ബാലതാരമായി സിനിമയിലേക്കെത്തിയ നടനാണ് കമല്‍ ഹാസന്‍. ഇന്നും സിനിമാ ലോകത്തേ തന്റെ അഭിനയശൈലികൊണ്ട് ഞെട്ടിക്കുന്ന നടനാണ് അദ്ദേഹം. തമിഴ് സിനിമയിലൂടെയാണ് അരങ്ങേറിയതെങ്കിലും കമല്‍ ഹാസന്‍ എന്ന നടനെ ആദ്യമായി നായകനായി അവതരിപ്പിച്ചത് മലയാളം ഇന്‍ഡസ്ട്രിയായിരുന്നു. അഭിനയത്തിന് പുറമെ സംവിധാനം, തിരക്കഥ, നിര്‍മാണം, ഗാനരചന, ഗായകന്‍, മേക്കപ്പ് ആര്‍ട്ടിസ്റ്റ്, കൊറിയോഗ്രാഫര്‍ തുടങ്ങി സകലമേഖലയിലും അദ്ദേഹം തന്റെ കയ്യൊപ്പ് ചാര്‍ത്തിയിട്ടുണ്ട്.

മണിരത്നത്തിന്റെ സംവിധാനത്തില്‍ പുറത്തിറങ്ങാന്‍ പോകുന്ന ഏറ്റവും പുതിയ സിനിമയാണ് തഗ് ലൈഫ്. കമല്‍ ഹാസന് പുറമെ തൃഷ, ചിമ്പു, അശോക് സെല്‍വന്‍, ജോജു ജോര്‍ജ്, അഭിരാമി തുടങ്ങിയവരും ചിത്രത്തില്‍ പ്രധാനവേഷത്തില്‍ എത്തുന്നുണ്ട്. മലയാള സിനിമ തങ്ങളുടെ ആറ്റിട്യൂഡ് മാറ്റിയിട്ടുണ്ടോ എന്ന ചോദ്യത്തോട് പ്രതികരിക്കുകയാണ് ഇപ്പോള്‍ കമല്‍ ഹാസന്‍.

മലയാള സിനിമകള്‍ മണിരത്‌നത്തിന്റെ മനോഭാവം മാറ്റിയിട്ടുണ്ടെന്നും അദ്ദേഹത്തിന്റെ രണ്ടാമത്തെ സിനിമ മലയാളമായിരുന്നുവെന്നും കമല്‍ ഹാസന്‍ പറയുന്നു. സിനിമയോട് അതിയായ പാഷന്‍ ഉള്ള ആളുകളാണ് മലയാളത്തിലുള്ളവരെന്നും ക്രിയേറ്റീവായ, ബുദ്ധിമാന്‍മാരായ ഫിലിം മേക്കേഴ്‌സ് മലയാളത്തിലുണ്ടെന്നും അദ്ദേഹം പറഞ്ഞു.

കൊമേര്‍ഷ്യല്‍ സിനിമകളും അവിടെ നിന്ന് വരാറുണ്ടെന്നും എന്നാല്‍ ഭൂരിഭാഗവും നല്ല സിനിമകള്‍ ചെയ്യുക എന്നാണ് അവര്‍ ആഗ്രഹിക്കുന്നതെന്നും കമല്‍ ഹാസന്‍ കൂട്ടിച്ചേര്‍ത്തു. മലയാളത്തില്‍ നിന്ന് ഒരുപാട് യുവാക്കള്‍ സിനിമകള്‍ ചെയ്യാന്‍ ആത്മവിശ്വാസത്തോടെ കടന്നു വരാറുണ്ടെന്നും അദ്ദേഹം പറഞ്ഞു.

‘മലയാള സിനിമ മണിരത്‌നത്തിന്റെ ആറ്റിട്യൂഡ് മാറ്റിയിട്ടുണ്ട്. ഇദ്ദേഹത്തിന്റെ രണ്ടാമത്തെ സിനിമ മലയാളമായിരുന്നു. സിനിമയോട് അഭിനിവേശമുള്ള അതുപോലെ വളരെ ബുദ്ധിമാന്മാരായ ധാരാളം ആളുകളുള്ള ഒരു ഇന്‍ഡസ്ട്രിയാണ് മലയാളം. കൊമേര്‍ഷ്യല്‍ സിനിമകളും അവര്‍ ക്രിയേറ്റ് ചെയ്യാറുണ്ട്.

പക്ഷേ ഒരു ഭൂരിഭാഗം ശതമാനവും അല്ലെങ്കില്‍ അവര്‍ ലക്ഷ്യം വെക്കുന്നത് ഒരു നല്ല സിനിമ ഉണ്ടാക്കുക എന്നാണ്. അതുകൊണ്ടാണ് എനിക്ക് അവരെ ഇഷ്ടം. അതുപോലെ മലയാളത്തില്‍ ഒരുപാട് യുവാക്കള്‍ വളരെ ആത്മവിശ്വാസത്തോടെ സിനിമ ചെയ്യാനായിട്ട് വരുന്നുണ്ട്,’ കമല്‍ ഹാസന്‍ പറയുന്നു.

Content Highlight: Kamal Haasan about Malayalam cinema