![?php echo $post['title']; ?>](https://assets.doolnews.com/w/900x473/2026/10/sir.jpg)
ഹൈദരാബാദ്: വോട്ടര്‍പട്ടികയില്‍ നിന്ന് പേരുകള്‍ നീക്കം ചെയ്യുന്നതിനായി വ്യാജമായി ഫോം ഏഴ് അപേക്ഷകള്‍ സമര്‍പ്പിച്ചെന്ന പരാതിയില്‍ തെലങ്കാനയില്‍ ആദ്യ എഫ്.ഐ.ആര്‍ രജിസ്റ്റര്‍ ചെയ്തു.
ഹൈദരാബാദിലെ ചിക്കഡ്പള്ളി പൊലീസാണ് മുസീറാബാദ് മണ്ഡലത്തിലെ ബി.ജെ.പി ബൂത്ത് ലെവല്‍ ഏജന്റായ എസ്. ബാലചന്ദറിനെതിരെ കേസെടുത്തത്.
മുസീറാബാദ് മണ്ഡലത്തിലെ പോളിങ് സ്‌റ്റേഷന്‍ നമ്പര്‍ 210ല്‍ 31 വോട്ടര്‍മാരുടെ പേരുകള്‍ വോട്ടര്‍പട്ടികയില്‍ നിന്ന് നീക്കം ചെയ്യണമെന്ന് ആവശ്യപ്പെട്ട് ഫോം ഏഴ് അപേക്ഷകള്‍ സമര്‍പ്പിച്ചെന്നാണ് പരാതി. അപേക്ഷകള്‍ മുന്‍കൂട്ടി തയ്യാറാക്കിയതാണെന്നും വോട്ടര്‍മാരുടെ സമ്മതമോ ഒപ്പോ ഉണ്ടായിരുന്നില്ലെന്നുമുള്ള പരാതികള്‍ ഉയര്‍ന്നിരുന്നു.
സംഭവത്തില്‍ തെരഞ്ഞെടുപ്പ് രജിസ്‌ട്രേഷന്‍ ഓഫീസറുടെ പരാതിയെ തുടര്‍ന്നാണ് പൊലീസ് നടപടി.
അപേക്ഷകളിലെ ഒപ്പുകളും വോട്ടര്‍മാരുടെ വിവരങ്ങളും പൊലീസ് പരിശോധിച്ചുവരികയാണ്. സമാനമായ അപേക്ഷകള്‍ മറ്റിടങ്ങളിലും സമര്‍പ്പിച്ചിട്ടുണ്ടോയെന്നും അന്വേഷണം നടക്കുന്നുണ്ട്.
ഇതിനിടെ, ഫോം ഏഴ് ദുരുപയോഗം ചെയ്ത് അര്‍ഹരായ വോട്ടര്‍മാരുടെ പേരുകള്‍ നീക്കം ചെയ്യാന്‍ ശ്രമിക്കുന്നവര്‍ക്കെതിരെ നടപടി സ്വീകരിക്കണമെന്ന് തെലങ്കാന ചീഫ് ഇലക്ടറല്‍ ഓഫീസര്‍ നിര്‍ദേശം നല്‍കിയിരുന്നു.
വ്യാജ വിവരങ്ങളോ തെറ്റായ പ്രഖ്യാപനങ്ങളോ നല്‍കി ഫോം ഏഴ് ഉള്‍പ്പെടെയുള്ള അപേക്ഷകള്‍ സമര്‍പ്പിക്കുന്നവര്‍ക്കെതിരെ നിയമനടപടി സ്വീകരിക്കാമെന്നും തെരഞ്ഞെടുപ്പ് ഉദ്യോഗസ്ഥര്‍ പറഞ്ഞതായി റിപ്പോര്‍ട്ടുണ്ട്.
അതേസമയം, ഫോം ഏഴ് അപേക്ഷകള്‍ സമര്‍പ്പിക്കുന്നതുകൊണ്ട് മാത്രം വോട്ടര്‍പട്ടികയില്‍ നിന്ന് പേര് നീക്കം ചെയ്യപ്പെടില്ല.
അപേക്ഷ പരിശോധിക്കുകയും ആവശ്യമായ പരിശോധനകള്‍ പൂര്‍ത്തിയാക്കുകയും ചെയ്ത ശേഷമാണ് പേര് നീക്കം ചെയ്യുന്നതില്‍ അന്തിമ തീരുമാനം എടുക്കുന്നത്.
ബൂത്ത് ഏജന്റുമാര്‍ ഇത്തരം അപേക്ഷകള്‍ സമര്‍പ്പിച്ചെന്ന പരാതികള്‍ നിഷേധിച്ച് ബി.ജെ.പി നേതാക്കള്‍ പ്രതികരിച്ചതായും റിപ്പോര്‍ട്ടില്‍ പറയുന്നു.
Content Highlights: FIR registered against BJP agent in Telangana for fraudulently submitting Form-7 to remove names from the voters’ list.
