അദ്ദേഹത്തെ പോലൊരാളെ നമുക്ക് ലഭിച്ചത് വലിയ ഭാഗ്യമാണ്: സഞ്ജു സാംസൺ

ഇന്ത്യൻ ഇതിഹാസം വിരാട് കോഹ്‌ലിയെ പ്രശംസിച്ച് മലയാളി സൂപ്പർതാരം സഞ്ജു സാംസൺ. കോഹ്‌ലിയെ പോലൊരു ഒരു താരത്തെ ഇന്ത്യക്ക് ലഭിച്ചത് വലിയ ഭാഗ്യമാണെന്നാണ് സഞ്ജു പറഞ്ഞത്. ഏഷ്യൻ ഗെയിംസ് സെമി ഫൈനലിൽ ശ്രീലങ്കയ്ക്കെതിരെയുള്ള മത്സരത്തിന് മുന്നോടിയായി മാധ്യമങ്ങളോട് സംസാരിക്കുകയായിരുന്നു മലയാളി താരം.

‘അദ്ദേഹത്തെപ്പോലൊരാളെ നമുക്ക് ലഭിച്ചത് വലിയ ഭാഗ്യമാണ്. അദ്ദേഹം കളിക്കുമ്പോഴും പരിശീലിക്കുമ്പോഴും നമ്മുടെ രാജ്യത്തിനായി ക്രിക്കറ്റ് കളിക്കുമ്പോഴും എവിടെപ്പോയാലും അദ്ദേഹത്തിന്റെ പ്രകടനം നമ്മളെപ്പോലുള്ള ഇന്ത്യൻ താരങ്ങൾക്കും അദ്ദേഹത്തോടൊപ്പം കളിക്കുന്ന എല്ലാവർക്കും വലിയ പ്രചോദനമാണ്. അദ്ദേഹം കളിക്കുന്ന രീതിയും മികച്ച പ്രകടനം നടത്തുന്നതും തീർച്ചയായും ടീമിന് ഗുണം ചെയ്യുമെന്നാണ് ഞാൻ കരുതുന്നത്’, സഞ്ജു സാംസൺ പറഞ്ഞു.

വെസ്റ്റ് ഇൻഡീസിനെതിരെയുള്ള മൂന്ന് ഏകദിന മത്സരങ്ങളുടെ പരമ്പരയിലെ ആദ്യ മത്സരത്തിൽ തകർപ്പൻ സെഞ്ച്വറി നേടിയാണ് വിരാട് തിളങ്ങിയത്. തിരുവനന്തപുരം കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടന്ന മത്സരത്തിൽ 88 പന്തുകളിൽ നിന്ന് പത്ത് ഫോറും ഒമ്പത് സിക്സുമുൾപ്പെടെ 139 റൺസാണ് വിരാട് അടിച്ചുകൂട്ടിയത്. 157.95 എന്ന കിടിലൻ സ്ട്രൈക്ക് റേറ്റും വിരാടിനുണ്ടായിരുന്നു.

ഏകദിന കരിയറിലെ കോഹ്‌ലിയുടെ 55ാം സെഞ്ച്വറിയാണ് കേരളത്തിന്റെ മണ്ണിൽ പിറവിയെടുത്തത്. മാത്രമല്ല ഏകദിന ചരിത്രത്തിൽ 15000 റൺസ് പൂർത്തിയാക്കുന്ന രണ്ടാമത്തെ താരമാകാനും വിരാടിന് സാധിച്ചു. സാക്ഷാൽ സച്ചിൻ ടെൻഡുൽക്കറിന് ശേഷം ഈ നാഴികക്കല്ലിലെത്തുന്ന രണ്ടാമത്തെ മാത്രം താരമാണ് വിരാട്.

അതേസമയം നിലവിൽ ഏഷ്യൻ ഗെയിംസ് സെമി ഫൈനലിൽ ശ്രീലങ്കയ്ക്കെതിരെയുള്ള മത്സരത്തിനുള്ള തയ്യാറെടുപ്പിലാണ് സഞ്ജു. ക്വാർട്ടർ ഫൈനൽ മത്സരം മഴമൂലം ഉപേക്ഷിച്ചതോടെ ഇന്ത്യ നേരിട്ട് സെമിയിലേക്ക് മുന്നേറുകയായിരുന്നു. അഫ്ഗാനിസ്ഥാനെക്കാൾ റാങ്കിങ്ങിൽ മുന്നിലായതുകൊണ്ടാണ് ഇന്ത്യക്ക് സെമി യോഗ്യത ലഭിച്ചത്.

സെമിയിൽ ലങ്കക്കെതിരെ ഇന്ത്യയ്ക്ക് വേണ്ടി മലയാളി താരം സഞ്ജു സാംസൺ തന്നെയാകും ഓപ്പണറായി കളത്തിലിറങ്ങുക. ഏഷ്യൻ ഗെയിംസിൽ സഞ്ജു വെടിക്കെട്ട് ബാറ്റിങ് പ്രകടനം നടത്തുമെന്നാണ് ആരാധകർ ഉറച്ചുവിശ്വസിക്കുന്നത്.

Content Highlight: Sanju Samson talks about Virat Kohli