സച്ചിന്റെ ലോക റെക്കോഡ് തകർത്തു; ടെസ്റ്റിൽ ചരിത്രമെഴുതി റൂട്ട്

ടെസ്റ്റ് ക്രിക്കറ്റിൽ വീണ്ടും ചരിത്രനേട്ടവുമായി ഇംഗ്ലണ്ട് നായകൻ ജോ റൂട്ട്. അന്താരാഷ്ട്ര റെഡ് ബോൾ ഫോർമാറ്റിൽ ഏറ്റവും കൂടുതൽ അർധ സെഞ്ച്വറി നേടുന്ന താരമായാണ് റൂട്ട് മാറിയത്. പാക്കിസ്ഥാനെതിരെയുള്ള മൂന്ന് ടെസ്റ്റ്‌ മത്സരങ്ങളുടെ പരമ്പരയിലെ അവസാന മത്സരത്തിലാണ് താരത്തിന്റെ നേട്ടം.

മത്സരത്തിന്റെ രണ്ടാം ഇന്നിങ്സിൽ 69 പന്തിൽ പുറത്താവാതെ 62 റൺസ് നേടിയാണ് റൂട്ട് തിളങ്ങിയത്. എട്ട് ഫോറുകളാണ് താരത്തിന്റെ ബാറ്റിൽ നിന്നും പിറന്നത്. 69 തവണയാണ് റൂട്ട് ടെസ്റ്റ് ക്രിക്കറ്റിൽ അർധ സെഞ്ച്വറി കടന്നത്. നിലവിൽ ഈ നേട്ടത്തിൽ ഇന്ത്യൻ ഇതിഹാസം സച്ചിൻ ടെൻഡുൽക്കറിന്റെ പേരിലുണ്ടായിരുന്ന റെക്കോഡ് തകർത്താണ് റൂട്ട് ഒന്നാമനായത്.

ടെസ്റ്റ് ക്രിക്കറ്റിൽ ഏറ്റവും കൂടുതൽ അർധ സെഞ്ച്വറി നേടിയ താരം, ടീം, അർധ സെഞ്ച്വറികളുടെ എണ്ണം

ജോ റൂട്ട്-69-ഇംഗ്ലണ്ട്

സച്ചിൻ ടെണ്ടുൽക്കർ-ഇന്ത്യ-68

ജോ റൂട്ട്- ഇംഗ്ലണ്ട്-68

ശിവനരെയ്ൻ ചന്ദ്രപോൾ- വെസ്റ്റ് ഇൻഡീസ്-66

അലൻ ബോർഡർ-ഓസ്ട്രേലിയ-63

രാഹുൽ ദ്രാവിഡ്- ഇന്ത്യ-63

റിക്കി പോണ്ടിങ്-ഓസ്ട്രേലിയ-62

ജാക് കാലിസ്- സൗത്ത് ആഫ്രിക്ക-58

അലിസ്റ്റർ കുക്ക്-ഇംഗ്ലണ്ട്-57

വി.വി.എസ് ലക്ഷ്മൺ-ഇന്ത്യ-56

കുമാർ സംഗക്കാര- ശ്രീലങ്ക-56

അതേസമയം മത്സരത്തിൽ പാകിസ്ഥാൻ ഉയർത്തിയ 130 റൺസിന്റെ വിജയലക്ഷ്യം ഇംഗ്ലണ്ട് രണ്ട് വിക്കറ്റ് നഷ്ടത്തിൽ അനായാസം മറികടക്കുകയായിരുന്നു. റൂട്ടിനൊപ്പം നാലാം ഇന്നിങ്സിൽ തിളങ്ങിയത് ജോർദാൻ കോക്സ് ആണ്. 76 പന്തിൽ എട്ട് ഫോറുകൾ അടക്കം പുറത്താവാതെ 59 റൺസ് നേടിയാണ് താരം തിളങ്ങിയത്.

അതേസമയം രണ്ടാം ഇന്നിങ്‌സിൽ പാകിസ്ഥാൻ 449 റൺസിനാണ് പുറത്തായത്. മത്സരത്തിലെ ആദ്യ ഇന്നിങ്‌സിൽ ടോസ് നഷ്ടപ്പെട്ട് 133 റൺസിന് പുറത്തായ പാകിസ്ഥാനെതിരെ ഒന്നാം ഇന്നിങ്‌സിൽ ഇംഗ്ലണ്ട് 453 റൺസ് നേടിയിരുന്നു.

നിർണായകമായ രണ്ടാം ഇന്നിങ്‌സിൽ പാകിസ്ഥാനെ മുന്നോട്ടുകൊണ്ടുപോയത് റസാഉല്ല എന്ന 21 കാരന്റ മികച്ച പ്രകടനമാണ്. തന്റെ ടെസ്റ്റ് അരങ്ങേറ്റത്തിൽ ഒമ്പതാം നമ്പറിൽ ഇറങ്ങി വെടിക്കെട്ട് ബാറ്റിങ് പ്രകടനമാണ് താരം കാഴ്ചവെച്ചത്.

നേരിട്ട 63 പന്തുകളിൽ നിന്ന് ഒമ്പത് കൂറ്റൻ സിക്‌സുകളും നാല് ഫോറുകളും ഉൾപ്പെടെ 81 റൺസ് ആയിരുന്നു റസാഉല്ല അടിച്ചെടുത്തത്. മത്സരത്തിൽ പാകിസ്ഥാന് വേണ്ടി മികച്ച ബാറ്റിങ് പ്രകടനം കാഴ്ചവച്ച മറ്റൊരു താരം നാലാമനായി ഇറങ്ങിയ മസൂദാണ്. 148 പന്തിൽ നിന്ന് 95 റൺസാണ് താരം അടിച്ചെടുത്തത്. 12 ഫോർ ഉൾപ്പെടെയാണ് താരത്തിന്റെ ഇന്നിങ്‌സിൽ.

ക്യാപ്റ്റൻ ബാബർ അസം 103 പന്തിൽ നിന്നും ഒരു സിക്‌സും 11 ഫോറും ഉൾപ്പെടെ 76 റൺസ് നേടി മികവ് പുലർത്തി. ഓപ്പണർ അസൻ അവായിസ് 84 പന്തിൽ നിന്ന് 59 റൺസ് നേടിയും സ്‌കോർ ഉയർത്തി. പത്താം വിക്കറ്റിൽ മുഹമ്മദ് അബ്ബാസ് 42 റൺസും നേടിയിരുന്നു.

മത്സരത്തിൽ ഇംഗ്ലണ്ടിന് വേണ്ടി മികച്ച ബൗളിങ് പ്രകടനം നടത്തിയത് ഗസ് ആറ്റ്കിൻസനാണ്. മൂന്ന് വിക്കറ്റുകളാണ് താരം നേടിയത്. ജോഷ് ടങ്ങ്, ഡാൻ ലോറൻസ് ഒല്ലി റോബിൻസൺ എന്നിവർ രണ്ട് വിക്കറ്റുകൾ നേടിയപ്പോൾ ജോഫ്ര ആർച്ചർ ഒരു വിക്കറ്റും നേടി.

Content Highlight: Joe Root create a historical record in test cricket