതൃത്വത്തിലുള്ള പാർട്ടി അന്വേഷണ സമിതിയുമായി സഹകരിക്കാൻ രമ്യ ഹരിദാസും പാളയം പ്രദീപും ഇതുവരെ തയ്യാറായിട്ടില്ല.

മറ്റുള്ളവരെല്ലാം കമ്മീഷന് മുന്നിൽ ഹാജരായി മൊഴി നൽകിയിട്ടും രമ്യ മാറിനിൽക്കുന്നത് കാരണം കെ.പി.സി.സിക്ക് അന്തിമ റിപ്പോർട്ട് സമർപ്പിക്കാനായിട്ടില്ല. അന്വേഷണ റിപ്പോർട്ട് ലഭിച്ച ശേഷമേ രമ്യയ്ക്കെതിരായ തുടർനടപടികളിൽ അന്തിമ തീരുമാനം ഉണ്ടാകൂ.

Content Highlight: Speaker and Congress leadership against Ramya Haridas over Palayam Pradeep’s appointment.