ക്രിക്കറ്റിന്റെ മക്കയായ ലോര്‍ഡ്സ് സ്റ്റേഡിയത്തില്‍ ഇന്ത്യയും ഇംഗ്ലണ്ടും മൂന്നാം മത്സരത്തില്‍ ഏറ്റുമുട്ടികൊണ്ടിരിക്കുകയാണ്. മൂന്നാം ദിവസം തന്നെ ഇന്ത്യയുടെ ഒന്നാം ഇന്നിങ്സ് ബാറ്റിങ് അവസാനിച്ചിരുന്നു. ഇംഗ്ലണ്ടിനെ പോലെ തന്നെ ഇന്ത്യയും 387 റണ്‍സെടുത്ത് പുറത്താവുകയായിരുന്നു.

ഇന്ത്യക്കായി വൈസ് ക്യാപ്റ്റന്‍ റിഷബ് പന്ത് മികച്ച പ്രകടനം നടത്തിയിരുന്നു. പന്ത് അര്‍ധ സെഞ്ച്വറി നേടിയാണ് ഇന്ത്യന്‍ സ്‌കോര്‍ ബോര്‍ഡ് ചലിപ്പിച്ചത്. 112 പന്തില്‍ 74 റണ്‍സാണ് താരം നേടിയത്. രണ്ട് സിക്സറും എട്ട് ഫോറും അടങ്ങുന്നതായിരുന്നു താരത്തിന്റെ ഇന്നിങ്സ്. മികച്ച നിലയില്‍ മുന്നേറികൊണ്ടിരിക്കെ റണ്‍സ് എടുക്കാന്‍ ശ്രമിച്ച് താരം റണ്‍ ഔട്ടാവുകയായിരുന്നു.

ഇപ്പോള്‍ പന്തിന്റെ പുറത്താകലിനെ കുറിച്ച് സംസാരിക്കുകയാണ് മുന്‍ ഇന്ത്യന്‍ താരം അജയ് ജഡേജ. പന്ത് സ്ഥിരതയുള്ള താരമാണെന്നും എന്നാല്‍ അത് റണ്‍സെടുക്കുന്നതില്‍ മാത്രമല്ല മണ്ടത്തരങ്ങളിലുമുണ്ടെന്ന് അദ്ദേഹം പറഞ്ഞു.

അവന്‍ ബാറ്റ് ചെയ്ത രീതിയും റണ്‍ ഔട്ടായ രീതിയും പന്തിന് മാത്രമേ ചെയ്യാന്‍ കഴിയൂവെന്നും അദ്ദേഹം കൂട്ടിച്ചേര്‍ത്തു. സോണി സ്‌പോര്‍ട്‌സില്‍ സംസാരിക്കുകയായിരുന്നു അജയ് ജഡേജ.

‘ഇംഗ്ലണ്ടില്‍ ഇംഗ്ലണ്ടിനെതിരെ അവസാന എട്ടില്‍ ഏഴ് ഇന്നിങ്‌സിലും അവന്‍ 50+ റണ്‍സ് സ്‌കോര്‍ ചെയ്തിട്ടുണ്ട്. അവന്‍ സ്ഥിരത പുലര്‍ത്തുന്നുണ്ട്. റണ്‍സ് നേടുന്നതില്‍ മാത്രമല്ല, മണ്ടത്തരങ്ങള്‍ കാണിക്കുന്നതിലും അവന് സ്ഥിരതയുണ്ട്.

അവന്‍ ബാറ്റ് ചെയ്ത രീതിയും റണ്‍ ഔട്ടായ രീതിയും പന്തിന് മാത്രമേ ചെയ്യാന്‍ കഴിയൂ. അവന്‍ എത്രത്തോളം സ്ഥിരത പുലര്‍ത്തുന്നതെന്ന് ഞാന്‍ പലപ്പോഴും ചിന്തിക്കാറുണ്ട്.

റിസ്‌ക് എടുക്കുമ്പോഴും സ്ഥിരത പുലര്‍ത്തുന്നത് അവന്‍ എത്രത്തോളം സ്‌പെഷ്യല്‍ കളിക്കാരനാണ് എന്ന് തെളിയിക്കുന്നു. എന്നിരുന്നാലും അവന്‍ നിങ്ങള്‍ക്ക് സംസാരിക്കാന്‍ എപ്പോഴും എന്തെങ്കിലുമൊന്ന് നല്‍കും,’ ജഡേജ പറഞ്ഞു.

പന്തിന് പുറമെ, കെ.എല്‍ രാഹുലും മിന്നും പ്രകടനമാണ് ഇന്ത്യന്‍ ഇന്നിങ്‌സില്‍ നടത്തിയത്. 177 പന്തില്‍ 13 ഫോറുകള്‍ ഉള്‍പ്പെടെ 100 റണ്‍സാണ് മൂന്നാം മത്സരത്തില്‍ താരം സ്‌കോര്‍ ചെയ്തത്. കൂടാതെ, ജഡേജ 131 പന്തില്‍ 72 റണ്‍സ് എടുത്തും തിളങ്ങി.

അതേസമയം, മൂന്നാം ദിനം അവസാനിക്കുമ്പോള്‍ ഇംഗ്ലണ്ട് രണ്ടാം ഇന്നിങ്സ് ബാറ്റിങ് തുടങ്ങിയിട്ടുണ്ട്. ഒരു ഓവറില്‍ വിക്കറ്റ് നഷ്ടമില്ലാതെ രണ്ട് റണ്‍സ് എടുത്താണ് ആതിഥേയര്‍ മൂന്നാം ദിനം അവസാനിപ്പിച്ചത്. സാക്ക് ക്രോളിയും ബെന്‍ ഡക്കറ്റുമാണ് ക്രീസിലുള്ളത്.

Content Highlight: Ajay Jadeja says that Rishabh Pant is consistent in both scoring runs and doing stupid things