കൊച്ചി: പൊതുജനങ്ങള്‍ പെട്രോള്‍ പമ്പിലെ ശുചിമുറി ഉപയോഗിക്കുന്നതുമായി ബന്ധപ്പെട്ട ഇടക്കാല ഉത്തരവില്‍ ഭേദഗതി വരുത്തി ഹൈക്കോടതി. ആര്‍ക്കും എപ്പോള്‍ വേണമെങ്കിലും പെട്രോള്‍ പമ്പുകളിലെ ശുചിമുറി ഉപയോഗിക്കാമെന്നാണ് ഹൈക്കോടതിയുടെ തിരുത്ത്.

നേരത്തെ പെട്രോള്‍ പമ്പിലെ ശുചിമുറി പൊതുജനങ്ങള്‍ക്ക് ഉപയോഗിക്കാന്‍ സാധിക്കില്ലെന്നായിരുന്നു കോടതിയുടെ ഉത്തരവ്. പ്രസ്തുത ഉത്തരവിലാണ് കോടതി ഇപ്പോള്‍ മാറ്റം വരുത്തിയിരിക്കുന്നത്.

സുരക്ഷാ പ്രശ്‌നങ്ങള്‍ ഉണ്ടെങ്കില്‍ മാത്രമേ പൊതുജനങ്ങളുടെ പെട്രോള്‍ പമ്പിലെ ശുചിമുറി ഉപയോഗം തടസപ്പെടുത്താന്‍ കഴിയുള്ളുവെന്നും കോടതി വ്യക്തമാക്കി. എന്നാല്‍ നഗരസഭകള്‍ അധികാരം സ്ഥാപിച്ച് ബോര്‍ഡുകള്‍ സ്ഥാപിക്കരുതെന്നും നിര്‍ദേശമുണ്ട്. തിരുവനന്തപുരം, തൊടുപുഴ നഗരസഭകള്‍ക്കാണ് കോടതിയുടെ നിര്‍ദേശം.

പമ്പിലെ ഉപഭോക്താക്കള്‍ക്ക് മാത്രമേ ശുചിമുറി ഉപയോഗിക്കാനാകൂ എന്നായിരുന്നു നേരത്തെ ജസ്റ്റിസ് സി.എസ്. ഡയസ് പുറപ്പെടുവിച്ച ഇടക്കാല ഉത്തരവില്‍ പറഞ്ഞിരുന്നത്. പെട്രോള്‍ പാമ്പുകള്‍ പൊതുശൗചാലയമാക്കാനുള്ള സര്‍ക്കാരിന്റെ നടപടി കോടതി തടയുകയും ചെയ്തിരുന്നു.

പെട്രോളിയം വ്യാപാരികളുടെ സംഘടന നല്‍കിയ ഹരജി പരിഗണിച്ചുകൊണ്ടായിരുന്നു കോടതിയുടെ നടപടി. പെട്രോള്‍ പമ്പിലെ ശൗചാലയങ്ങള്‍ പൊതുശൗചാലയങ്ങളാണെന്ന് നഗരസഭകള്‍ ബോര്‍ഡ് വെച്ചതിന് പിന്നാലെയാണ് ഹരജിക്കാര്‍ കോടതിയെ സമീപിച്ചത്.

നഗരസഭയുടെ തീരുമാനം പിന്‍വലിക്കണമെന്ന് ആവശ്യപ്പെട്ട് പെട്രോളിയം ട്രേഡേഴ്സ് വെല്‍ഫെയര്‍ ആന്‍ഡ് ലീഗല്‍ സര്‍വീസ് സൊസൈറ്റിയും തിരുവനന്തപുരം, തൊടുപുഴ എന്നിവിടങ്ങളിലെ ഏതാനും പമ്പ് ഉടമകളും കോടതിയെ സമീപിക്കുകയായിരുന്നു. പെട്രോള്‍ പമ്പിലുള്ളത് സ്വകാര്യ ശുചിമുറികളാണെന്നായിരുന്നു ഹരജിക്കാരുടെ വാദം.

ഇത് പൊതുശൗചാലയമാക്കാനുള്ള അധികൃതരുടെ നടപടി ഭരണഘടന ഉറപ്പുനല്‍കുന്ന സ്വത്തവകാശത്തിന്റെ ലംഘനമാണെന്നും നിരന്തരമായി പമ്പുകളിലെ ശുചിമുറികളില്‍ പൊതുജനങ്ങള്‍ കയറി ഇറങ്ങുന്നത് സുരക്ഷാ പ്രോട്ടോക്കോളിന് എതിരാണെന്നും ഹരജിക്കാര്‍ വാദിച്ചിരുന്നു.

പമ്പിലെ ശുചിമുറികള്‍ പൊതുജനങ്ങള്‍ക്ക് തുറന്ന് കൊടുക്കാന്‍ നിയമമില്ലെന്നും ഹരജിക്കാര്‍ പറഞ്ഞിരുന്നു. ഈ വാദങ്ങളുടെ അടിസ്ഥാനത്തിലാണ് കോടതി ഇടക്കാല ഉത്തരവ് പുറപ്പെടുവിച്ചത്.

2025 ഏപ്രിലില്‍ പെട്രോള്‍ പമ്പിലെ ശുചിമുറി തുറന്ന് നല്‍കാത്തതില്‍ അധ്യാപികയ്ക്ക് പെട്രോള്‍ പമ്പ് ഉടമ ഒന്നരലക്ഷം രൂപ നഷ്ടപരിഹാരം നല്‍കണമെന്ന് ഉത്തരവുണ്ടായിരുന്നു. ഉപഭോക്തൃ തര്‍ക്കപരിഹാര കമ്മീഷന്റേതായിരുന്നു ഉത്തരവ്. ഏഴകുളം സ്വദേശിയായ അധ്യാപികയ്ക്കാണ് നഷ്ടപരിഹാരം നല്‍കാന്‍ കമ്മീഷന്‍ ഉത്തരവിട്ടത്.

കോഴിക്കോട് പയ്യോളിയിലുള്ള പെട്രോള്‍ പമ്പ് ഉടമ ഫാത്തിമ ഹന്നയ്ക്കെതിരെയാണ് അധ്യാപിക പരാതി നല്‍കിയത്. പെട്രോള്‍ പമ്പ് അനുവദിക്കുമ്പോള്‍ ശുചിമുറി അടക്കമുള്ള അടിസ്ഥാന സൗകര്യങ്ങള്‍ നിര്‍ബന്ധമായും സ്ഥലത്ത് ഉണ്ടായിരിക്കണം. എന്നാല്‍ ഇതൊന്നും ഇല്ലാതെയാണ് പമ്പ് പ്രവര്‍ത്തിച്ചിരുന്നതെന്നും കമ്മീഷന്‍ കണ്ടെത്തിയിരുന്നു.

Content Highlight: Anyone can use the restroom at the petrol pump at any time; Amendment to the interim order