ലോകത്തിലെ ആദ്യ താരം; കളിക്കാതെ മൂന്ന് ക്ലബ്ബുകളുടെ ഹൃദയത്തിൽ മെസി

അർജന്റീനയുടെ നീലക്കുപ്പായത്തിലെ നീണ്ട 21 വർഷത്തെ ഐതിഹാസിക യാത്ര അവിസ്മരണനീയമായി ഇതിഹാസ താരം ലയണൽ മെസി പടിയിറങ്ങിയിരുന്നു. ആഫ്രിക്കൻ രാജ്യമായ ബെനിനെതിരെയായിരുന്നു മെസിയുടെ അവസാന മത്സരം. എതിരില്ലാത്ത മൂന്ന് ഗോളുകൾക്ക് അർജന്റീന വിജയിച്ച മത്സരത്തിൽ രണ്ട് അസിസ്റ്റുകളും ഒരു ഗോളും നേടിയാണ് മെസി തിളങ്ങിയത്.

വിരമിക്കൽ പ്രഖ്യാപിച്ചതിന് ശേഷം മെസിക്ക് പുതിയൊരു ബഹുമതി കൂടി ലഭിച്ചിരിക്കുകയാണ്. മൂന്ന് ക്ലബ്ബുകളുടെ മ്യൂസിയത്തിൽ മെസിയുടെ ഇതിഹാസ ജേഴ്സി ഇടം നേടി. അർജന്റീന ക്ലബ്ബായ റിവർപ്ലേറ്റിന്റെ മ്യൂസിയത്തിലാണ് അവസാനമായി മെസിയുടെ ജേഴ്‌സി ഇടം നേടിയത്.

റിവർ പ്ലേറ്റിന് പുറമെ ബയേൺ മ്യൂണിക്, അർജന്റീനോസ് ജൂനിയേഴ്സ് എന്നീ ക്ലബ്ബുകളുടെ മ്യൂസിയങ്ങളിൽ മെസിയുടെ ജേഴ്സിയുണ്ട്. മെസി ഒരിക്കൽ പോലും ഈ ടീമുകൾക്ക് വേണ്ടി കളിച്ചിട്ടില്ലെന്നതും എടുത്തുപറയണം. ഈ നേട്ടം കൈപ്പിടിയിലാക്കുന്ന ചരിത്രത്തിലെ തന്നെ ആദ്യ താരമാണ് മെസി.

2012ൽ ജർമൻ ഇതിഹാസം ഗെർഡ് മുള്ളറുടെ ഗോൾ സ്‌കോറിങ് റെക്കോഡ് തകർത്തതിന് പിന്നാലെയായിരുന്നു മെസിയുടെ ജേഴ്സി ബയേൺ മ്യൂണിക് മ്യൂസിയത്തിൽ ഇടം നേടിയത്.

ഒരു കലണ്ടർ ഇയറിൽ ഏറ്റവും കൂടുതൽ ഗോൾ നേടുന്ന താരമെന്ന റെക്കോഡ് സ്വന്തമാക്കിയതിന് പിന്നാലെ ഗെർഡ് മുള്ളറുടെ കുടുംബത്തിന് മെസി ബാഴ്സലോണയുടെ പത്താം നമ്പർ ജേഴ്സി സമ്മാനമായി നൽകുകയായിരുന്നു. ആ സീസണിൽ 91 ഗോളുകൾ നേടിയാണ് മെസി തിളങ്ങിയത്.

അർജന്റീനയിലെ മെസിയുടെ തുടക്ക കാലത്തെയും ഓർമകളെയും ആദരിക്കുന്ന ഒരു അപൂർവ്വ ജേഴ്‌സിയാണ് അർജന്റീനോസ് ജൂനിയേഴ്സ് ക്ലബ്ബിൽ ഇടം നേടിയിട്ടുള്ളത്. അർജന്റീനക്കൊപ്പമുള്ള മെസിയുടെ വിടവാങ്ങൽ മത്സരത്തിൽ നടന്ന ചടങ്ങിൽ നൽകിയ മെസിക്ക് അർജന്റീന ടീമിന്റെ ജേഴ്സിയാണ് റിവർപ്ലേറ്റ് ക്ലബ്ബിന്റെ മ്യൂസിയത്തിലുള്ളത്.

2028 കോപ്പ അമേരിക്കയിൽ അർജന്റീനക്കായി മെസി കളത്തിലിറങ്ങുമെന്ന് പ്രതീക്ഷിച്ചിരുന്നെങ്കിലും ആരാധകരെ ഒന്നടങ്കം കണ്ണീരിലാഴ്ത്തിയായിരുന്നു ഓഗസ്റ്റ് 31ന് അർജന്റൈൻ ഇതിഹാസത്തിന്റെ പടിയിറക്കം. എന്നാൽ ജന്മനാടിനായി അവസാന പോരാട്ടത്തിനായി വീണ്ടും മെസി കളത്തിലിറങ്ങുകയായിരുന്നു.

ഫുട്ബോളിൽ സ്വന്തമാക്കാനാവുന്ന നേട്ടങ്ങളെല്ലാം കൈവരിച്ചാണ് മെസിയുടെ മടക്കം. ലോകകപ്പ്‌, കോപ്പ അമേരിക്ക, ഫൈനൽസീമ, അണ്ടർ 20 ലോകകപ്പ്, ഒളിമ്പിക്സ് ഗോൾഡ് മെഡൽ തുടങ്ങിയ ഒട്ടനവധി കിരീടങ്ങൾ അർജന്റീനക്കൊപ്പം സ്വന്തമാക്കിയാണ് മെസി കളമൊഴിഞ്ഞത്.

Content Highlight: Lionel Messi set a unique record in football history