ശങ്കരാടി മുത്തച്ഛന്റെ സിനിമകളില്‍ എനിക്കിഷ്ടം ആ ചിത്രം; എത്ര കണ്ടാലും മടുക്കില്ല: പാര്‍വതി രാജന്‍ ശങ്കരാടി

മലയാള സിനിമയിലെ പുതുമുഖ നടിയാണ് പാര്‍വതി രാജന്‍ ശങ്കരാടി. മലയാളത്തിലെ ലെജന്ററി നടനായ ശങ്കരാടിയുടെ ബന്ധുവും സംവിധായകന്‍ രാജന്‍ ശങ്കരാടിയുടെ മകളും കൂടിയാണ് നടി. സുരേഷ് ഗോപിയുടെ പാപ്പന്‍ എന്ന ചിത്രത്തിലും പുതുമുഖ സംവിധായകന്‍ ബിന്റോ സ്റ്റീഫന്‍ സംവിധാനം ചെയ്ത പുതിയ ചിത്രമായ പ്രിന്‍സ് ആന്‍ഡ് ഫാമിലി എന്ന ചിത്രത്തിലും പാര്‍വതി അഭിനയിച്ചിട്ടുണ്ട്. ഇപ്പോള്‍ ശങ്കരാടിയുടെ ഇഷ്ടപ്പെട്ട സിനിമകളെ കുറിച്ച് സംസാരിക്കുകയാണ് പാര്‍വതി രാജന്‍ ശങ്കരാടി.

തനിക്ക് ഗോഡ് ഫാദര്‍ സിനിമയിലെ ക്ലൈമാക്‌സ് ഭയങ്കര ഇഷ്ടമാണെന്നും ആ കൈകൊട്ടി വിളിക്കുന്നതെല്ലാം എത്രകണ്ടാലും മടുക്കില്ലെന്നും പാര്‍വതി പറയുന്നു. കൗമുദി മൂവീസിന് നല്‍കിയ അഭിമുഖത്തില്‍ സംസാരിക്കുകയായിരുന്നു പാര്‍വതി രാജന്‍ ശങ്കരാടി.

‘എനിക്ക് ശങ്കരാടി മുത്തച്ഛന്റെ ഗോഡ് ഫാദറിലെ ക്ലൈമാക്‌സിലെ സീനുകളെല്ലാം എനിക്ക് ഭയങ്കര ഇഷ്ടമാണ്. ആ കൈകൊട്ടി വിളിക്കുന്നതെല്ലാം നല്ല രസമാണ്. എത്ര കണ്ടാലും മടുക്കില്ല. പിന്നെ നാടോടിക്കാറ്റ്, സന്ദേശം, തുടങ്ങിയ സിനിമകളിലെല്ലാം എനിക്ക് ശങ്കരാടി മുത്തച്ഛനെ വലിയ ഇഷ്ടമാണ്. എന്നെ ആരെങ്കിലും പരിചയപ്പെടാന്‍ വരുമ്പോള്‍ ഇതാണാ രേഖ എന്നാണ് ആദ്യം പറയുക,’ പാര്‍വതി രാജന്‍ ശങ്കരാടി പറയുന്നു.

ശങ്കരാടി എന്ന പേരിനെ കുറിച്ചും പാര്‍വതി സംസാരിച്ചു. അത് തങ്ങളുടെ വീട്ടുപേരാണെന്നും അച്ഛന്റെ അമ്മാവനാണ് ശങ്കരാടിയെന്നും നടി പറയുന്നു.

‘എന്റെ അടുത്ത് എല്ലാവരും ചോദിക്കും ശങ്കരാടി സാറിന്റെ കൊച്ചുമോളാണോ എന്നൊക്കെ. ആള് കല്ല്യാണം കഴിച്ചിട്ടുണ്ടോ, ആള്‍ക്ക് മക്കളുണ്ടോ എന്നൊക്കെ. പക്ഷെ, കുറേപ്പേര്‍ക്ക് ആള് കല്ല്യാണം കഴിച്ചത് അറിയില്ല. ലേറ്റ് ആയിട്ടാണ് കഴിച്ചത്. അമ്പത് വയസ് കഴിഞ്ഞപ്പോഴാണ് ആള് കല്ല്യാണം കഴിക്കുന്നത് തന്നെ. കുട്ടികളില്ല.

ശരിക്കും അത് ഞങ്ങളുടെ വീട്ടുപേരാണ്. അച്ഛന്റെ അമ്മാവനാണ് ശങ്കരാടി മുത്തച്ഛന്‍. അങ്ങനെയാണ് ആ വീട്ടുപേര് എന്ന രീതിയിലേക്ക് എത്തിയത്,’ പാര്‍വതി പറഞ്ഞു.

Content Highlight: Parvathy Rajan Sankaradi talks about her favorite movies of  Shankaradi