സിനിമാപ്രേമികളുടെ ചര്ച്ച മുഴുവന് രജിനിയും കമല് ഹാസനുമൊന്നിക്കുന്ന ചിത്രത്തെക്കുറിച്ചാണ്. സ്റ്റൈല് മന്നനും ഇന്ത്യന് സിനിമയുടെ എന്സൈക്ലോപീഡിയയും ഒന്നിക്കുന്ന ചിത്രത്തിന്റെ ഗ്ലിംപ്സ് ഇന്ന് പുറത്തുവിട്ടിരുന്നു. നെല്സന്റെ ട്രേഡ് മാര്ക്ക് സ്റ്റൈലിലൊരുക്കിയ പ്രൊമോയില് രണ്ട് താരങ്ങളും കട്ടക്ക് നിന്ന് സ്കോര് ചെയ്തെന്നാണ് ആരാധകരുടെ വാദം.
ചിത്രത്തില് വില്ലനായി വേഷമിടുന്നത് ആരായിരിക്കുമെന്നാണ് പലരും ഉറ്റുനോക്കുന്നത്. നായകനൊപ്പം ഈക്വലായി സ്കോര് ചെയ്യുന്ന വില്ലന്മാരാണ് നെല്സണ് സംവിധാനം ചെയ്ത സിനിമകളിലെല്ലാം. ഈ പ്രൊജക്ടിലും ആര് വില്ലന് വേഷം ചെയ്യുമെന്ന ചര്ച്ചകള് ഇതിനോടകം ചൂടുപിടിച്ചുകഴിഞ്ഞു. മലയാളത്തിലെ പല സൂപ്പര്താരങ്ങളുടെയും പേര് ലിസ്റ്റില് ഉയര്ന്നുകേള്ക്കുന്നുണ്ട്.
മമ്മൂട്ടിയോ മോഹന്ലാലോ ആയിരിക്കും വില്ലനായെത്തുക എന്നാണ് ചിലര് അഭിപ്രായപ്പെടുന്നത്. ദളപതിക്ക് ശേഷം മമ്മൂട്ടി- രജിനി കോമ്പോ ഒന്നിക്കുമോ എന്നാണ് പലരും ഉറ്റുനോക്കുന്നത്. ജയിലറില് വര്മന് എന്ന കഥാപാത്രമായി നെല്സണ് ആദ്യം മനസില് ഉദ്ദേശിച്ചത് മമ്മൂട്ടിയെയായിരുന്നു. ഇപ്പോള് വീണ്ടും നെല്സന്റെ സിനിമയില് വില്ലനായി മമ്മൂട്ടിയുടെ പേര് ഉയര്ന്നുകേള്ക്കുകയാണ്.
ജയിലറില് മാത്യു എന്ന കഥാപാത്രമായി ഞെട്ടിച്ച മോഹന്ലാല് രജിനിക്കും കമലിനും വില്ലനായെത്തിയാല് ആരാധകര്ക്ക് ഡബിള് ട്രീറ്റായിരിക്കുമെന്ന് ഉറപ്പാണ്. മലയാളത്തില് നിന്ന് പാന് ഇന്ത്യന് റീച്ച് ലഭിച്ച ടൊവിനോയുടെ പേരും ലിസ്റ്റിലുണ്ട്. തമിഴിലെ രണ്ട് സൂപ്പര്താരങ്ങളുടെ വില്ലനായി ടൊവിനോ ഗംഭീര പ്രകടനം കാഴ്ചവെക്കുമെന്ന് ആരാധകര് വിശ്വസിക്കുന്നുണ്ട്.
രജിനിക്കും കമല് ഹാസനും പുറമെ പാന് ഇന്ത്യന് താരങ്ങളും ഈ പ്രൊജക്ടില് അണിനിരന്നേക്കും. ജയിലര് 2ന് ശേഷം നെല്സണ് സംവിധാനം ചെയ്യുന്ന ചിത്രം ബോക്സ് ഓഫീസിലെ പല കളക്ഷന് റെക്കോഡുകളും തിരുത്തിക്കുറിക്കുമെന്ന് ഇപ്പോള് തന്നെ ഉറപ്പായിരിക്കുകയാണ്. ഇരുവരുടെയും റിട്ടയര്മെന്റ് ഈയൊരു ചിത്രത്തോടെയാകുമെന്നും ചിലര് അഭിപ്രായപ്പെടുന്നുണ്ട്.
Content Highlight: Mammootty Mohanlal and Tovino’s name in discussion for villain role in KH RK reunion
