മത്സരത്തിന് മുമ്പ് അത്തരം വീഡിയോകള്‍ കാണും, അഭിഷേക് ഇപ്പോഴുമതിനെ കാര്‍ട്ടൂണ്‍ എന്നാണ് വിളിക്കുന്നത്; തന്റെ ശീലത്തെക്കുറിച്ച് റെഡ്ഡി

ജാപ്പനീസ് ആനിമേകള്‍ കാണുന്നത് തനിക്ക് ഏറെ ഇഷ്ടമാണെന്ന് പറയുകയാണ് ഇന്ത്യന്‍ സൂപ്പര്‍ താരവും സണ്‍ റൈസേഴ്‌സ് ഹൈദരാബാദിന്റെ യുവ ഓള്‍-റൗണ്ടറുമായ നിതീഷ് കുമാര്‍ റെഡ്ഡി. മത്സരത്തിന് മുമ്പ് ആനിമേ റീലുകള്‍ കാണുന്നത് തനിക്ക് ഇഷ്ടമാണെന്നും നിതീഷ് കുമാര്‍ റെഡ്ഡി പറഞ്ഞു.

തന്റെ സഹതാരമായ അഭിഷേക് ശര്‍മയെയും തനിക്കൊപ്പം ആനിമേ കാണാന്‍ ക്ഷണിക്കുമെന്നും എന്നാല്‍ അഭിഷേക് ഇപ്പോഴും അതിനെ കാര്‍ട്ടൂണ്‍ എന്നാണ് വിളിക്കുന്നതെന്നും നിതീഷ് കുമാര്‍ റെഡ്ഡി വ്യക്തമാക്കി.

പ്യൂമയ്ക്കായി അര്‍ജുന്‍ പണ്ഡിറ്റ് നടത്തിയ അഭിമുഖത്തിലാണ് ജാപ്പനീസ് ആനിമേകളോടുള്ള തന്റെ ഇഷ്ടം റെഡ്ഡി തുറന്നുപറഞ്ഞത്.

‘ആനിമേകള്‍ കാണുന്നത് എനിക്ക് ഏറ്റവും ഇഷ്ടപ്പെട്ട സംഗതിയാണ്. ആനിമേ ക്യാരക്ടേഴ്‌സിന്റെ ചിത്രങ്ങളുള്ള വസ്ത്രങ്ങള്‍ എനിക്കുണ്ട്. അവരുടെ ചില ആക്ഷന്‍ ഫിഗേഴ്‌സും എന്റെ പക്കലുണ്ട്,’ നിതീഷ് കുമാര്‍ പറഞ്ഞു.