അല്ലു അര്ജുനെ കുറിച്ച് സംസാരിക്കുകയാണ് സംവിധായകനും ഡബ്ബിങ് ആര്ട്ടിസ്റ്റുമായ ജിസ് ജോയ്. ഓരോ സിനിമ കഴിയുമ്പോഴും അല്ലു അര്ജുന് അഭിനയത്തില് പക്വത കൈവരിക്കുന്നുണ്ടെന്ന് ജിസ് ജോയ് പറയുന്നു. നന്നായി കോമഡി ചെയ്യുകയും നൃത്തം ചെയ്യുകയും ചെയ്യുന്ന ഒരു എന്റര്ടെയിന്മെന്റ് പാക്കേജ് ആണ് അല്ലുവെന്നും ജിസ് ജോയ് പറഞ്ഞു. മഹിളാരത്നം മാസികയ്ക്ക് നല്കിയ അഭിമുഖത്തില് സംസാരിക്കുകയായിരുന്നു അദ്ദേഹം.
‘അല്ലു ഓരോ സിനിമ കഴിയും തോറും അഭിനയത്തില് ഒരുപാട് പക്വത കൈവരിക്കുന്നുണ്ട്. ശരിക്കും ഒരു എന്റര്ടെയിന്മെന്റ് പാക്കേജ് ആണ് അല്ലു. കോമഡി ചെയ്യുക എന്നത് വലിയ കഷ്ടപാടുള്ള കാര്യമാണ്. അല്ലു പക്ഷേ നന്നായി കോമഡി ചെയ്യും. നന്നായി ഡാന്സ് ചെയ്യും. ഇത് രണ്ടും സിനിമയില് വലിയ ബുദ്ധിമുട്ടുള്ള കാര്യങ്ങളാണ്. അതിനാല്തന്നെ അത് രണ്ടും ഗംഭീരമായി ചെയ്യുമ്പോള് നമുക്കും ശ്രദ്ധിക്കാതിരിക്കാനാവില്ല.
മികച്ച നടനുള്ള നാഷണല് അവാര്ഡ് പോലും ആ സംസ്ഥാനത്തേയ്ക്ക് ആദ്യമായി കൊണ്ടുചെല്ലുന്നത് അല്ലുവാണ്. ഓരോ സിനിമകള് കഴിയുന്തോറും അല്ലു സ്വയം മെച്ചപ്പെടുന്നു,’ ജിസ് ജോയ് പറയുന്നു.
അല്ലു അര്ജുന് വേണ്ടി വേറെ ഒരാള് ഡബ്ബ് ചെയ്യാനുണ്ടായ സാഹചര്യത്തെ കുറിച്ചും ജിസ് ജോയ് സംസാരിച്ചു.
‘ഒരുതവണ അല്ലു അര്ജുന് വേണ്ടി വേറെ ഒരാള് ഡബ്ബ് ചെയ്യേണ്ട സാഹചര്യം ഉണ്ടായിട്ടുണ്ട്. അന്ന് ആനന്ദവല്ലി ചേച്ചിയാണ് എന്നെ വിളിക്കുന്നത്. അല്ലുവിന് വേണ്ടി ഒരു സിനിമയില് ഡബ്ബ് ചെയ്യണം എന്ന് പറഞ്ഞു. ഞാന് ചെയ്യാമെന്നും പറഞ്ഞു. എന്നാല് എനിക്കൊരു മര്യാദ ഇല്ലാത്തപോലെ സംസാരിക്കുന്നതായിട്ടാണ് തോന്നിയത്.
താന് ഇല്ലെങ്കിലും ഞങ്ങള്ക്ക് വേറെ ആളെക്കിട്ടും എന്ന രീതിയില് ആണ് ആള് സംസാരിച്ചത്. പക്ഷേ, എനിക്കുള്ള കഞ്ഞി എനിക്ക് തന്നെ കിട്ടും. അത് മനുഷ്യന് തരുന്നതല്ല ദൈവം തരുന്നതാണ് എന്ന് വിശ്വസിക്കുന്ന ഒരാളാണ് ഞാന്. അതുകൊണ്ടുതന്നെ ഞാന് അത് വേണ്ടെന്നുവെക്കുകയായിരുന്നു,’ ജിസ് ജോയ് പറഞ്ഞു.
