ഇന്ത്യ – പാകിസ്ഥാന് സംഘര്ഷങ്ങള് കണക്കിലെടുത്ത് താത്കാലികമായി നിര്ത്തിവെച്ച ഐ.പി.എല് മെയ് 17ന് പുനരാരംഭിക്കുകയാണ്. റോയല് ചലഞ്ചേഴ്സ് ബെംഗളൂരുവും കൊല്ക്കത്ത നൈറ്റ് റൈഡേഴ്സുമാണ് ഐ.പി.എല് 2025ന്റെ ‘സെക്കന്ഡ് ഫേസിലെ’ ആദ്യ മത്സരത്തില് കളത്തിലിറങ്ങുന്നത്. ബെംഗളൂരുവിന്റെ ഹോം ഗ്രൗണ്ടായ ചിന്നസ്വാമി സ്റ്റേഡിയമാണ് വേദി.
മെയ് 18 ഞായറാഴ്ച ഐ.പി.എല്ലിലെ രണ്ടാം എല് ക്ലാസിക്കോ പോരാട്ടമായ രാജസ്ഥാന് റോയല്സ് – പഞ്ചാബ് കിങ്സ് മത്സരവും അരങ്ങേറും. ജയ്പൂരിലെ സവായ് മാന്സിങ് സ്റ്റേഡിയമാണ് വേദി. മെയ് 20ന് പോയിന്റ് പട്ടികയിലെ അവസാനക്കാരായ ചെന്നൈ സൂപ്പര് കിങ്സിനെതിരെയും രാജസ്ഥാന് കളിക്കും.
ഈ രണ്ട് മത്സരത്തിലും സൂപ്പര് താരം ജോഫ്രാ ആര്ച്ചര് ടീമിനൊപ്പമുണ്ടാകില്ല എന്നാണ് റിപ്പോര്ട്ടുകള് വ്യക്തമാക്കുന്നത്. വെസ്റ്റ് ഇന്ഡീസിന്റെ ഇംഗ്ലണ്ട് പര്യടനത്തിനുള്ള സ്ക്വാഡില് ഇടം നേടിയതിന് പിന്നാലെയാണ് ഐ.പി.എല്ലിലെ ശേഷിക്കുന്ന മത്സരങ്ങള് താരത്തിന് നഷ്ടമാകുന്നത്.
രാജസ്ഥാന് റോയല്സ് നിരയില് ഏറ്റവും മികച്ച രീതിയില് പന്തെറിയുന്ന വളരെ ചുരുക്കം ബൗളര്മാരില് ഒരാളാണ് ആര്ച്ചര്. ആദ്യ മത്സരത്തില് സണ്റൈസേഴ്സിനെതിരെ പുറത്തെടുത്ത മോശം പ്രകടനം മാറ്റി നിര്ത്തിയാല് ഈ സീസണിലെ തന്നെ ഏറ്റവും മികച്ച ബൗളര്മാരില് ഒരാളാണ് ആര്ച്ചര്.
12 മത്സരത്തില് നിന്നും 11 വിക്കറ്റുമായി രാജസ്ഥാന്റെ വിക്കറ്റ് വേട്ടക്കാരില് ഒന്നാമനാണ് ആര്ച്ചര്. 9.47 എക്കോണമിയിലും 24.81 സ്ട്രൈക്ക് റേറ്റിലുമാണ് താരം പന്തെറിയുന്നത്. ഇതിനൊപ്പം സീസണില് ഇതുവരെ 110 ഡോട്ട് ബോളുകളും ആര്ച്ചര് എറിഞ്ഞിട്ടുണ്ട്. ഈ സീസണില് 100 ഡോട്ട് ബോളുകളെറിഞ്ഞ ഏഴ് താരങ്ങളില് ഒരാള് കൂടിയാണ് ആര്ച്ചര്.
രാജസ്ഥാന് റോയല്സ് ഇതിനോടകം തന്നെ ടൂര്ണമെന്റിന് പുറത്തായതിനാല് ആര്ച്ചറിന്റെ അഭാവം ടീമിന്റെ ഭാവിയെ സ്വാധീനിക്കാന് സാധ്യതയില്ല. എന്നാല് അവസാന രണ്ട് മത്സരത്തിലും വിജയിച്ച് തലയുയര്ത്തി മടങ്ങാമെന്ന രാജസ്ഥാന്റെ സ്വപ്നങ്ങള്ക്ക് താരത്തിന്റെ അഭാവം തിരിച്ചടിയായേക്കും.
ആര്ച്ചറിന് പുറമെ സൂപ്പര് താരം ഷിംറോണ് ഹെറ്റ്മെയറും ഫാസ്റ്റ് ബൗളിങ് കോച്ച് ഷെയ്ന് ബോണ്ടും ശേഷിക്കുന്ന മത്സരങ്ങളില് ടീമിനൊപ്പമുണ്ടായേക്കില്ല.
ഈ സീസണില് രാജസ്ഥാന് റോയല്സിനായി ഒന്നും തന്നെ ചെയ്യാന് സാധിക്കാതെ പോയ താരമാണ് ഹെറ്റ്മെയര്. വിജയിക്കേണ്ട മത്സരങ്ങളടക്കം താരം പരാജയപ്പെടുത്തിയെന്ന വിമര്ശനങ്ങളും താരത്തിനെതിരെ ഉയര്ന്നിരുന്നു.
മെഗാ താരലേലത്തിന് മുമ്പ് രാജസ്ഥാന് റോയല്സ് നിലനിര്ത്തിയ ഏക വിദേശ താരമായിരുന്നു ഹെറ്റ്മെയര്. ലേലത്തിന് ശേഷം ടീമിലുണ്ടായിരുന്ന ഏക വിദേശ ബാറ്ററും ഹെറ്റ്മെയര് മാത്രമായിരുന്നു.
ഫിനിഷറുടെ റോളില് താരം തിളങ്ങുമെന്ന് പ്രതീക്ഷിച്ചെങ്കിലും ടീമിലെ ഏറ്റവും നിരാശപ്പെടുത്തിയ താരങ്ങളില് ഒരാളായും ഹെറ്റ്മെയര് മാറി.
അതേസമയം, ഐ.പി.എല്ലിന്റെ ശേഷിക്കുന്ന മത്സരങ്ങള്ക്കുള്ള ഷെഡ്യൂള് അപെക്സ് ബോര്ഡ് നേരത്തെ പുറത്തുവിട്ടിരുന്നു.
