1983ല് തിയേറ്ററുകളിലെത്തിയ ചിത്രമാണ് എന്റെ മാമാട്ടിക്കുട്ടിയമ്മയ്ക്ക്. ഫാസിലിന്റെ സംവിധാനത്തില് എത്തിയ ചിത്രത്തില് ഭരത് ഗോപി, മോഹന്ലാല്, ശാലിനി, സംഗീത നായിക്, പൂര്ണ്ണിമ ജയറാം എന്നിവരാണ് ചിത്രത്തില് കേന്ദ്ര കഥാപാത്രത്തെ അവതരിപ്പിച്ചത്.
ഇപ്പോള് ഭരത് ഗോപിയുടെ അഭിനയത്തെ കുറിച്ച് സംസാരിക്കുകയാണ് മോഹന്ലാല്. എന്റെ മാമാട്ടികുട്ടിയമ്മയ്ക്ക്, രസതന്ത്രം, അഗ്നിദേവന് തുടങ്ങിയ സിനിമകളിലെല്ലാം മോഹന്ലാലും ഗോപിയും തമ്മിലുള്ള കൂട്ടുകെട്ട് ശ്രദ്ധ നേടിയിരുന്നു. ഭരത് ഗോപിക്ക് കുട്ടികളുടെ മനസാണെന്ന് എന്റെ മാമാട്ടികുട്ടിയമ്മയ്ക്ക് എന്ന സിനിമയില് അഭിനയിക്കുമ്പോള് മനസിലായെന്ന് മോഹന്ലാല് പറയുന്നു.
കണ്ണടച്ച് തുറക്കുന്ന വേഗത്തിലായിരുന്നു ഭരത് ഗോപി കഥാപാത്രത്തിലേക്കുള്ള വേഷപ്പകര്ച്ച നടത്തുന്നതെന്നും മഹാനടന്മാര്ക്ക് മാത്രം സാധ്യമാകുന്ന കാര്യമാണ് അതെന്നും അദ്ദേഹം കൂട്ടിച്ചേര്ത്തു.
‘മാമാട്ടിക്കുട്ടിയമ്മയില് നായകനും നായികയും ഒരു കുഞ്ഞിമോളായിരുന്നു എന്ന് പറയുന്നതാവും ശരി. അഭിനയിക്കുമ്പോള് മാത്രമായിരുന്നില്ല, ശരിക്കും ഒരു കുഞ്ഞിന്റെ മനസാണ് ഗോപിച്ചേട്ടനെന്ന് അന്നുതന്നെ ഞാന് തിരിച്ചറിഞ്ഞു. ബേബി ശാലിനിയെ മടിയിലിരുത്തി ലാളിക്കുമ്പോഴും ആളൊരുങ്ങി അരങ്ങൊരുങ്ങി എന്ന പാട്ടിനൊത്ത് ശാലിനിയോടൊപ്പം ആടിപ്പാടുമ്പോഴും ഒരു കുട്ടിയായി മാറുകയായിരുന്നു അദ്ദേഹം.
ഏത് കഥാപാത്രത്തിനും ആ ശരീരം വഴങ്ങുമായിരുന്നു. അല്ലെങ്കില് ഗോപിച്ചേട്ടന് വഴക്കിയെടുക്കുമായിരുന്നു. അത് കണ്ണടച്ച് തുറക്കുന്ന വേഗത്തിലായിരുന്നു. എത്രമാത്രം വൈവിധ്യമായിരുന്നു അദ്ദേഹത്തിന്റെ പകര്ന്നാട്ടങ്ങള്. കൊടിയേറ്റത്തിലെ ശങ്കരന്കുട്ടിയും യവനികയിലെ തബലിസ്റ്റ് അയ്യപ്പനും, ഓര്മ്മയ്ക്കായിലെ ഊമയും പാളങ്ങളിലെ എഞ്ചിന് ഡ്രൈവറും കള്ളന് പവിത്രനിലെ മാമച്ചനും കാറ്റത്തെ കിളിക്കൂടിലെ ഷേക്സ്പിയര് കൃഷ്ണപിള്ളയും അപ്പുണ്ണിയിലെ അയ്യപ്പന് നായരും ഒന്നായിരുന്നില്ല.
എല്ലാം വ്യത്യസ്തമായ ജീവിതരൂപങ്ങളായിരുന്നു. അത്ഭുതം തോന്നും, എങ്ങനെ ഈ മനുഷ്യന് ഇത്രമാത്രം വേഷപ്പകര്ച്ചകളിലൂടെ സഞ്ചരിച്ചുവെന്ന്. മഹാനടന്മാര്ക്ക് മാത്രം സാധ്യമാകുന്ന കാര്യമാണത്. ശരിക്കും ഭരത് ഗോപി മഹാനടന് തന്നെയായിരുന്നു,’ മോഹന്ലാല് പറയുന്നു.
Content Highlight: Mohanlal Talks About Bharath Gopi
