മലയാളികള്‍ക്ക് ഏറെ പ്രിയപ്പെട്ട നടന്മാരില്‍ ഒരാളാണ് ഷറഫുദ്ദീന്‍. കരിയറിന്റെ തുടക്കത്തില്‍ ഹാസ്യ നടനായും പിന്നീട് നായകനായും വില്ലനായും അഭിനയിച്ച നടന്‍ കൂടിയാണ് അദ്ദേഹം. സംവിധായകന്‍ അല്‍ഫോണ്‍സ് പുത്രന്‍ മലയാളത്തിന് സമ്മാനിച്ച നടനാണ് ഷറഫുദ്ദീന്‍.

അല്‍ഫോണ്‍സിന്റെ നേരം എന്ന സിനിമയിലൂടെ 2013ലാണ് നടന്‍ സിനിമയില്‍ എത്തുന്നത്. പിന്നീട് ഓം ശാന്തി ഓശാന, ഹോംലി മീല്‍സ് തുടങ്ങിയ സിനിമകളില്‍ അഭിനയിച്ചു. എന്നാല്‍ 2015ല്‍ എത്തിയ അല്‍ഫോണ്‍സ് പുത്രന്‍ – നിവിന്‍ പോളി ചിത്രമായ പ്രേമത്തിലെ ഗിരിരാജന്‍ കോഴി എന്ന കഥാപാത്രത്തിലൂടെയാണ് ഷറഫുദ്ദീന്‍ ശ്രദ്ധിക്കപ്പെടുന്നത്.

2020ല്‍ മിഥുന്‍ മാനുവല്‍ തോമസ് രചനയും സംവിധാനവും നിര്‍വഹിച്ച എത്തിയ അഞ്ചാം പാതിരയിലും നടന്‍ അഭിനയിച്ചിരുന്നു. ഈ ക്രൈം ത്രില്ലര്‍ ചിത്രത്തില്‍ ബെഞ്ചമിന്‍ ലൂയിസ് എന്ന കഥാപാത്രമായിട്ടാണ് ഷറഫുദ്ദീന്‍ അഭിനയിച്ചത്. ആ വേഷത്തിലൂടെ നടന് ഏറെ പ്രശംസകള്‍ നേടാന്‍ സാധിച്ചിരുന്നു.

ഇപ്പോള്‍ തന്നെ കൊണ്ട് ചെയ്യാന്‍ പറ്റുമോയെന്ന് സംശയം തോന്നിയ ഒരു കഥാപാത്രം ഏതാണെന്ന ചോദ്യത്തിന് മറുപടി പറയുകയാണ് ഷറഫുദ്ദീന്‍. തന്റെ ഏറ്റവും പുതിയ ചിത്രമായ സംശയം എന്ന സിനിമയുടെ പ്രൊമോഷന്റെ ഭാഗമായി ക്യൂ സ്റ്റുഡിയോയോട് സംസാരിക്കുകയായിരുന്നു നടന്‍.

‘എന്നെ കൊണ്ട് പറ്റുമോയെന്ന് സംശയം തോന്നിയ ഒരു കഥാപാത്രം ഏതാണെന്ന് ചോദിച്ചാല്‍, അത് അഞ്ചാം പാതിര ആകും. എന്നിട്ടും ഞാന്‍ ആ സിനിമ ചെയ്തു. മുമ്പ് ചെയ്ത കഥാപാത്രങ്ങളെയെല്ലാം നോക്കുമ്പോള്‍ അഞ്ചാം പാതിര എന്ന സിനിമയില്‍ എനിക്ക് ചെയ്യാന്‍ ഉണ്ടായിരുന്നത് വേറെ തന്നെ ലീഗിലുള്ള കഥാപാത്രമാണ്.

അത് കൊണ്ട് കഥ കേട്ടപ്പോള്‍ സംശയിച്ചിരുന്നു. ഞാന്‍ ഇങ്ങനെ സിനിമയുടെ അവസാനം വന്ന് പഞ്ചുള്ള മാസ് ഡയലോഗ് പറയണമല്ലോ. അപ്പോള്‍ തിയേറ്ററില്‍ ‘ആരാടാ അത്’ എന്ന് ചോദിച്ച് ആളുകള്‍ കൂവുമോ എന്നതായിരുന്നു എന്റെ സംശയം. ആ പേടി എനിക്ക് ഉണ്ടായിരുന്നു. പക്ഷെ സിനിമ തിയേറ്ററില്‍ വന്നപ്പോള്‍ അങ്ങനെയല്ല സംഭവിച്ചത്,’ ഷറഫുദ്ദീന്‍ പറയുന്നു.

Content Highlight: Sharafudheen Talks About His Character In Anjaam Paathira Movie