സൂപ്പര് താരം വിരാട് കോഹ്ലി കഴിഞ്ഞ ദിവസം ടി – 20 ക്രിക്കറ്റില് 14000 റണ്സ് നേടുന്ന ആദ്യ ഇന്ത്യന് താരമായി മാറിയിരുന്നു. ഐ.പി.എല്ലില് കഴിഞ്ഞ ദിവസം നടന്ന റോയല് ചലഞ്ചേഴ്സ് ബെംഗളൂരു – കൊല്ക്കത്ത നൈറ്റ് റൈഡേഴ്സ് മത്സരത്തിലാണ് താരത്തിന്റെ ചരിത്ര നേട്ടം.
മത്സരത്തില് കോഹ്ലി അപരാജിത സെഞ്ച്വറി നേടിയിരുന്നു. 60 പന്തില് പുറത്താവാതെ 105 റണ്സായിരുന്നു താരത്തിന്റെ സമ്പാദ്യം. മൂന്ന് സിക്സറുകളും 11 ഫോറുകളുമാണ് താരത്തിന്റെ ബാറ്റില് നിന്ന് പിറന്നത്.
വിരാട് കോഹ്ലി. Photo: Royal Challengers Bengaluru/x.com
175.00 സ്ട്രൈക്ക് റേറ്റില് ബാറ്റ് ചെയ്ത ഇന്നിങ്സിനിടയില് 78 റണ്സ് സ്കോര് ചെയ്തതോടെയാണ് കോഹ്ലി 14000 റണ്സ് എന്ന നാഴികക്കല്ല് പിന്നിട്ടത്. 409ാം ഇന്നിങ്സിലാണ് താരത്തിന്റെ നേട്ടം. ഇതോടെ ഈ നേട്ടത്തില് ഇന്നിങ്സുകളുടെ അടിസ്ഥാനത്തിൽ ഏറ്റവും വേഗത്തില് എത്തുന്ന താരമെന്ന പട്ടവും വിരാട് സ്വന്തം പേരില് കുറിച്ചു.
വിന്ഡീസ് ഇതിഹാസം ക്രിസ് ഗെയ്ലിനെ മറികടന്നാണ് കോഹ്ലിയുടെ ഈ കുതിപ്പ്. ഗെയ്ല് 423 ഇന്നിങ്സുകളില് കളിച്ചാണ് 14000 ടി – 20 റണ്സ് പൂര്ത്തിയാക്കിയത്. ഇതിനെ പിന്തള്ളിയാണ് കോഹ്ലി ഇപ്പോള് തലപ്പത്തെത്തിയിരിക്കുന്നത്.
(താരം – ടീം – ഇന്നിങ്സ് എന്നീ ക്രമത്തില്)
വിരാട് കോഹ്ലി – ഇന്ത്യ – 409
ക്രിസ് ഗെയ്ല് – വെസ്റ്റ് ഇന്ഡീസ് – 423
ഡേവിഡ് വാര്ണര് – ഓസ്ട്രലിയ – 431
ജോസ് ബട്ലര് – ഇംഗ്ലണ്ട് – 468
അലക്സ് ഹെയ്ല്സ് – ഇംഗ്ലണ്ട് – 505
വിരാട് കോഹ്ലി. Photo: iplt20.com
നിലവില് വിരാടിന് ടി – 20 ക്രിക്കറ്റില് 14027 റണ്സുണ്ട്. കുട്ടി ക്രിക്കറ്റില് അഞ്ച് ടീമുകള്ക്ക് വേണ്ടി കളത്തിലിറങ്ങിയാണ് താരത്തിന്റെ ചരിത്രനേട്ടം. ഇന്ത്യ, ഇന്ത്യന്സ്, ദല്ഹി, റോയല് ചലഞ്ചേഴ്സ് ബാംഗ്ലൂര്, റോയല് ചലഞ്ചേഴ്സ് ബെംഗളൂരു എന്നീ ടീമുകളിലാണ് താരം ഈ ഫോര്മാറ്റില് കളിച്ചിട്ടുള്ളത്.
Content Highlight: IPL 2026: RCB vs KKR: Virat Kohli quickest player to reach 14000 T20 runs by surpassing Chris Gayle
