നോ മെസി നോ പ്രോബ്ലം; എതിരാളികളെ സെവനപ്പ് കുടിപ്പിച്ച് അർജന്റീന

ഇതിഹാസ താരം ലയണൽ മെസിയുടെ പടിയിറക്കത്തിന് ശേഷം നടന്ന രണ്ടാം സൗഹൃദ മത്സരത്തിൽ അർജന്റീനക്ക് വമ്പൻ ജയം. ആഫ്രിക്കൻ ടീമായ ബുർക്കിനൊ ഫാസോയെ എതിരില്ലാത്ത ഏഴ് ഗോളുകൾക്ക് മുൻ ലോക ചാമ്പ്യന്മാർ തകർത്തു.

മത്സരം തുടങ്ങി നാലാം മിനിട്ടിൽ ലൗട്ടാരോ മാർട്ടിനസാണ് അർജന്റീനയുടെ ഗോളടി മേളയ്ക്ക് തുടക്കം കുറിച്ചത്. ആദ്യ ഗോൾ പിറന്നതിന് നാല് മിനിട്ടുകൾക്ക് ശേഷം മൗമൗനെ ഡിയാല്ലോയുടെ സെൽഫ് ഗോളിലൂടെ അർജന്റീന വീണ്ടും ലീഡ് ഉയർത്തി.

12ാം മിനിട്ടിൽ ജിയാൻലൂക്ക പ്രെസ്റ്റിയാനിയും 35ാം മിനിട്ടിൽ നിക്കോ പാസും ഗോൾ നേടി അർജന്റീനക്ക് നാല് ഗോളിന്റെ വമ്പൻ ലീഡ് സമ്മാനിച്ചു. നിക്കോ പാസിന്റെ ഗോൾ പിറന്നതിന് ഒരു മിനിട്ടിന് ശേഷം ജൂലിയൻ അൽവാരസിലൂടെ അർജന്റീന അഞ്ചാം ഗോളും നേടി. ഒടുവിൽ ആദ്യപകുതി പിന്നിട്ടപ്പോൾ തന്നെ എതിരാളികൾക്ക് മുകളിൽ അഞ്ച് ഗോളിന്റെ വ്യക്തമായ ആധിപത്യം പുലർത്താൻ അർജന്റീനക്ക് സാധിച്ചു.

രണ്ടാം പകുതിയിൽ 57ാം മിനിട്ടിൽ ഫ്രാങ്കോ മസ്താന്റുവോനോയും ആഫ്രിക്കൻ ടീമിന്റെ വലകുലുക്കി. ഒടുവിൽ മത്സരത്തിന്റെ ഇഞ്ചുറി ടൈമിൽ ജിയൂലിയാനോ സിമിയോണിയും അർജന്റീനക്ക് വേണ്ടി വലകുലുക്കി ടീമിന് വമ്പൻ വിജയം സമ്മാനിച്ചു.

മത്സരത്തിന്റെ സർവാധിപത്യവും അർജന്റീനയുടെ കൈകളിലായിരുന്നു. 75 ശതമാനം ബോൾ പൊസഷൻ സ്വന്തമാക്കിയ അർജന്റീന 28 ഷോട്ടുകളാണ് എതിരാളികളുടെ പോസ്റ്റിലേക്ക് ഉതിർത്തത്. ഇതിൽ 16 എണ്ണവും ഓൺ ടാർഗറ്റിലേക്കുമായിരുന്നു.

മറുഭാഗത്ത് മൂന്ന് ഷോട്ടുകൾ മാത്രമാണ് ആഫ്രിക്കൻ ടീമിന് അർജന്റീനയുടെ പോസ്റ്റിൽ എത്തിക്കാൻ സാധിച്ചത്. ഇതിൽ ഒന്ന് മാത്രമായിരുന്നു ലക്ഷ്യത്തിലെത്തിയത്.

ഒക്ടോബർ ആറിനാണ് അർജന്റീന അടുത്ത സൗഹൃദ മത്സരത്തിനിറങ്ങുന്നത്. ബെനിനാണ് ടീമിന്റെ എതിരാളികൾ. അർജന്റീന ആരാധകർക്ക് ഇതൊരു വൈകാരിക മത്സരം കൂടിയാണ്. ഇതിഹാസ താരം മെസി അവസാനമായി അർജന്റീനയുടെ നീലജേഴ്സി അണിയുന്ന മത്സരമാണിത്.

ബ്യൂണസ് ഐറിസിലെ മോന്യൂമെന്റൽ സ്റ്റേഡിയത്തിലാണ് മെസി അവസാനമായി അർജന്റീനക്ക് വേണ്ടി ബൂട്ടുകെട്ടുക. ഈ മത്സരത്തിൽ മെസിയുടെ ഇടംകാലിൽ നിന്നും അത്ഭുതങ്ങൾ പിറക്കുന്നത് കാണാനുള്ള കാത്തിരിപ്പിലാണ് ഫുട്ബോൾ ലോകം.

2028 കോപ്പ അമേരിക്കയിൽ കൂടി മെസി അർജന്റീനക്ക് വേണ്ടി ബൂട്ട് കെട്ടുമെന്ന് പ്രതീക്ഷിച്ചിരുന്നെങ്കിലും ആരാധകരെ ഒന്നടങ്കം കണ്ണീരിലാഴ്ത്തിയായിരുന്നു ഇതിഹാസം വിരമിക്കൽ പ്രഖ്യാപിച്ചത്.

Content Highlight: Argentina beat Burkino Fazo in friendly match