സൗദി പ്രോ ലീഗില് നാളെ (ബുധന്) നടക്കാനിരിക്കുന്ന മത്സരത്തില് ക്രിസ്റ്റിയാനോ റൊണാള്ഡോയുടെ അല് നസര് അല് ഖലീജിനെതിരെ ഏറ്റുമുട്ടാനിരിക്കുകയാണ്. അല് അവ്വാല് പാര്ക്കില് നടക്കുന്ന മത്സരത്തില് വിജയം സ്വന്തമാക്കിയാല് ലീഗിലെ പോയിന്റ് പട്ടികയില് മൂന്നാം സ്ഥാനത്തേക്ക് എത്താന് അല് നസറിന് സാധിക്കും.
നിലവില് 32 മത്സരങ്ങളില് നിന്ന് 19 വിജയവും ഏഴ് സമനിലയും തോല്വിയും ആറ് തോല്വിയുമടക്കം 64 പോയിന്റ് നേടി നാലാം സ്ഥാനത്താണ് അല് നസര്. കഴിഞ്ഞ മത്സരങ്ങളില് അല് നസറിന് വേണ്ടി റോണോ ഇറങ്ങാത്തത് ഫുട്ബോള് ലോകത്ത് ഏറെ ചര്ച്ച ചെയ്തിരുന്നു.
കരാര് കഴിയാനിരിക്കെ താരം അല് നസര് വിടുമെന്ന് ഏറെ കുറേ വ്യക്തമാണ്. എന്നാല് നാളെ നടക്കാനിരിക്കുന്ന മത്സരത്തില് കളത്തിലിറങ്ങുമ്പേള് രണ്ട് വമ്പന് നേട്ടം സ്വന്തമാക്കാനുള്ള അവസരമാണ് റോണോയെ കാത്തിരിക്കുന്നത്.
അല് നസറിന് വേണ്ടി 100 ഗോള് സ്വന്തമാക്കാനുള്ള അവസരമാണ് റൊണാള്ഡോയുടെ മുന്നിലുള്ളത്. ഇതിന് വേണ്ടത് വെറും മൂന്ന് ഗോളുകള് മാത്രമാണ്. അല് നസറിന് വേണ്ടി 97 ഗോളുകള് ആണ് റൊണാള്ഡോ നിലവില് സ്വന്തമാക്കിയത്.
മാത്രമല്ല ഫുട്ബോളിന്റെ ചരിത്രത്തില് അഞ്ച് ടീമുകള്ക്ക് വേണ്ടി 100 ഗോള് നേടുന്ന താരമായി മാറാനും റൊണാള്ഡോക്ക് സാധിക്കും. പോര്ച്ചുഗല് (135), മാഞ്ചസ്റ്റര് യുണൈറ്റഡ് (145), റയല് മാഡ്രിഡ് (450), യുവന്റസ് (101) എന്നിങ്ങനെയാണ് റൊണാള്ഡോ നാല് ടീമുകള്ക്ക് വേണ്ടി അടിച്ചുകൂട്ടിയ ഗോളുകളുടെ കണക്കുകള്.
മുന്നിലുള്ള മത്സരത്തില് വെറും മൂന്ന് ഗോള് സ്വന്തമാക്കി മിന്നും പ്രകടനം കാഴ്ചവെച്ചാല് ഈ രണ്ട് റെക്കോഡും റോണോയ്ക്ക് സ്വന്തമാക്കാം.
അതേസമയം ഫുട്ബോള് ലോകത്ത് ഏറ്റവും കൂടുതല് കരിയര് ഗോളുകള് സ്വന്തമാക്കിയാണ് റോണോയുടെ കുതിപ്പ്. 934 ഗോളുകളാണ് താരം സ്വന്തമാക്കിയത്. കരിയറില് 1000 ഗോള് സ്വന്തമാക്കാനുള്ള ലക്ഷ്യത്തിലേക്കാണ് റോണോ നോട്ടമിടുന്നത്. എന്നാല് ഈ വര്ഷം നടക്കുന്ന ക്ലബ് ലോകകപ്പില് താരം കളിക്കുമോയെന്നാണ് ആരാധകര് ഉറ്റുനോക്കുന്നത്.
Content Highlight: Cristiano Ronaldo Need three Goals For Double Record Achievement
