ടെസ്റ്റ് ഫോര്മാറ്റില് 3,000 റണ്സ് പൂര്ത്തിയാക്കി ഇന്ത്യന് നായകന് ശുഭ്മന് ഗില്. ഇന്ത്യയുടെ ശ്രീലങ്കന് പര്യടനത്തിലെ രണ്ടാം മത്സരത്തിലാണ് ഗില് തന്റെ കരിയറിലെ മറ്റൊരു നാഴികക്കല്ല് താണ്ടിയത്.
കൊളംബോയിലെ സിംഹളീസ് സ്പോര്ട്സ് ക്ലബ്ബ് ക്രിക്കറ്റ് ഗ്രൗണ്ടില് നടക്കുന്ന മത്സരത്തില് ഏഴ് റണ്സ് കൂട്ടിച്ചേര്ത്തതോടെയാണ് ഗില് 3,000 എന്ന മാജിക്കല് നമ്പറിലെത്തിയത്.
ഒരു മികച്ച ടെസ്റ്റ് ബാറ്റര് എന്ന നിലയില് ഗില്ലിന്റെ വളര്ച്ച അടയാളപ്പെടുത്തുന്നതുകൂടിയാണ് ഈ നേട്ടം. ടെസ്റ്റില് ആയിരം റണ്സിലെത്താന് 36 ഇന്നിങ്സുകള് കളിച്ച ഗില്ലിന് അടുത്ത ആയിരം റണ്സിലെത്താന് (1,001 – 2,000) വേണ്ടി വന്നത് 24 ഇന്നിങ്സുകള് മാത്രമാണ്. തന്റെ 60ാം ഇന്നിങ്സിലാണ് ഗില് 2,000 ടെസ്റ്റ് റണ്സ് പൂര്ത്തിയാക്കിയത്.
ശുഭ്മന് ഗിൽ. Photo: BCCI/x.com
ശേഷം വെറും 17 ഇന്നിങ്സുകളില് അടുത്ത ആയിരം റണ്സും (2,001 – 3,000) ഗില് കണ്ടെത്തി. 43.52 ശരാശരിയില് ബാറ്റ് വീശുന്ന താരത്തിന് അന്താരാഷ്ട്ര റെഡ് ബോള് ഫോര്മാറ്റില് കീഴടക്കാന് ഇനിയും ഉയരങ്ങള് ബാക്കിയാണ്.
അതേസമയം, രണ്ടാം ടെസ്റ്റിന്റെ ആദ്യ ഇന്നിങ്സില് അര്ധ സെഞ്ച്വറിയുമായാണ് ഗില് ബാറ്റിങ് തുടരുന്നത്. മത്സരത്തില് 50 ഓവര് പിന്നിടുമ്പോള് രണ്ട് വിക്കറ്റ് നഷ്ടത്തില് 184 എന്ന നിലയിലാണ് ഇന്ത്യ.
Test FIFTY No. 9⃣ for Shubman Gill! 👏👏
The #TeamIndia captain is playing a fine knock here in Colombo! 👌 👌
