![?php echo $post['title']; ?>](https://assets.doolnews.com/w/900x473/2024/10/navi-pillai.jpg)
Nobel Peace Price 2026: ഗസയില്‍ ഫലസ്തീനികള്‍ക്കെതിരെ ഇസ്രഈല്‍ വംശഹത്യ നടത്തിയെന്ന് കണ്ടെത്തിയ ഐക്യരാഷ്ട്രസഭാ അന്വേഷണത്തിന് നേതൃത്വം നല്‍കിയത് ദക്ഷിണാഫ്രിക്കന്‍ നിയമവിദഗ്ധ നവനീതം നവി പിള്ളയാണ്. നവി പിള്ളക്കാണ് 2026-ലെ സമാധാനത്തിനുള്ള നൊബേല്‍ പുരസ്‌കാരം. ദക്ഷിണാഫ്രിക്കയിലെ വര്‍ണ വിവേചനത്തിനെതിരായ പോരാട്ടത്തില്‍ പങ്കാളിയായിരുന്നു നവി പിള്ള. യു.എന്നുമായി ബന്ധപ്പെട്ട നീണ്ടകാലത്തെ ഔദ്യോഗിക ചുമതലകളും അവര്‍ നിറവേറ്റിയിരുന്നു.
ഒക്ടോബര് ഒമ്പതിനാണ് സമാധാന നൊബേല്‍ പുരസ്‌കാരം പ്രഖ്യാപിച്ചത്. ‘സമാധാനവും അന്താരാഷ്ട്ര നിയമവും പ്രോത്സാഹിപ്പിക്കുന്നതിനുള്ള പ്രവര്‍ത്തനങ്ങള്‍ക്കാണ്’ 85-കാരിയായ നവി പിള്ളയെ ഇത്തവണത്തെ നൊബേല്‍ പുരസ്താരത്തിനായി തെരഞ്ഞെടുത്തതെന്ന് നോര്‍വീജിയന്‍ നൊബേല്‍ കമ്മിറ്റി പ്രസ്താവനയില്‍ അറിയിച്ചു.
അസാധാരണമായ ധൈര്യത്തോടും സത്യസന്ധതയോടും കൂടി കൂടുതല്‍ സമഗ്രമായ ആഗോള നിയമവ്യവസ്ഥയിലേക്ക് വഴിയൊരുക്കിയ വ്യക്തിക്കാണ് ഈ പുരസ്‌കാരം നല്‍കുന്നതെന്നും കമ്മിറ്റി വ്യക്തമാക്കി. യുദ്ധക്കുറ്റങ്ങള്‍, മനുഷ്യരാശിക്കെതിരായ കുറ്റകൃത്യങ്ങള്‍, വംശഹത്യ എന്നിവയില്‍ വിചാരണയും ശിക്ഷാ നടപടികളും ഉറപ്പാക്കുന്നതില്‍ അവര്‍ നിര്‍ണായക പങ്ക് വഹിച്ചിട്ടുണ്ടെന്നും കമ്മിറ്റി ചൂണ്ടിക്കാട്ടി.
‘വര്‍ണ്ണവിവേചനത്തിനെതിരെ നിലകൊണ്ട നെല്‍സണ്‍ മണ്ടേലയെയും മറ്റുള്ളവരെയും സംരക്ഷിക്കുന്നതിനായി നടത്തിയ ആദ്യകാല പ്രവര്‍ത്തനങ്ങള്‍ മുതല്‍, നമ്മുടെ കാലഘട്ടത്തിലെ സുപ്രധാനമായ അന്താരാഷ്ട്ര കോടതി കേസുകളില്‍ ജഡ്ജിയായി സേവനമനുഷ്ഠിച്ചത് വരെയുള്ള പ്രവര്‍ത്തനങ്ങളില്‍ ഒരു പൊതുവായ ഇഴയടുപ്പം കാണാം,’ എന്ന് നൊബേല്‍ കമ്മിറ്റി അഭിപ്രായപ്പെട്ടു.
സ്വതന്ത്ര അന്താരാഷ്ട്ര അന്വേഷണ കമ്മീഷന്‍
കിഴക്കന്‍ ജറുസലേം ഉള്‍പ്പെടെയുള്ള അധിനിവേശ ഫലസ്തീന്‍ പ്രദേശങ്ങളിലെ സ്ഥിതിഗതികള്‍ പരിശോധിക്കുന്നതിനായി ഐക്യരാഷ്ട്രസഭയുടെ മനുഷ്യാവകാശ കൗണ്‍സില്‍ രൂപീകരിച്ച ‘സ്വതന്ത്ര അന്താരാഷ്ട്ര അന്വേഷണ കമ്മീഷന്റെ’ അധ്യക്ഷയായി 2021 മുതല്‍ 2025 നവംബര്‍ വരെ നവി പിള്ള പ്രവര്‍ത്തിച്ചു. എല്ലാ പക്ഷങ്ങളില്‍ നിന്നുമുണ്ടായ നിയമലംഘനങ്ങള്‍ അന്വേഷിക്കുകയും ഭാവിയിലെ നിയമനടപടികള്‍ക്ക് ഉപയോഗിക്കാവുന്ന തെളിവുകള്‍ ശേഖരിക്കുകയും ചെയ്യുക എന്നതായിരുന്നു ഈ കമ്മീഷന്റെ ദൗത്യം.
2023 ഒക്ടോബര് ഏഴിന് ശേഷമുള്ള കമ്മീഷന്റെ ആദ്യ പ്രധാന റിപ്പോര്‍ട്ട് 2024 ജൂണില്‍ പുറത്തുവന്നു. ഗസയിലെ സൈനിക നടപടികള്‍ക്കിടെയുണ്ടായ യുദ്ധക്കുറ്റങ്ങള്‍ക്കും മനുഷ്യരാശിക്കെതിരായ കുറ്റകൃത്യങ്ങള്‍ക്കും ഇസ്രഈല്‍ അധികൃതര്‍ ഉത്തരവാദികളാണെന്ന് ഈ റിപ്പോര്‍ട്ട് കണ്ടെത്തി. ഇസ്രഈലിലെ ആക്രമണങ്ങള്‍ക്കിടെ ഹമാസും മറ്റ് ഫലസ്തീന്‍ സായുധ ഗ്രൂപ്പുകളും യുദ്ധക്കുറ്റങ്ങള്‍ ചെയ്തതായും റിപ്പോര്‍ട്ട് പറയുന്നു.
‘കുറ്റകൃത്യങ്ങള്‍ ചെയ്തവരെല്ലാം അതിന് ഉത്തരവാദികളാക്കപ്പെടേണ്ടത് അനിവാര്യമാണ്,’ എന്ന് പിള്ള അന്ന് അഭിപ്രായപ്പെട്ടതായി അനദോളു വാര്‍ത്താ ഏജന്‍സി റിപ്പോര്‍ട്ട് ചെയ്യുന്നു. അക്രമത്തിന്റെയും തിരിച്ചടിയുടെയും ആവര്‍ത്തനങ്ങള്‍ക്ക് അറുതി വരുത്താനുള്ള ഏക മാര്‍ഗ്ഗം അന്താരാഷ്ട്ര നിയമങ്ങള്‍ പാലിക്കുക എന്നത് മാത്രമാണെന്നും അവര്‍ വാദിച്ചിരുന്നു
ആരോഗ്യ കേന്ദ്രങ്ങളെ ലക്ഷ്യമിട്ടുള്ള ആക്രമണങ്ങള്‍ക്കെതിരെ
ആശുപത്രികള്‍ക്ക് നേരെയുള്ള ഇസ്രഈല്‍ ആക്രമണങ്ങളെക്കുറിച്ചും ഗസയിലെ ആരോഗ്യസംവിധാനത്തിന്റെ വ്യാപകമായ തകര്‍ച്ചയെക്കുറിച്ചും കമ്മീഷന്‍ അന്വേഷണം നടത്തിയിരുന്നു. ചികിത്സാ കേന്ദ്രങ്ങളെയും ആരോഗ്യപ്രവര്‍ത്തകരെയും മനപൂര്‍വം ആക്രമിച്ചതിന് കമ്മീഷന്‍ ഇസ്രഈല്‍ സേനയെ കുറ്റപ്പെടുത്തുകയും ചെയ്തിരുന്നു. 2024 ഒക്ടോബറിലായിരുന്നു ഇത്.
‘ആരോഗ്യസംവിധാനങ്ങളെ ലക്ഷ്യമിടുന്നതിലൂടെ, ആരോഗ്യം എന്ന അവകാശത്തെത്തന്നെയാണ് ഇസ്രഈല്‍ ലക്ഷ്യമിടുന്നത്,’ എന്ന് അന്ന് നവി പിള്ള പറഞ്ഞിരുന്നു. ഈ നാശം ഗാസയിലെ സാധാരണ ജനങ്ങളില്‍ ദീര്‍ഘകാല പ്രത്യാഘാതങ്ങള്‍ ഉണ്ടാക്കുമെന്നും അവര്‍ മുന്നറിയിപ്പ് നല്‍കിയിരുന്നു.
‘പ്രത്യേകിച്ച് കുട്ടികളാണ് ഈ ആക്രമണങ്ങളുടെ കനത്ത ആഘാതം നേരിട്ടത്. ആരോഗ്യസംവിധാനത്തിന്റെ തകര്‍ച്ച മൂലം അവര്‍ നേരിട്ടും അല്ലാതെയും ദുരിതമനുഭവിക്കുന്നു,’ എന്നും അവര്‍ കൂട്ടിച്ചേര്‍ത്തിരുന്നു.
1948-ലെ വംശഹത്യ തടയല്‍ ഉടമ്പടി പ്രകാരം വംശഹത്യയായി നിര്‍വചിച്ചിട്ടുള്ള അഞ്ച് പ്രവൃത്തികളില്‍ നാലെണ്ണവും ഇസ്രായേല്‍ അധികൃതരും സുരക്ഷാ സേനയും ചെയ്തിട്ടുണ്ടെന്ന സുപ്രധാന നിഗമനം 2025 സെപ്റ്റംബറില്‍ കമ്മീഷന്‍ പുറപ്പെടുവിച്ചു. ഇസ്രഈല്‍ പ്രധാനമന്ത്രി ബെഞ്ചമിന്‍ നെതന്യാഹു, പ്രസിഡന്റ് ഐസക് ഹെര്‍സോഗ്, മുന്‍ പ്രതിരോധ മന്ത്രി യോവ് ഗാലന്റ് എന്നിവര്‍ വംശഹത്യയ്ക്ക് പ്രേരിപ്പിച്ചുവെന്നും കമ്മീഷന്‍ വിലയിരുത്തിയിരുന്നു. ഇതിന് അവരെ ശിക്ഷിക്കുന്നതില്‍ ഇസ്രഈല്‍ അധികൃതര്‍ പരാജയപ്പെട്ടുവെന്നും കമ്മീഷന്‍ ചൂണ്ടിക്കാട്ടിയിരുന്നു.
‘ഗാസയിലെ ഫലസ്തീനികളെ നശിപ്പിക്കാനുള്ള ഉദ്ദേശ്യം’ തെളിവുകളില്‍ നിന്ന് വ്യക്തമാണെന്നും, ഇതിന്റെ ഉത്തരവാദിത്തം ഉന്നതതലത്തിലുള്ള ഇസ്രഈല്‍ അധികൃതര്‍ക്കാണെന്നും പിള്ള പറഞ്ഞതായി അനഡോളു ഏജന്‍സി റിപ്പോര്‍ട്ട് ചെയ്തു. .
ഇസ്രഈലിന് ആയുധങ്ങള്‍ നല്‍കുന്നതോ രാഷ്ട്രീയ പിന്തുണ നല്‍കുന്നതോ തുടരുന്ന സര്‍ക്കാരുകളെയും പിള്ള വിമര്‍ശിച്ചിരുന്നു.
ഔദ്യോഗിക ജീവിതം
2008 സെപ്റ്റംബര്‍ മുതല്‍ 2014 ഓഗസ്റ്റ് വരെ യു.എന്‍ മനുഷ്യാവകാശ വിഭാഗം മേധാവിയായി നവി പിള്ള സേവനമനുഷ്ഠിച്ചിരുന്നു. 50 വര്‍ഷത്തിലേറെ നീണ്ടുനില്‍ക്കുന്നതാണ് അവരുടെ ഔദ്യോഗിക ജീവിതം. സംഘര്‍ഷ മേഖലകളിലെ സാധാരണക്കാരെ സംരക്ഷിക്കുന്ന പ്രവര്‍ത്തനങ്ങളില്‍ അവര്‍ പങ്കാളിയായായിരുന്നതായി നൊബേല്‍ പുരസ്‌കാര പ്രഖ്യാപനത്തിന് ശേഷം ഐക്യ രാഷ്ട്ര സഭ പങ്കുവെച്ച വാര്‍ത്താക്കുറിപ്പില്‍ പറയുന്നു.
റുവാണ്ടയ്ക്കായുള്ള അന്താരാഷ്ട്ര ക്രിമിനല്‍ ട്രൈബ്യൂണലിലും നവി പിള്ള പ്രവര്‍ത്തിച്ചു. ഹേഗിലെ അന്താരാഷ്ട്ര ക്രിമിനല്‍ കോടതിയില്‍ ജഡ്ജിയായി സേവനമനുഷ്ഠിച്ചിട്ടുണ്ട്. യു.എന്നിന്റെ പരമോന്നത കോടതിയായ അന്താരാഷ്ട്ര നീതിന്യായ കോടതിയില്‍ അഡ്ഹോക്ക് ജഡ്ജിയായും അവര്‍ പ്രവര്‍ത്തിച്ചിട്ടുണ്ട്.
അന്താരാഷ്ട്ര നിയമത്തിന്റെയും മനുഷ്യാവകാശങ്ങളുടെയും വക്താവും നീതിയുടെ ഉറച്ചതും സ്വതന്ത്രവുമായ ശബ്ദവുമാണ് നവി പിള്ളയെന്ന് യു.എന്‍ സെക്രട്ടറി ജനറല്‍ അന്റോണിയോ ഗുട്ടെറസ് പ്രതികരിച്ചു. ‘ബലപ്രയോഗത്തിന്റെ നിയമത്തേക്കാള്‍ നിയമത്തിന്റെ ശക്തിയാണ് വിജയിക്കേണ്ടതെന്നും, അനീതിക്കെതിരായ ഏറ്റവും ഉറപ്പായ സംരക്ഷണം മനുഷ്യാവകാശ സംരക്ഷണമാണെന്നും അവര്‍ തെളിയിച്ചിട്ടുണ്ട്,’ എന്നും നവി പിള്ളയെക്കുറിച്ച് ഗുട്ടെറസ് പറഞ്ഞു.
വര്‍ണ്ണവിവേചന വിരുദ്ധ പോരാട്ടത്തിലെ അനുഭവങ്ങള്‍ അന്താരാഷ്ട്ര ഐക്യദാര്‍ഢ്യത്തിലുള്ള അവരുടെ വിശ്വാസത്തെ രൂപപ്പെടുത്തിയെന്ന് യു.എന്‍ വാര്‍ത്താക്കുറിപ്പില്‍ പറഞ്ഞു. റുവാണ്ടയിലെ 1994-ലെ വംശഹത്യയ്ക്ക് ഉത്തരവാദികളായവരെ വിചാരണ ചെയ്ത ഐസിടിആറില്‍ ജഡ്ജിയും പ്രസിഡന്റുമായി പ്രവര്‍ത്തിക്കുമ്പോഴും അവര്‍ ആ വിശ്വാസം മുറുകെപ്പിടിച്ചു.
അവിടെ ചെലവഴിച്ച എട്ട് വര്‍ഷത്തിനിടയില്‍, വംശഹത്യയ്ക്കും ലിംഗാധിഷ്ഠിത അതിക്രമങ്ങള്‍ക്കുമെതിരായ പോരാട്ടത്തില്‍ സുപ്രധാനമായ നിയമപരമായ കീഴ് വഴക്കങ്ങള്‍ സൃഷ്ടിക്കാന്‍ അവര്‍ സഹായിച്ചുവെന്നും യു.എന്നിന്റെ പ്രസ്താവനയില്‍ പറയുന്നു.
ദക്ഷിണാഫ്രിക്കയിലെ ജീവിതം
സ്വന്തം നാടായ ദക്ഷിണാഫ്രിക്കയിലെ വര്‍ണ്ണവിവേചനത്തിനെതിരായ പോരാട്ടത്തില്‍ പങ്കാളിയായിരുന്നു നവി പിള്ള. 1941-ല്‍ ദക്ഷിണാഫ്രിക്കയിലെ ഒരു തമിഴ്-ഇന്ത്യന്‍ കുടുംബത്തിലാണ് നവനിതം നവി പിള്ള ജനിച്ചത്.
ആ രാജ്യത്ത് നിയമ പ്രാക്ടീസ് ആരംഭിച്ച ആദ്യത്തെ വെള്ളക്കാരിയല്ലാത്ത വനിതയായിരുന്നു അവര്‍. ഒരു അഭിഭാഷകയെന്ന നിലയില്‍, വര്‍ണ്ണവിവേചന വിരുദ്ധ പ്രവര്‍ത്തകര്‍ക്ക് വേണ്ടി വാദിച്ചു. കുപ്രസിദ്ധമായ റോബന്‍ ഐലന്‍ഡിലെ തടവുകാര്‍ക്ക് നിര്‍ണ്ണായക അവകാശങ്ങള്‍ ഉറപ്പാക്കാന്‍ സഹായിക്കുകയും ചെയ്തു.
എന്റെ ജീവിതകാലത്തിനുള്ളില്‍ വര്‍ണ്ണവിവേചനം അവസാനിക്കുമെന്ന് ഞാന്‍ കരുതിയിരുന്നില്ലെന്നും എന്നാല്‍ പിന്നീട് അത് സംഭവിച്ചെന്നും 2025 ഒക്ടോബറില്‍ ജനീവയില്‍ യുഎന്‍ ന്യൂസിന് നല്‍കിയ അഭിമുഖത്തില്‍ നവി പിള്ള പറഞ്ഞിരുന്നു. വര്‍ണവിവേചനം ഇല്ലാതാക്കാന്‍ കഴിഞ്ഞെങ്കില്‍ മികച്ചൊരു മനുഷ്യാവകാശ സംരക്ഷണ സംവിധാനം കെട്ടിപ്പടുക്കാന്‍ നമുക്ക് കഴിയുമെന്നും അവര്‍ അന്ന് പ്രത്യാശ പ്രകടിപ്പിച്ചിരുന്നു.
Content Highlight: Nobel Price for Peace 2026- Profile of Navi Pillai
