സംഘർഷം അവസാനിപ്പിക്കാൻ ഇറാൻ ശ്രമിക്കുന്നു, തെറ്റ് അവരുടേതല്ല: പുടിൻ

തുർക്ക്മെനിസ്ഥാൻ: അമേരിക്ക അടിച്ചേൽപ്പിച്ച യുദ്ധം ചർച്ചകളിലൂടെ സമാധാനപരമായി അവസാനിപ്പിക്കാൻ ഇറാൻ ആത്മാർത്ഥമായി ശ്രമിക്കുകയാണെന്ന് റഷ്യൻ പ്രസിഡന്റ് വ്‌ളാഡിമിർ പുടിൻ . വ്യാഴാഴ്ച ഇറാൻ പ്രസിഡന്റ് മസൂദ് പെസെസ്കിയാനുമായി നടത്തിയ കൂടിക്കാഴ്ചയിലാണ് അദ്ദേഹം ഇക്കാര്യം വ്യക്തമാക്കിയത്.

പ്രശ്നങ്ങൾ പരിഹരിക്കാൻ ലക്ഷ്യമിട്ട് ഇറാൻ അടുത്തിടെ ഒരു പുതിയ നിർദേശം മുന്നോട്ടുവെച്ചിട്ടുണ്ടെന്ന് ചൂണ്ടിക്കാട്ടിയ പുടിൻ, സമാധാനം കൊണ്ടുവരാൻ സഹായിക്കാൻ മോസ്കോ എപ്പോഴും തയ്യാറാണെന്നും കൂട്ടിച്ചേർത്തു.

‘ഈ മേഖലയിലുണ്ടായ സംഘർഷങ്ങൾ അവസാനിപ്പിക്കാൻ ഇറാൻ കാര്യമായിത്തന്നെ ശ്രമിക്കുന്നുണ്ട്. ഈ പ്രശ്നങ്ങൾക്കൊന്നും ഇറാൻ അല്ല ഉത്തരവാദി, അവരുടെ ഭാഗത്തുനിന്ന് ഒരു തെറ്റും ഉണ്ടായിട്ടില്ല,’ പുടിൻ പറഞ്ഞു.

സി.ഐ.എസ് ഉച്ചകോടിയിലും കാസ്പിയൻ കടൽ പരിസ്ഥിതി സമ്മേളനത്തിലും പങ്കെടുക്കാൻ തുർക്ക്മെനിസ്ഥാനിൽ എത്തിയതായിരുന്നു ഇരുനേതാക്കളും. ചർച്ചയിൽ, റഷ്യയും ഇറാനും തമ്മിലുള്ള വ്യാപാര-സൗഹൃദ ബന്ധം കൂടുതൽ ശക്തമാകുന്നതിനെ പുടിൻ അഭിനന്ദിച്ചു.

ഇറാനെതിരെയുള്ള യു.എസ്-ഇസ്രഈൽ സംയുക്ത സൈനിക നീക്കങ്ങളെ റഷ്യ പലതവണ എതിർക്കുകയും, സമാധാനപരമായ ചർച്ചകൾക്ക് വഴിതുറക്കണമെന്ന് ആവശ്യപ്പെടുകയും ചെയ്തിട്ടുണ്ട്.

കഴിഞ്ഞ ജൂലൈയിൽ ഇറാൻ സന്ദർശിച്ചപ്പോൾ, റഷ്യയുടെ മുൻ പ്രസിഡന്റും നിലവിലെ സുരക്ഷാ കൗൺസിൽ ഡെപ്യൂട്ടി ചെയർമാനുമായ ദിമിത്രി മെദ്‌വദേവ് പറഞ്ഞത്, ‘ഇറാൻ കാരണം അമേരിക്കയ്ക്ക് ഒരു ഭീഷണിയും ഉണ്ടായിരുന്നില്ല, അതിനാൽ തന്നെ ഈ ആക്രമണത്തിന് ഒരു ന്യായവുമില്ല’ എന്നായിരുന്നു.

സെപ്റ്റംബർ അവസാനത്തിൽ, ഇറാൻ യു.എസിന് ഒരു സമാധാന നിർദേശം നൽകിയതായി ഇറാന്റെ വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കിയിരുന്നു.

ഗൾഫ് മേഖലയിൽ നിന്നുള്ള എണ്ണ കയറ്റുമതിയിൽ ഏറ്റവും പ്രധാനപ്പെട്ട ഹോർമുസ് കടലിടുക്കിലൂടെയുള്ള കപ്പൽ യാത്രകൾ വീണ്ടും സാധാരണ നിലയിലാക്കാൻ തയ്യാറാണെന്ന് ഈ നിർദ്ദേശത്തിലൂടെ ഇറാൻ അറിയിച്ചു.

യുദ്ധം തുടങ്ങിയ ശേഷം തങ്ങൾ ഏർപ്പെടുത്തിയ കപ്പൽ വിലക്ക് നീക്കാൻ തയ്യാറാണെന്നും, പകരം ഇറാനെതിരെയുള്ള യു.എസ് ഉപരോധം പിൻവലിക്കണമെന്നും എണ്ണ വിൽപ്പനയ്ക്കുള്ള നിയന്ത്രണങ്ങൾ ഒഴിവാക്കണമെന്നും മരവിപ്പിച്ച പണം വിട്ടുനൽകണമെന്നും ഇറാൻ ആവശ്യപ്പെടുന്നു.

മാത്രമല്ല, ലെബനനിലെ ഇസ്രഈൽ ആക്രമണം ഉൾപ്പെടെ എല്ലാ മേഖലകളിലെയും യുദ്ധം പൂർണമായി അവസാനിപ്പിക്കണമെന്നും ഇറാൻ ആവശ്യപ്പെടുന്നുണ്ട്.

കഴിഞ്ഞ മാസം ന്യൂയോർക്കിൽ നടന്ന യു.എൻ പൊതുസഭയിൽ സംസാരിക്കവേ, ചർച്ചകൾക്ക് തങ്ങൾ ഒരുക്കമാണെന്നും എന്നാൽ ആരുടെയും ഭീഷണിക്ക് വഴങ്ങി ഒത്തുതീർപ്പിനില്ലെന്നും ഇറാൻ പ്രസിഡന്റ് പെസെഷ്കിയൻ വ്യക്തമാക്കിയിരുന്നു.

കഴിഞ്ഞ കുറച്ചു ദിവസങ്ങളായി ഇരുരാജ്യങ്ങളും തമ്മിൽ അണിയറയിൽ ചർച്ചകൾ നടക്കുന്നുണ്ടെന്ന് വാർത്തകൾ വന്നിരുന്നെങ്കിലും, ഇറാന്റെ നിർദേശങ്ങൾ പൂർണമായും തള്ളിക്കളയുകയാണ് പ്രസിഡന്റ് ട്രംപ് ചെയ്തത്. ‘ഇറാൻ ഒരു കരാർ ആഗ്രഹിക്കുന്നുണ്ട്, പക്ഷേ എനിക്ക് സ്വീകാര്യമായ തരത്തിലുള്ള ഒന്നല്ല അത്,’ എന്ന് അദ്ദേഹം മാധ്യമങ്ങളോട് പറഞ്ഞു.

അടുത്ത ആഴ്ചകളിൽ തന്നെ ഇറാനെതിരെ വീണ്ടും ആക്രമണം ഉണ്ടായേക്കാമെന്ന സൂചനയും യു.എസ് പ്രസിഡന്റ് നൽകിയിട്ടുണ്ട്.

Content Highlight:Iran is trying to end the conflict; the fault is not theirs: Putin.