മലയാള സിനിമാ പ്രേമികൾ വലിയ പ്രതീക്ഷയുടെ കാത്തിരിക്കുന്ന പൃഥ്വിരാജ് ചിത്രമാണ് ആടുജീവിതം.

ബ്ലെസിയുടെ സംവിധാനത്തിൽ ഒരുങ്ങുന്ന ചിത്രം മലയാളത്തിൽ ഏറ്റവും കൂടുതൽ വായിക്കപ്പെട്ട നോവലുകളിൽ ഒന്നായ ആടുജീവിതത്തിന്റെ ചലച്ചിത്രാവിഷ്കാരമാണ്. ചിത്രത്തിന്റെ ഷൂട്ടിങ് അനുഭവങ്ങൾ പങ്കുവെക്കുകയാണ് പൃഥ്വിരാജ്.

കഴിഞ്ഞ ദിവസം ഇറങ്ങിയ ആടുജീവിതത്തിന്റെ ട്രെയ്ലറിന് മികച്ച സ്വീകരണമായിരുന്നു സോഷ്യൽ മീഡിയയിൽ ലഭിച്ചത്. ചിത്രത്തിലെ ഫ്രെയിമുകളും വിശ്വലുകളും വലിയ പ്രശംസ നേടിയിരുന്നു. ട്രെയ്ലറിൽ ഒട്ടകത്തിന്റെ ഒരു ക്ലോസപ്പ് ഷോട്ട് കാണിക്കുന്നുണ്ട്. ആ ഷോട്ട് ഷൂട്ട്‌ ചെയ്തതിനെ കുറിച്ച് പറയുകയാണ് പൃഥ്വി.

ഒരുപാട് ദിവസങ്ങൾ സമയമെടുത്താണ് ആ ഷോട്ട് എടുത്തതെന്നും. ഒട്ടകത്തിന്റെ ആ ഷോട്ട് വേണമെന്ന് സംവിധായകൻ ബ്ലെസിക്ക് നിർബന്ധമായിരുന്നുവെന്നും പൃഥ്വി പറയുന്നു. വാർത്ത സമ്മേളനത്തിൽ സംസാരിക്കുകയായിരുന്നു ചിത്രത്തിന്റെ അണിയറ പ്രവർത്തകർ.

‘ഞാൻ മൃഗങ്ങളോട് യാത്ര പറയുന്ന ഒരു സീനുണ്ട്. ആ സീൻ ഷൂട്ട്‌ ചെയുമ്പോൾ ഞാൻ ഒട്ടകങ്ങൾക്ക് ഭക്ഷണമിട്ട് കൊടുത്തിട്ട് യാത്ര പറയുകയാണ് വേണ്ടത്. അപ്പോഴേക്കും ഒട്ടകങ്ങളുമായി ഹലോ, ഹായ് എന്ന ബന്ധമായിട്ടുണ്ട്. കാരണം അത്രയും നാളായിട്ടുണ്ടാല്ലോ.

ഞങ്ങൾക്ക് എല്ലാവർക്കും ഇഷ്ടമുള്ള ഒരു ഒട്ടകമുണ്ട്. കാണാൻ നല്ല ഭംഗിയുള്ള ഒരു കക്ഷി. പുള്ളിക്കാരനെയാണ് ഞങ്ങൾ ഈ ഷോട്ടിന് വേണ്ടി പിടിച്ച് നിർത്തിയിരിക്കുന്നത്. ഭക്ഷണം ഇട്ട് കൊടുത്തിട്ട് ഞാൻ പോവുകയാണ് എന്ന് പറയുകയാണ്. ഞാൻ പോവാടാ, ഇനി ഞാൻ വരില്ല എന്ന് പറയുന്ന എന്റെ ഷോട്ട് എടുക്കുകയാണ് ഒട്ടകത്തിന്റെ സജക്ഷനിൽ. കഴിച്ചുകൊണ്ടിരുന്ന ഒട്ടകം പെട്ടെന്ന് എഴുന്നേറ്റ് എന്നെ നോക്കി.

പക്ഷെ ബ്ലെസി സാർ ആണല്ലോ, അതുകൊള്ളാം ഇനി ഒട്ടകത്തിന്റെ ഒരു റിയാക്ഷൻ എടുക്കാമെന്ന് പറഞ്ഞു. തമാശ പറയുകയല്ല. എനിക്കോർമയുണ്ട് ഒരു ദിവസം മൂന്നര നാലുമണിക്കാണ് എന്റെ ഷോട്ട് എടുത്തത്. അതുകൊണ്ട് ആ ഒരു സമയത്ത് തന്നെ ഒട്ടകത്തിന്റെയും ഷോട്ട് എടുക്കണമല്ലോ. അല്ലെങ്കിൽ ലൈറ്റ് വേറേ ആയിരിക്കും. അങ്ങനെ എത്രയോ ദിവസങ്ങൾ ഞങ്ങൾ ഷോട്ട് നിർത്തിയിട്ട് ഒട്ടകത്തിന്റെ ഷോട്ടിനായി നിൽക്കും.

എനിക്ക് തോന്നുന്നത് ഒരു ഏഴോ എട്ടോ ദിവസം കഴിഞ്ഞിട്ടാണ് നിങ്ങൾ ഇപ്പോൾ കാണുന്ന ആ കണ്ണിന്റെ ഷോട്ട് കിട്ടിയിട്ടുള്ളത്. അങ്ങനെ ഈ സിനിമ ചിത്രീകരിക്കാൻ കഴിഞ്ഞു എന്നത് എനിക്ക് വലിയ അഭിമാനവും സന്തോഷവും തോന്നുന്ന കാര്യമാണ്,’ പൃഥ്വിരാജ് പറയുന്നു.

Content Highlight: Prithviraj Talk About The Shot Of Camel In Aadujeevitham