ഐ.പി.എല് 2025 പോയിന്റ് പട്ടികയിലെ അവസാന സ്ഥാനക്കാരുടെ പോരാട്ടത്തില് ടോസ് ഭാഗ്യം സണ്റൈസേഴ്സിന്. ടോസ് നേടിയ ഹൈദരാബാദ് നായകന് ധോണിപ്പടയെ ബാറ്റിങ്ങിനയച്ചു. ചെന്നൈ സൂപ്പര് കിങ്സിന്റെ ഹോം ഗ്രൗണ്ടായ ചെപ്പോക്കിലെ എം.എ ചിദംബരം സ്റ്റേഡിയമാണ് വേദി.
കരിയറിലെ 400ാം ടി-20 മത്സരത്തിനാണ് ചെന്നൈ നായകന് കളത്തിലിറങ്ങുന്നത്. ഈ നേട്ടത്തിലെത്തുന്ന നാലാമത് ഇന്ത്യന് താരവും രണ്ടാമത് ഇന്ത്യന് വിക്കറ്റ് കീപ്പറുമാണ് സൂപ്പര് കിങ്സ് നായകന്.
ചെപ്പോക്കില് ഒരിക്കല്പ്പോലും സണ്റൈസേഴ്സിനോട് പരാജയപ്പെട്ടിട്ടില്ല എന്ന റെക്കോഡ് കൈമുതലാക്കിയാണ് ഹോം ടൗണ് ഹീറോസ് സീസണിലെ എട്ടാം മത്സരത്തിനിറങ്ങുന്നത്. ചെപ്പോക്കില് അഞ്ച് തവണയാണ് സൂപ്പര് കിങ്സും സണ്റൈസേഴ്സുമേറ്റുമുട്ടിയത്. ഈ അഞ്ച് മത്സരത്തിലും അവസാന ചിരി സൂപ്പര് കിങ്സിന്റേതായിരുന്നു.
ചെപ്പോക്കില് ഓരോ ടീമിനെതിരെയും ചെന്നൈ സൂപ്പര് കിങ്സിന്റെ വിജയശതമാനം
നിലവില് പോയിന്റ് പട്ടികയില് സൂപ്പര് കിങ്സ് പത്താം സ്ഥാനത്താണ്. സണ്റൈസേഴ്സാകട്ടെ ഒമ്പതാം സ്ഥാനത്തും. എട്ട് മത്സരത്തില് രണ്ട് വിജയവും ആറ് തോല്വിയുമായി നാല് പോയിന്റാണ് ഇരു ടീമുകള്ക്കുമുള്ളത്. നെറ്റ് റണ് റേറ്റാണ് ഇരു ടീമുകളെയും തമ്മില് വേര്തിരിക്കുന്നത്.
മത്സരത്തില് വിജയിക്കുന്ന ടീം രാജസ്ഥാന് റോയല്സിനെ മറികടന്ന് എട്ടാം സ്ഥാനത്തേക്ക് കുതിക്കും. ടൂര്ണമെന്റില് പ്രസക്തമായി തുടരണമെങ്കില് ഇരു ടീമുകള്ക്കും വിജയം അനിവാര്യമാണ്. ആറ് മത്സരം വീതം ശേഷിക്കുന്നതിനാല് തന്നെ ഇനിയുള്ള മത്സരങ്ങള് ഇരു ടീമുകള്ക്കും വിജയം നിര്ണായകമാണ്.
അതേസമയം ഓപ്പണിങ് കോമ്പിനേഷന് തന്നെ മാറ്റി സുപ്രധാന മാറ്റങ്ങളുമായാണ് ഇരു ടീമുകളും കളത്തിലിറങ്ങുന്നത്.
