![?php echo $post['title']; ?>](https://assets.doolnews.com/w/900x473/2026/08/chennithala09.jpg)
കോഴിക്കോട്: സംസ്ഥാനത്ത് മയക്കുമരുന്ന് മാഫിയയ്ക്കെതിരെ നടപ്പിലാക്കുന്ന ‘തൂഫാന്’ ഡ്രൈവിന്റെ രണ്ടാം ഘട്ടം പ്രഖ്യാപിച്ച് ആഭ്യന്തര മന്ത്രി രമേശ് ചെന്നിത്തല. ജന പങ്കാളിത്തത്തോടെയുള്ള വിപുലമായ ബോധവത്ക്കരണ പ്രവര്ത്തനങ്ങള്ക്കാണ് രണ്ടാം ഘട്ടത്തില് പ്രാധാന്യം നല്കുന്നത്. കോഴിക്കോട് വെച്ചാണ് അദ്ദേഹം ഇത് സംബന്ധിച്ച പ്രഖ്യാപനം നടത്തിയത്.
സെപ്റ്റംബര് 28-നാണ് പദ്ധതിയുടെ രണ്ടാം ഘട്ടത്തിന് തുടക്കമാകുന്നത്. അന്നേദിവസം സംസ്ഥാനത്തെ 1200 തദ്ദേശ സ്വയംഭരണ സ്ഥാപനങ്ങളിലും തൂഫാന് പതാക ഉയര്ത്തും. എല്ലാ രാഷ്ട്രീയ പാര്ട്ടികളെയും ഏകോപിപ്പിച്ച് വാര്ഡ് തലങ്ങളില് പ്രത്യേക ‘തൂഫാന് സമിതികള്’ രൂപീകരിക്കും. ഇതിനായി പ്രത്യേക ഗ്രാമസഭകള് വിളിച്ച് ചേര്ക്കുകയും ‘തൂഫാന് വാരിയേഴ്സിനെ’ തെരഞ്ഞെടുക്കുകയും ചെയ്യും.
കുടുംബശ്രീ, ഹരിതകര്മ്മ സേന, അയല്ക്കൂട്ടങ്ങള്, തദ്ദേശ സ്ഥാപനങ്ങള് എന്നിവയെ പൂര്ണ്ണമായി പദ്ധതിയുടെ ഭാഗമാക്കും. വാര്ഡുകളില് ബീറ്റ് പൊലീസുകാര്ക്ക് ചുമതല നല്കുകയും ജനജാഗ്രതാ സമിതികള് കൂടുതല് സജീവമാക്കുകയും ചെയ്യും.
ഇതിനുപുറമെ, ആശുപത്രികള് കേന്ദ്രീകരിച്ച് ലഹരിമുക്തി ചികിത്സയ്ക്കായി ‘തൂഫാന് കെയര്’ ആരംഭിക്കും. തദ്ദേശ സ്വയംഭരണ തലത്തില് ലഹരിമുക്തി കേന്ദ്രങ്ങള്ക്ക് ലൈസന്സ് നല്കുന്നതിനായി നിയമഭേദഗതി കൊണ്ടുവരുമെന്നും മന്ത്രി വ്യക്തമാക്കി.
പദ്ധതിയുടെ ആദ്യ ഘട്ടത്തില് വലിയ നേട്ടമാണ് പൊലീസ് കൈവരിച്ചത്. 10,070 കേസുകള് രജിസ്റ്റര് ചെയ്യുകയും 1,883 പേരെ അറസ്റ്റ് ചെയ്യുകയും ചെയ്തു. റെയ്ഡുകളില് 23.4 കിലോ എം.ഡി.എം.എ, 1214.354 കിലോ കഞ്ചാവ്, 6215 കിലോ ഹൈബ്രിഡ് കഞ്ചാവ് എന്നിവ പിടിച്ചെടുത്തു.
കാസര്ഗോഡ് എം.ഡി.എം.എ കേസില് ഗുജറാത്ത് സ്വദേശി അടക്കമുള്ള പ്രതികളെ പിടികൂടിയ പൊലീസിനെ മന്ത്രി അഭിനന്ദിച്ചു. തെറ്റ് ചെയ്യുന്നവര്ക്കെതിരെ കര്ശന നടപടിയുണ്ടാകുമെന്നും അദ്ദേഹം കൂട്ടിച്ചേര്ത്തു.
