ഐ.പി.എല്ലില്‍ കഴിഞ്ഞ ദിവസം നടന്ന മത്സരത്തില്‍ കൊല്‍ക്കത്ത നൈറ്റ് റൈഡേഴ്‌സിനെതിരെ ദല്‍ഹി ക്യാപ്പിറ്റല്‍സ് പരാജയപ്പെട്ടിരുന്നു. സീസണില്‍ ഏഴാം തോല്‍വിയാണ് ടീം വഴുന്നത്. ഇതോടെ തോല്‍വിയെക്കുറിച്ച് സംസാരിക്കുകയാണ് ദല്‍ഹി ക്യാപ്റ്റന്‍ അക്‌സര്‍ പട്ടേല്‍.

മറ്റൊരു പരാജയത്തിന് ശേഷം ശരിയായ വാക്കുകള്‍ സംസാരിക്കാന്‍ വളരെ ബുദ്ധിമുട്ടാണെന്നും തനിക്ക് സീസണില്‍ തനിക്ക് മികച്ച രീതിയില്‍ ബാറ്റ് ചെയ്യാന്‍ സാധിച്ചില്ലെന്നും അക്‌സര്‍ പറഞ്ഞു. മാത്രമല്ല തോല്‍വിയുടെ എല്ലാ ഉത്തരവാദിത്തവും ഏറ്റെടുക്കുന്നുവെന്നും അക്‌സര്‍ പറഞ്ഞു.

‘മറ്റൊരു പരാജയത്തിന് ശേഷം ഇവിടെ നില്‍ക്കാനും ശരിയായ വാക്കുകള്‍ സംസാരിക്കാനും വളരെ ബുദ്ധിമുട്ടാണ്. സത്യസന്ധമായി പറയട്ടെ – ഈ സീസണില്‍ ഞാന്‍ മികച്ച രീതിയില്‍ ബാറ്റ് ചെയ്തിട്ടില്ല, ടീമിന് എന്നെ ഏറ്റവും ആവശ്യമുള്ളപ്പോള്‍ ഞാന്‍ അവരെ നിരാശപ്പെടുത്തിയെന്ന് എനിക്കറിയാം.

ഒരു ക്യാപ്റ്റനെന്ന നിലയിലും ഒരു മുതിര്‍ന്ന കളിക്കാരനെന്ന നിലയിലും, ഞങ്ങളുടെ പൊരുത്തക്കേടുകള്‍ക്കും ഞങ്ങള്‍ ഇപ്പോള്‍ നില്‍ക്കുന്ന സ്ഥാനത്തിനും ഞാന്‍ പൂര്‍ണ ഉത്തരവാദിത്തം ഏറ്റെടുക്കുന്നു. ഞങ്ങള്‍ ശരിക്കും ഞങ്ങളുടെ പരമാവധി ശ്രമിക്കുന്നുണ്ട്, പക്ഷേ കാര്യങ്ങള്‍ ഞങ്ങളുടെ വഴിക്ക് പോകുന്നില്ല.

ഞങ്ങളെ പിന്തുണച്ച ഞങ്ങളുടെ എല്ലാ ആരാധകരോടും, ഞാന്‍ അഗാധമായി ഖേദിക്കുന്നു. ഞങ്ങള്‍ നിങ്ങള്‍ക്ക് നല്‍കുന്നതിനേക്കാള്‍ മികച്ച ഫലങ്ങള്‍ നിങ്ങള്‍ അര്‍ഹിക്കുന്നു. അവസാനം വരെ ഞങ്ങള്‍ പോരാടിക്കൊണ്ടിരിക്കും, കൂടുതല്‍ കഠിനാധ്വാനം ചെയ്യുമെന്നും കൂടുതല്‍ ശക്തമായി തിരിച്ചുവരുമെന്നും ഞങ്ങള്‍ വാഗ്ദാനം ചെയ്യുന്നു. ദയവായി ഞങ്ങളെ പിന്തുണയ്ക്കുന്നത് തുടരുക,’ അക്‌സര്‍ പട്ടേല്‍ പറഞ്ഞു.

ദല്‍ഹിയുടെ തട്ടകമായ അരുണ്‍ ജെയ്റ്റിലി സ്റ്റേഡിയത്തില്‍ നടന്ന മത്സരത്തില്‍ എട്ട് വിക്കറ്റിനാണ് കൊല്‍ക്കത്ത വിജയിച്ച് കയറിയത്.

ദല്‍ഹി ഉയര്‍ത്തിയ 143 റണ്‍സിന്റെ വിജയലക്ഷ്യം കൊല്‍ക്കത്ത 34 പന്തുകള്‍ ശേഷിക്കെ മറികടക്കുകയായിരുന്നു. ഇതോടെ കൊല്‍ക്കത്ത ഒമ്പത് പോയിന്റുമായി ഏഴാം സ്ഥാനത്തെത്തി. ഫിന്‍ അലന്റെ സെഞ്ച്വറി കരുത്തിലാണ് കൊല്‍ക്കത്ത വിജയം സ്വന്തമാക്കിയത്.

Content Highlight: Delhi Captain Axar Patel Talking About Defeat Against Kolkata In IPL