ഇന്ത്യക്കെതിരെയുള്ള നാലാം ടി-20യിൽ വെസ്റ്റ് ഇൻഡീസ് 24 റൺസിന് ഇന്ത്യയെ പരാജയപ്പെടുത്തിയിരുന്നു. ഹൈദരാബാദിലെ രാജീവ് ഗാന്ധി സ്റ്റേഡിയത്തിൽ നടന്ന മത്സരത്തിൽ ടോസ് നേടിയ ഇന്ത്യ ബൗളിങ് തെരഞ്ഞെടുക്കുകയായിരുന്നു.

ആദ്യം ബാറ്റ് ചെയ്ത വിൻഡീസ് മൂന്ന് വിക്കറ്റ് നഷ്ടത്തിൽ 247 റൺസിന്റെ കൂറ്റൻ ടോട്ടലാണ് ഇന്ത്യക്കെതിരെ ഉയർത്തിയത്. വലിയ ലക്ഷ്യത്തിലേക്ക് ബാറ്റെടുത്ത ഇന്ത്യയുടെ ഇന്നിങ്സ് 19.3 ഓവറിൽ 223 റൺസിൽ അവസാനിക്കുകയായിരുന്നു. ഈ തകർപ്പൻ വിജയത്തോടെ പരമ്പര 2-2 എന്ന നിലയിൽ സമനിലയിലാക്കാനും കരീബിയൻ പടക്ക് സാധിച്ചു.

ക്യാപ്റ്റൻ ഷായ് ഹോപ്പിന്റെ സെഞ്ച്വറി കരുത്തിലാണ് വിൻഡീസ് വമ്പൻ സ്‌കോറിലെത്തിയത്. ബാക് ടു ബാക് സിക്‌സർ പറത്തി നേരിട്ട 50ാം പന്തിൽ പുറത്താകാതെ 102* റൺസാണ് ഹോപ്പ് അടിച്ചെടുത്തത്. 204.00 എന്ന പ്രഹര ശേഷിയിൽ ഒമ്പത് സിക്‌സും നാല് ഫോറും ഉൾപ്പെടെയാണ് ഹോപ്പ് സെഞ്ച്വറി പൂർത്തിയാക്കിയത്.

ഈ സെഞ്ച്വറിക്ക് പിന്നാലെ ഇന്റർനാഷണൽ ടി-20യിൽ വിക്കറ്റ് കീപ്പറെന്ന നിലയിൽ ഏറ്റവും കൂടുതൽ സെഞ്ച്വറികൾ നേടുന്ന താരമായും ഹോപ്പ് മാറി. ഈ നേട്ടത്തിൽ മലയാളി താരം സഞ്ജു സംസണിനൊപ്പമാണ്‌ വിൻഡീസ് ക്യാപ്റ്റൻ

ടി-20യിൽ വിക്കറ്റ് കീപ്പറെന്ന നിലയിൽ ഏറ്റവും കൂടുതൽ സെഞ്ച്വറി നേടിയ താരം, ടീം, സെഞ്ച്വറികളുടെ എണ്ണം

ഷായ് ഹോപ്പ് – വെസ്റ്റ് ഇൻഡീസ് – 3

സഞ്ജു സാംസൺ – ഇന്ത്യ – 3

ഫിൽ സാൾട്ട് – ഇംഗ്ലണ്ട് – 2

ക്വിന്റൺ ഡി കോക്ക് – സൗത്ത് ആഫ്രിക്ക – 2

ജോസ് ബട്ലർ – ഇംഗ്ലണ്ട് – 2

മത്സരത്തിൽ ഹോപ്പിന് പുറമെ 26 പന്തിൽ 49* റൺസ് നേടി ഷെർഫേൻ റൂഥർഫോർഡ് മികവ് പുലർത്തി. മത്സരത്തിൽ വിൻഡീസിന് വേണ്ടി 21 റൺസാണ് യുവ ഓപ്പണർ ജുവൽ ആൻഡ്രൂ നേടിയത്. ഷിംറോൺ ഹെറ്റ്‌മെയർ 12 പന്തിൽ 32 റൺസിന്റെ വെടിക്കെട്ട് പ്രകടനവും നടത്തി മടങ്ങി. പിന്നീട് ഇറങ്ങിയ റോവ്മാൻ പവൽ 17 പന്തിൽ 24 റൺസും നേടി.

വിൻഡീസ് ബൗളിങ് നിരയിൽ കീമോ പോൾ അഞ്ച് വിക്കറ്റുകൾ നേടി തകർപ്പൻ പ്രകടനമാണ് നടത്തിയത്. ഗുഡാഗേഷ് മോട്ടി രണ്ട് വിക്കറ്റും ഷാമർ സ്പ്രിങർ, റൊമാരിയോ ഷെപ്പേർഡ് എന്നിവർ ഓരോ വീതം വിക്കറ്റും സ്വന്തമാക്കി ടീമിന്റെ വിജയത്തിൽ നിർണായകമായി.

അതേസമയം മത്സരത്തിൽ ഇന്ത്യയ്ക്ക് വേണ്ടി മികച്ച പ്രകടനം കാഴ്ചവെച്ചത് സഞ്ജുവാണ്. മത്സരത്തിൽ 23 പന്തിൽ നിന്ന് നാല് സിക്‌സും ആറ് ഫോറും ഉൾപ്പെടെ 56 റൺസ് നേടിയാണ് സഞ്ജു തിളങ്ങിയത്. 243.48 എന്ന മികച്ച സ്‌ട്രൈക്ക് റേറ്റിലായിരുന്നു സഞ്ജുവിന്റെ ആക്രമണ ബാറ്റിങ്.

സഞ്ജുവിനൊപ്പം തിലക് വർമ 43 റൺസും നിതീഷ് കുമാർ റെഡ്ഢി 41 റൺസും അഭിഷേക് ശർമ 29 സ്വന്തമാക്കി മികച്ച പ്രകടനം നടത്തിയെങ്കിലും 24 റൺസകലെ ടീമിന് വിജയം നഷ്ടമാവുകയായിരുന്നു.

ഇന്ത്യയ്ക്ക് വേണ്ടി അർഷ്ദീപ് സിങ്, പ്രിൻസ് യാദവ്, അക്‌സർ പട്ടേൽ എന്നിവർ ഓരോ വീതം വിക്കറ്റ് വീഴ്ത്തി.

പരമ്പരയിലെ അവസാന മത്സരം ഒക്ടോബർ 17നാണ് നടക്കുന്നത്. ബെംഗളൂരുവിലെ ചിന്നസ്വാമി സ്റ്റേഡിയത്തിൽ നടക്കുന്ന മത്സരത്തിൽ വിജയിക്കുന്ന ടീമിന് പരമ്പര സ്വന്തമാക്കാം.

 

Content Highlight: Shai Hope matches Sanju Samson century record in international T20

 

Related Topics

India VS West Indies Sanju Samson Shai Hope