പത്തുരൂപ നോട്ടില്‍ ഗാന്ധിക്ക് പകരം ഗോഡ്‌സെയുടെ ചിത്രം പതിപ്പിച്ച് എ.ബി.വി.പി നേതാവ്; പരാതിയില്‍ കേസെടുക്കാതെ പൊലീസ്
national news
പത്തുരൂപ നോട്ടില്‍ ഗാന്ധിക്ക് പകരം ഗോഡ്‌സെയുടെ ചിത്രം പതിപ്പിച്ച് എ.ബി.വി.പി നേതാവ്; പരാതിയില്‍ കേസെടുക്കാതെ പൊലീസ്
ന്യൂസ് ഡെസ്‌ക്
Friday, 22nd May 2020, 3:09 pm

ഭോപാല്‍: മഹാത്മാ ഗാന്ധിക്ക് പകരം നാഥുറാം വിനായക ഗോഡ്‌സെയുടെ ചിത്രം പത്തു രൂപ നോട്ടില്‍ വെച്ച് ഫേസ്ബുക്ക് പോസ്റ്റിട്ടയാള്‍ക്കെതിരെ പൊലീസില്‍ പരാതി നല്‍കിയിട്ടും കേസെടുക്കാതെ പൊലീസ്. മധ്യപ്രദേശിലെ സിദ്ധി ജില്ലയിലെ എ.ബി.വി.പി നേതാവായ ശിവം ശുക്ലയാണ് ഗോഡ്‌സെയുടെ 111ാം ജന്മദിനമായ മെയ് 19ന് കറന്‍സിയിലെ ചിത്രം മാറ്റി ഫേസ്ബുക്കിലിട്ടത്. ഇയാള്‍ക്കെതിരെ നടപടിയെടുക്കണമെന്നാവശ്യപ്പെട്ട് സിദ്ധി കോട്ട് വാലി പൊലീസ് സ്റ്റേഷനില്‍ മിശ്രയെന്നയാളാണ് പരാതി നല്‍കിയത്.

പത്തുരൂപ നോട്ടിന് പുറകിലെ ഗാന്ധിയുടെ ചിത്രവും എടുത്തുമാറ്റിയിട്ടുണ്ട്.

ഗാന്ധി അനുയായികളുടെ വികാരം വ്രണപ്പെടുത്തുമെന്നും രാജ്യത്ത് കുഴപ്പങ്ങളുണ്ടാക്കാന്‍ ശ്രമിക്കുന്നുവെന്നും കാണിച്ചാണ് സിദ്ധി ജില്ലയിലെ എ.ബി.വി.പി ജനറല്‍ സെക്രട്ടറിയായ ശിവം ശുക്ലക്കെതിരെ മിശ്ര പരാതി നല്‍കിയിരിക്കുന്നത്.

സമൂഹ മാധ്യമങ്ങളില്‍ ശിവം ശുക്ല നിരന്തരമായി കോണ്‍ഗ്രസിനും മുസ്‌ലിങ്ങള്‍ക്കുമെതിരെ വിദ്വേഷപരമായ പരാമര്‍ശങ്ങള്‍ നടത്തുന്നുണ്ടെന്നും മിശ്ര പറഞ്ഞു.

ആര്‍.എസ്.എസുമായും എം.പി റിതി പതക്കുമായും ശുക്ലക്കുള്ള അടുത്ത ബന്ധമാണ് ശുക്ലയുടെ ബലമെന്നും മിശ്ര പരാതിയില്‍ ആരോപിക്കുന്നു.

 

എന്നാല്‍ പരാതിനല്‍കി 24 മണിക്കൂര്‍ കഴിഞ്ഞിട്ടും പൊലീസ് കേസ് രജിസ്റ്റര്‍ ചെയ്തിട്ടില്ലെന്നും അദ്ദേഹം പറഞ്ഞു.

‘ഫേസ്ബുക്ക് പോസ്റ്റുമായി ബന്ധപ്പെട്ട് പൊലീസില്‍ പരാതിപ്പെട്ടിട്ട് 24 മണിക്കൂര്‍ കഴിഞ്ഞിരിക്കുന്നു. എന്നിട്ടും കേസ് രജിസ്റ്റര്‍ ചെയ്യാന്‍ പൊലീസിനിതുവരെ മനസ് വന്നിട്ടില്ല, പൊലീസ് ഇക്കാര്യത്തില്‍ ഉഴപ്പുകയാണ്,’ മിശ്ര പറഞ്ഞു.

ബി.ജെ.പി സംസ്ഥാനത്ത് തിരിച്ചുവന്ന സാഹചര്യത്തില്‍ ശിവം ശുക്ലക്കെതിരെ എന്തെങ്കിലും നടപടിയെടുക്കുമെന്ന് താന്‍ കരുതുന്നില്ലെന്നും മിശ്ര പറഞ്ഞു.

പരാതിയിന്മേല്‍ കേസെടുക്കണോ വേണ്ടയോ എന്നതു സംബന്ധിച്ച് അന്വേഷണം നടത്തിക്കൊണ്ടിരിക്കുകയാണെന്ന് കോട്ട് വാലി പൊലീസ് സ്റ്റേഷന്‍ ഇന്‍സ്‌പെക്ടര്‍ പറഞ്ഞു.

ഡൂള്‍ന്യൂസിനെ ഫേസ്ബുക്ക്ടെലഗ്രാംഹലോ പേജുകളിലൂടെയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക