സ്‌ക്രീനില്‍ ട്രാന്‍സ്‌ജെന്‍ഡറുടെ ജീവിതം കാണുമ്പോള്‍ അസ്വസ്ഥത തോന്നുന്നുണ്ടെങ്കില്‍ പ്രശ്‌നം സിനിമയ്ക്കല്ല, കാണുന്നവര്‍ക്കാണ്: കാര്‍ത്തിക് സുബ്ബരാജ്

തമിഴ് പേജുകളില്‍ പ്രധാന ചര്‍ച്ച ഡൊറോത്തി എന്ന ചിത്രമാണ്. തമിഴിലെ പ്രൊമിസിങ് സംവിധായകരിലൊരാളായ കാര്‍ത്തിക് സുബ്ബരാജിന്റെ പത്താമത്തെ ചിത്രമാണ് ഡൊറോത്തി. സനന്ത്, റിഷികാന്ത്, കീര്‍ത്തി സുരേഷ് എന്നിവര്‍ പ്രധാനവേഷത്തിലെത്തിയ ചിത്രത്തെ തമിഴിലെ ചില പേജുകള്‍ വലിച്ചുകീറുകയാണ്.

LGBTQ കണ്ടന്റുള്ള ചിത്രം തമിഴ് സംസ്‌കാരത്തെ നശിപ്പിച്ചെന്ന് പറഞ്ഞാണ് പ്രധാനമായും സൈബര്‍ അറ്റാക്ക് നടത്തുന്നത്. ട്രാന്‍സ്‌ജെന്‍ഡര്‍ സമൂഹത്തെ കൃത്യമായി അടയാളപ്പെടുത്തിയ ചിത്രങ്ങളിലൊന്ന് കൂടിയാണ് ഡൊറോത്തി. ടൊറന്റോ ഇന്റര്‍നാഷണല്‍ ഫിലിം ഫെസ്റ്റിവലില്‍ പ്രീമിയര്‍ ചെയ്ത ചിത്രത്തിന് വലിയ സ്വീകരണമായിരുന്നു ലഭിച്ചത്. എന്നാല്‍ തമിഴ്‌നാട്ടില്‍ പലരെയും ഡൊറോത്തി അസ്വസ്ഥരാക്കി.

ചിത്രത്തിന് നേരെയുള്ള സൈബര്‍ അറ്റാക്കില്‍ പ്രതികരിക്കുകയാണ് സംവിധായകന്‍ കാര്‍ത്തിക് സുബ്ബരാജ്. സോഷ്യല്‍ മീഡിയയില്‍ ചിലര്‍ ഡൊറോത്തിയെ പ്രശംസിക്കുന്നുണ്ടെന്നും എന്നാല്‍ പലരും ശ്രദ്ധിക്കുന്നത് നെഗറ്റീവ് റിവ്യൂകള്‍ മാത്രമാണെന്ന് കാര്‍ത്തിക് പറഞ്ഞു. ചിത്രത്തിന്റെ പ്രസ് മീറ്റില്‍ സംസാരിക്കുകയായിരുന്നു അദ്ദേഹം.

‘സോഷ്യല്‍ മീഡിയ എന്ന് നിങ്ങളുദ്ദേശിച്ചത് ട്വിറ്ററല്ലേ? അത് വെറും ചെറിയ ലോകമാണ്. അതിന് പുറത്തുള്ള വലിയ ലോകമുണ്ടെന്ന് മനസിലാക്കൂ. അവിടെയൊക്കെ സിനിമ കണ്ടവര്‍ നല്ല അഭിപ്രായമാണ് പറയുന്നത്. ഏതെങ്കിലും നാലുപേര്‍ ഷെയര്‍ ചെയ്ത പോസ്റ്റിനെക്കുറിച്ച് മാത്രം ചോദിക്കല്ലേ. ഓണ്‍ലൈനില്‍ ചെറിയ വെറുപ്പ് ഷെയര്‍ ചെയ്യുന്നുണ്ട്.

ഒരു ട്രാന്‍സ്‌ജെന്‍ഡറുടെ ജീവിതം സിനിമയില്‍ കാണിക്കുമ്പോള്‍ ചിലര്‍ക്ക് പ്രശ്‌നമായി തോന്നുന്നുണ്ടെങ്കില്‍ അത് സിനിമയുടെ കുഴപ്പമല്ല, കാണുന്നവരുടെ കുഴപ്പമാണ്. അവരും സിനിമ കണ്ടോട്ടെ, അത്രയേ എനിക്ക് പറയാനുള്ളൂ. സിനിമ കണ്ടിട്ട് നമുക്ക് ചര്‍ച്ച ചെയ്യാം. അതിന് പകരം അവര്‍ കുറ്റം പറയുന്നത് കേട്ടിട്ട് തിരിച്ച് തര്‍ക്കിക്കാന്‍ നിന്നാല്‍ ശരിയാകില്ല,’ കാര്‍ത്തിക് സുബ്ബരാജ് പറയുന്നു.

1990കളില്‍ മധുരൈയില്‍ നടക്കുന്ന കഥയാണ് ഡൊറോത്തിയുടേത്. കാര്‍ത്തി, സുബ്ബു എന്നീ രണ്ട് സുഹൃത്തുക്കളിലൂടെയാണ് കഥ വികസിക്കുന്നത്. പാട്രിയാര്‍ക്കി, ട്രാന്‍സ്‌ജെന്‍ഡറുകളോട് സമൂഹം കാണിക്കുന്ന വെറുപ്പ് തുടങ്ങിയ വിഷയങ്ങള്‍ ശക്തമായി സംസാരിക്കുന്ന ഡൊറോത്തിക്ക് കേരളത്തില്‍ പോസിറ്റീവ് റിപ്പോര്‍ട്ടാണ് ലഭിക്കുന്നത്. ഇസൈജ്ഞാനി ഇളയരാജയുടെ സംഗീതവും ചിത്രത്തെ ഗംഭീരമാക്കുന്നുണ്ട്.

Content Highlight: Karthik Subbaraj reacts to the cyber attack against Dorothy movie