![?php echo $post['title']; ?>](https://assets.doolnews.com/w/900x473/2026/04/wasim-jaffer.jpg)
വെസ്റ്റ് ഇന്‍ഡീസിനെതിരായ ടി-20 പരമ്പരയിലെ നാലാം മത്സരത്തില്‍ ഇന്ത്യ പരാജയപ്പെട്ടിരുന്നു. ഷായ് ഹോപ്പിന്റെ വെടിക്കെട്ട് പ്രകടനത്തിന്റെ മികവിലാണ് വിന്‍ഡീസിന്റെ വിജയം. ഇതോടെ താരത്തെ പ്രശംസിച്ച് രംഗത്ത് വന്നിരിക്കുകയാണ് മുന്‍ ഇന്ത്യന്‍ താരം വസീം ജാഫര്‍. ഹോപ്പിന്റെ കളിയുടെ മികവ് ഏറെ ഉയര്‍ന്നിട്ടുണ്ടെന്നും ഏകദിനത്തില്‍ അദ്ദേഹത്തിന് 20ഓളം സെഞ്ച്വറികളുണ്ടെന്ന കാര്യം പലര്‍ക്കും അറിയില്ലെന്നും ജാഫര്‍ പറഞ്ഞു.
‘സാങ്കേതികമായി വളരെ മികച്ച കളിക്കാരനായതിനാല്‍ തുടക്കത്തില്‍ അദ്ദേഹത്തെ ഒരു ടെസ്റ്റ് താരമായാണ് കണക്കാക്കിയിരുന്നത്. എന്നാല്‍ അദ്ദേഹം തന്റെ കളിയുടെ നിലവാരം ഏറെ ഉയര്‍ത്തിയിട്ടുണ്ടെന്നാണ് ഞാന്‍ കരുതുന്നത്. ഏകദിനത്തിലും അദ്ദേഹം നിരവധി സെഞ്ച്വറികള്‍ നേടിയിട്ടുണ്ട്. അദ്ദേഹത്തിന് 20ഓളം സെഞ്ച്വറികളുണ്ടെന്ന കാര്യം പലര്‍ക്കും അറിയില്ല.
ക്രിക്കറ്റ് കാണുന്നവരോട് ചോദിച്ചാല്‍ പോലും ഏകദിനത്തില്‍ ഷായ് ഹോപ്പിന് 20ഓളം സെഞ്ച്വറികളുണ്ടെന്ന കാര്യം അറിയണമെന്നില്ല. മാത്രമല്ല ടി-20 പരമ്പരയില്‍ ക്രിക്കറ്റില്‍ അദ്ദേഹം തന്റെ കളിയെ മറ്റൊരു തലത്തിലേക്ക് ഉയര്‍ത്തിയിരിക്കുകയാണ്,’ വസീം ജാഫര്‍ തന്റെ യൂട്യൂബ് ചാനലില്‍ പറഞ്ഞു.
Captain FANTASTIC. ✨🤩 The first West Indian with 3️⃣ T20I 💯s. 🔥 #INDvWI | #MenInMaroon https://t.co/N2Y7JGUUxF
— Windies Cricket (@windiescricket) October 14, 2026
ഹൈദരാബാദിലെ രാജീവ് ഗാന്ധി സ്റ്റേഡിയത്തില്‍ നടന്ന മത്സരത്തില്‍ ടോസ് നേടിയ ഇന്ത്യ ബൗളിങ് തെരഞ്ഞെടുക്കുകയായിരുന്നു. തുടര്‍ന്ന് ആദ്യം ബാറ്റ് ചെയ്ത വിന്‍ഡീസ് മൂന്ന് വിക്കറ്റ് നഷ്ടത്തില്‍ 247 റണ്‍സിന്റെ കൂറ്റന്‍ ടോട്ടലാണ് ഇന്ത്യക്കെതിരെ ഉയര്‍ത്തിയത്.
വലിയ വിജയലക്ഷ്യത്തിലേക്ക് ബാറ്റെടുത്ത ഇന്ത്യയുടെ ഇന്നിങ്സ് 19.3 ഓവറില്‍ 223 റണ്‍സില്‍ അവസാനിക്കുകയായിരുന്നു. അവസാന വിക്കറ്റും കയ്യില്‍ പിടിച്ച് ബാറ്റ് ചെയ്ത ഇന്ത്യ, അര്‍ഷ്ദീപ് സിങ്ങിന്റെ റിട്ടയേഡ് ഹേര്‍ട്ടോടെ തോല്‍വി സമ്മതിക്കുകയായിരുന്നു.
മത്സരത്തില്‍ ക്യാപ്റ്റന്‍ ഷായ് ഹോപ്പിന്റെ സെഞ്ച്വറി കരുത്തിലാണ് വിന്‍ഡീസ് വമ്പന്‍ സ്‌കോറിലെത്തിയത്. ബാക് ടു ബാക് സിക്സര്‍ പറത്തി നേരിട്ട 50ാം പന്തില്‍ പുറത്താകാതെ 102* റണ്‍സാണ് ഹോപ്പ് അടിച്ചെടുത്തത്. 204.00 എന്ന പ്രഹര ശേഷിയില്‍ ഒമ്പത് സിക്സും നാല് ഫോറും ഉള്‍പ്പെടെയാണ് ഹോപ്പ് സെഞ്ച്വറി പൂര്‍ത്തിയാക്കിയത്. അന്താരാഷ്ട്ര ടി-20യില്‍ താരത്തിന്റെ മൂന്നാം സെഞ്ച്വറിയാണിത്. ഏകദിനത്തില്‍ 152 ഇന്നിങ്‌സില്‍ നിന്ന് 21 സെഞ്ച്വറികളാണ് താരം നേടിയത്.
ഈ വിജയത്തോടെ അഞ്ച് മത്സരങ്ങള്‍ അടങ്ങുന്ന പരമ്പരയില്‍ 2-2ന് സമനില പിടിക്കാന്‍ വിന്‍ഡീസിന് സാധിച്ചിരിക്കുകയാണ്. പരമ്പരയിലെ അഞ്ചാമത്തെയും അവസാനത്തെയും നിര്‍ണായക മത്സരം ഒക്ടോബര്‍ 17ന് ബെംഗളൂരുവിലെ ചിന്നസ്വാമി സ്റ്റേഡിയത്തിലാണ്.
Content Highlight: Wasim Jaffer Talking About Shai Hope
