തിരുവനന്തപുരം: സി.പി.ഐ.എം എം.പി ജോണ്‍ ബ്രിട്ടാസിനെ ലക്ഷ്യമിട്ടുള്ള പ്രചരണങ്ങളില്‍ പ്രതികരണവുമായി വിദ്യാഭ്യാസമന്ത്രി വി. ശിവന്‍കുട്ടി.

കേന്ദ്രത്തിന്റെ പി.എം ശ്രീ പദ്ധതിയില്‍ ജോണ്‍ ബ്രിട്ടാസ് ഇടപെടല്‍ നടത്തിയത് സംസ്ഥാനത്തിന് അര്‍ഹമായ ഫണ്ട് ലഭിക്കുന്നതിനായാണ്. സംസ്ഥാനത്തെ എല്ലാ വകുപ്പുകള്‍ക്കും ലഭിക്കേണ്ട കേന്ദ്ര ഫണ്ട് നേടിയെടുക്കാന്‍ എം.പിമാര്‍ ഒറ്റക്കെട്ടായി പരിശ്രമിക്കണമെന്നത് മുഖ്യമന്ത്രി വിളിച്ചുചേര്‍ത്ത യോഗത്തിലെ പൊതുതീരുമാനമായിരുന്നുവെന്നും വി. ശിവന്‍കുട്ടി പ്രതികരിച്ചു.

ഫേസ്ബുക്ക് കുറിപ്പിലൂടെയാണ് മന്ത്രിയുടെ പ്രതികരണം. യോഗത്തിലെ തീരുമാനം നടപ്പിലാക്കാനുള്ള ആര്‍ജ്ജവമാണ് ജോണ്‍ ബ്രിട്ടാസ് കാണിച്ചത്. അതിനെ അഭിനന്ദിക്കുന്നു. സമഗ്ര ശിക്ഷാ ഫണ്ട് കേരളത്തിന് ലഭിക്കുന്നതിനായി താനും ജോണ്‍ ബ്രിട്ടാസും അടക്കമുള്ളവര്‍ കേന്ദ്രമന്ത്രിയുമായി നിരവധി തവണ ബന്ധപ്പെട്ടിട്ടുണ്ട്. അത് നമ്മുടെ കുട്ടികള്‍ക്ക് അവകാശപ്പെട്ട പണം നേടിയെടുക്കാനാണെന്നും മന്ത്രി വ്യക്തമാക്കി.

നാടിന്റെ ആവശ്യത്തിന് വേണ്ടി ഇടപെടല്‍ നടത്തുമ്പോള്‍ അതിനെ വളച്ചൊടിക്കുന്നത് രാഷ്ട്രീയ പാപ്പരത്തമാണെന്നും അദ്ദേഹം വിമര്‍ശിച്ചു. ആര്‍.എസ്.എസിനെതിരായ പോരാട്ടത്തില്‍ തനിക്കോ ജോണ്‍ ബ്രിട്ടാസിനോ കോണ്‍ഗ്രസിന്റെയോ ലീഗിന്റെയോ സര്‍ട്ടിഫിക്കറ്റ് ആവശ്യമില്ലെന്നും മന്ത്രി കൂട്ടിച്ചേര്‍ത്തു.

ബി.ജെ.പിക്ക് രാജ്യസഭയില്‍ ഭൂരിപക്ഷം തികയ്ക്കാന്‍ സ്വന്തം രാജ്യസഭാ സീറ്റ് രാജിവെച്ച് ഒഴിഞ്ഞുകൊടുത്ത നേതാവാണ് കോണ്‍ഗ്രസിന്റെ സംഘടനാ ജനറല്‍ സെക്രട്ടറി കെ.സി. വേണുഗോപാല്‍. പാര്‍ലമെന്റില്‍ നിര്‍ണായക വോട്ടെടുപ്പ് നടക്കുമ്പോള്‍ കല്യാണത്തിന് പോയും മറ്റും വോട്ടെടുപ്പില്‍ നിന്ന് വിട്ടുനിന്ന ലീഗ് എം.പിമാരും തങ്ങളെ പഠിപ്പിക്കാന്‍ വരേണ്ടതില്ലെന്നും അദ്ദേഹം പറഞ്ഞു.

കോണ്‍ഗ്രസ് ഭരിക്കുന്ന സംസ്ഥാനങ്ങള്‍ കേന്ദ്രത്തില്‍ നിന്ന് കോടിക്കണക്കിന് രൂപ നേടിയെടുത്തിട്ടുണ്ടെന്നും മന്ത്രി ചൂണ്ടിക്കാട്ടി.

കേരളത്തിലെ പാവപ്പെട്ട കുട്ടികള്‍ക്കും പ്രത്യേക പരിഗണന അര്‍ഹിക്കുന്ന കുട്ടികള്‍ക്കും ലഭിക്കേണ്ട ഉച്ചക്കഞ്ഞിയ്ക്കും പാഠപുസ്തകങ്ങള്‍ക്കുമുള്ള വിഹിതം നിഷേധിക്കുന്ന കേന്ദ്ര സമീപനത്തിനെതിരെ യു.ഡി.എഫ് എം.പിമാര്‍ ഇതുവരെ മിണ്ടാന്‍ തയ്യാറായിട്ടില്ല.

നാടിനുവേണ്ടി സംസാരിക്കുന്നവരെ ആക്ഷേപിക്കാന്‍ ശ്രമിക്കുന്നത് ജനങ്ങള്‍ തിരിച്ചറിയുക തന്നെ ചെയ്യും. രണ്ട് മലയാളി കേന്ദ്ര മന്ത്രിമാര്‍ നമുക്കുണ്ട്. കേരളത്തെ സംബന്ധിച്ചിടത്തോളം ‘ചുക്കിനും ചുണ്ണാമ്പിനും ഉപകാരമില്ലാത്തവരാണവര്‍’ എന്നും മന്ത്രി വി. ശിവന്‍കുട്ടി വിമര്‍ശിച്ചു.

വലിയ വായില്‍ സംസാരിച്ചും സാധാരണക്കാരോട് ധാര്‍ഷ്ഠ്യം കാണിച്ചും ‘കലുങ്ക് യുദ്ധം’ നടത്തിയുമൊക്കെയാണ് അവര്‍ നേരം കളയുന്നതെന്നും വിമര്‍ശനമുണ്ട്. സുരേഷ് ഗോപി, ജോര്‍ജ് കുര്യന്‍ എന്നിവരെ ഉദ്ദേശിച്ചാണ് മന്ത്രിയുടെ പരാമര്‍ശം.

കേരളത്തിന്റെ വികസനവുമായി ബന്ധപ്പെട്ട് ഒരു ചെറുവിരല്‍ അനക്കാന്‍ ഇവര്‍ തയ്യാറല്ലെന്നും ഇവരെയും മലയാളികള്‍ തിരിച്ചറിഞ്ഞു കഴിഞ്ഞുവെന്നും ശിവന്‍കുട്ടി പറഞ്ഞു.

Content Highlight: V. Sivankutty responds to campaigns targeting John Brittas