തിരുവനന്തപുരം: കോണ്‍ഗ്രസിന്റെ ഉടമസ്ഥതയിലുള്ള തിരുവനന്തപുരം നെയ്യാറിലെ രാജീവ് ഗാന്ധി ഇന്‍സ്റ്റിറ്റ്യൂട്ടില്‍ ബി.ജെ.പി പഠന ശിബിരം സംഘടിപ്പിച്ച സംഭവത്തെ നിസ്സാരവത്കരിച്ച് കെ.പി.സി.സി അധ്യക്ഷന്‍ സണ്ണി ജോസഫ്.

‘അത് വാടകയ്ക്ക് നല്‍കിയതല്ലേ’ എന്നായിരുന്നു മാധ്യമപ്രവര്‍ത്തകരുടെ ചോദ്യങ്ങള്‍ക്ക് ഇന്‍സ്റ്റിറ്റ്യൂട്ട് ചെയര്‍മാന്‍ കൂടിയായ സണ്ണി ജോസഫിന്റെ മറുപടി. ഒരു കോണ്‍ഗ്രസ് സ്ഥാപനം മറ്റൊരു രാഷ്ട്രീയ പാര്‍ട്ടിക്ക്, പ്രത്യേകിച്ച് ബി.ജെ.പിക്ക് വിട്ടുനല്‍കിയത് ശരിയാണോ എന്ന ചോദ്യത്തിന് അദ്ദേഹം മറുപടി നല്‍കാന്‍ തയ്യാറായില്ല.

ജൂണ്‍ 27, 28 ദിവസങ്ങളിലാണ് ബി.ജെ.പി കാട്ടാക്കട മണ്ഡലം കമ്മിറ്റിയുടെ നേതൃത്വത്തില്‍ ഇന്‍സ്റ്റിറ്റ്യൂട്ടിലെ ഹാളില്‍ പഠന ശിബിരം നടന്നത്. ബി.ജെ.പി സംസ്ഥാന വൈസ് പ്രസിഡന്റും മുന്‍ ഐ.പി.എസ് ഉദ്യോഗസ്ഥയുമായ ആര്‍. ശ്രീലേഖ അടക്കമുള്ള പ്രമുഖ നേതാക്കള്‍ ഈ ശിബിരത്തില്‍ പങ്കെടുത്തിരുന്നു

രാഷ്ട്രീയ വ്യത്യാസമില്ലാതെ വിവിധ സംഘടനകള്‍ക്ക് ഹാള്‍ വാടകയ്ക്ക് നല്‍കാറുണ്ടെന്നാണ് ഇന്‍സ്റ്റിറ്റ്യൂട്ട് അധികൃതരുടെ വിശദീകരണമെങ്കിലും, പാര്‍ട്ടി നേതൃത്വത്തിന്റെ അനുമതിയില്ലാതെ ഇത്തരം തീരുമാനങ്ങള്‍ എടുത്തതില്‍ കോണ്‍ഗ്രസ് നേതാക്കളില്‍ അതൃപ്തിയുണ്ട്.

സംഭവത്തില്‍ കെ.പി.സി.സി നേരത്തെ വിശദീകരണം ആവശ്യപ്പെട്ടിരുന്നു. ഇതിന് ശേഷമാണ് സംഭവത്തെ നിസ്സാരവത്കരിക്കുന്ന നിലപാട് കെ.പി.സി.സി അധ്യക്ഷന്‍ സ്വീകരിച്ചത് എന്നതും ശ്രദ്ധേയമാണ്.

അതേസമയം,സംസ്ഥാനത്ത് വൈദ്യുതി പ്രതിസന്ധി രൂക്ഷമെന്ന് വൈദ്യുതി മന്ത്രി കൂടിയായ സണ്ണി ജോസഫ് പറഞ്ഞു. മഴ കുറഞ്ഞത് കാരണം സംസ്ഥാനം നിലവില്‍ ഗുരുതരമായ വൈദ്യുതി പ്രതിസന്ധിയിലൂടെയാണ് കടന്നുപോകുന്നതെന്ന് അദ്ദേഹം വ്യക്തമാക്കി.

ഇന്ത്യയിലാകമാനം സമാനമായ പ്രതിസന്ധിയുണ്ടെന്നും, ഉയര്‍ന്ന വില നല്‍കി പുറത്തുനിന്ന് വൈദ്യുതി വാങ്ങാനാണ് സംസ്ഥാനം ശ്രമിക്കുന്നതെന്നും അദ്ദേഹം പറഞ്ഞു.

കഴിഞ്ഞ നാലഞ്ച് ദിവസങ്ങളിലായി സംസ്ഥാനത്ത് വൈദ്യുതി നിയന്ത്രണം ഏര്‍പ്പെടുത്തിയിട്ടുണ്ട്. വരും ദിവസങ്ങളില്‍ വൈദ്യുതി നിയന്ത്രണം വേണമോ എന്നത് കാലാവസ്ഥയെ ആശ്രയിച്ചിരിക്കുമെന്നും മന്ത്രി കൂട്ടിച്ചേര്‍ത്തു.

ഇതുമായി ബന്ധപ്പെട്ട കൂടുതല്‍ വിവരങ്ങള്‍ നിയമസഭയില്‍ അറിയിക്കുമെന്നും അദ്ദേഹം പറഞ്ഞു.

Content Highlight: KPCC President Sunny Joseph trivializes BJP camp at Rajiv Gandhi Institute