![?php echo $post['title']; ?>](https://assets.doolnews.com/w/900x473/2022/12/harsha-bhogle.jpg)
വെസ്റ്റ് ഇന്‍ഡീസും ഇന്ത്യയും തമ്മിലുള്ള അഞ്ച് ടി-20 മത്സരങ്ങള്‍ അടങ്ങുന്ന പരമ്പരയിലെ നാലാം മത്സരം നടക്കുകയാണ്. മത്സരത്തില്‍ ടോസ് നേടിയ ഇന്ത്യ ബൗള്‍ ചെയ്യാനാണ് തീരുമാനിച്ചത്. നിലവില്‍ ബാറ്റ് ചെയ്യുന്ന വിന്‍ഡീസ് 12 ഓവര്‍ പൂര്‍ത്തിയായപ്പോള്‍ രണ്ട് വിക്കറ്റ് നഷ്ടത്തില്‍ 151 റണ്‍സാണ് നേടിയത്.
ക്രീസിലുള്ളത് 14 പന്തില്‍ 21 റണ്‍സ് നേടിയ റോവ്മാന്‍ പവലും 31 പന്തില്‍ 62 റണ്‍സ് നേടിയ ക്യാപ്റ്റന്‍ ഷായ് ഹോപ്പുമാണ്. നേരിട്ട 28ാം പന്തില്‍ സിക്‌സര്‍ നേടിയാണ് ഹോപ്പ് അര്‍ധ സെഞ്ച്വറി പൂര്‍ത്തിയാക്കിയത്. ഫിഫ്റ്റി നേടിയതിന് പിന്നാലെ കമന്ററി ബോക്‌സില്‍ നിന്ന് ഇന്ത്യ ക്രിക്കറ്റ് കമന്റേറ്റര്‍ ഹര്‍ഷ ഭോഗ്ലെ ഷായ് ഹോപ്പിനെ പ്രശംസിച്ചിരുന്നു. ഇന്ത്യയില്‍ താരത്തിന്റെ പ്രകടനം സ്വപ്‌നതുല്യമാണെന്നും വിന്‍ഡീസിന്റെ റണ്‍ മെഷീനാണ് ഹോപ്പെന്നും ഭോഗ്ലെ പറഞ്ഞു.
Loving life in India is the skipper! 💥🏏 #INDvWI | #MenInMaroon https://t.co/PjqSMeeFQH
— Windies Cricket (@windiescricket) October 14, 2026
‘ഷായ് ഹോപ്പിന് ഓരോ ദിവസവും ഓരോ പുതിയ നാഴികക്കല്ല്! ഇന്ത്യയിലെ അദ്ദേഹത്തിന്റെ പ്രകടനം സ്വപ്നതുല്യമാണ്. അദ്ദേഹത്തെ എങ്ങനെ പിടിച്ചുകെട്ടണമെന്ന കാര്യത്തില്‍ ഞങ്ങള്‍ക്ക് ഉത്തരങ്ങളില്ല. ഏകദിന പരമ്പരയില്‍ അദ്ദേഹം അതിഗംഭീരമായി കളിച്ചു. ഇപ്പോഴിതാ ടി-20യിലും ആ മികവ് തുടരുകയാണ്. വെസ്റ്റ് ഇന്‍ഡീസ് ക്രിക്കറ്റിന്റെ റണ്‍ മെഷീനാണ് അദ്ദേഹം.
ലോക ക്രിക്കറ്റിലെ ഏറ്റവും സമ്പൂര്‍ണ ബാറ്റര്‍മാരില്‍ ഒരാളാണ് ഷായ് ഹോപ്പെന്നാണ് ഞാന്‍ കരുതുന്നത്. അദ്ദേഹത്തെക്കുറിച്ച് ഏറ്റവും കൗതുകകരമായ കാര്യം, റണ്‍സ് നേടാനുള്ള ആഗ്രഹത്തിന് ഒരിക്കലും കുറവുണ്ടാകുന്നില്ല എന്നതാണ്. ഓരോ ദിവസവും റണ്‍സ് നേടാനുള്ള അതേ വിശപ്പും ആവേശവും അദ്ദേഹത്തിനുണ്ട്. വെസ്റ്റ് ഇന്‍ഡീസ് ടീമിനായി അദ്ദേഹം കാഴ്ചവെച്ചുകൊണ്ടിരിക്കുന്ന പ്രകടനം എത്രത്തോളം അസാധാരണമാണെന്ന് പറയാന്‍ വാക്കുകളില്ല,’ ഭോഗ്ലെ പറഞ്ഞു.
ഇന്ത്യ പ്ലെയിങ് ഇലവന്‍
സഞ്ജു സാംസണ്‍ (വിക്കറ്റ് കീപ്പര്‍), അഭിഷേക് ശര്‍മ, ഇഷാന്‍ കിഷന്‍, ശ്രേയസ് അയ്യര്‍ (ക്യാപ്റ്റന്‍), തിലക് വര്‍മ, നമന്‍ ധിര്‍, നിതീഷ് കുമാര്‍ റെഡ്ഡി, അക്‌സര്‍ പട്ടേല്‍, അര്‍ഷ്ദീപ് സിങ്, പ്രിന്‍സ് യാദവ്, മയങ്ക് യാദവ്.
വെസ്റ്റ് ഇന്‍ഡീസ് പ്ലെയിങ് ഇലവന്‍
ഷായ് ഹോപ്പ് (ക്യാപ്റ്റന്‍, വിക്കറ്റ് കീപ്പര്‍), ജൂവല്‍ ആന്‍ഡ്രൂ (കമില്‍ പൂരാന് പകരം), ഷിംറോണ്‍ ഹെറ്റ്‌മെയര്‍, റോവ്മാന്‍ പവല്‍, ഷെര്‍ഫെയ്ന്‍ റൂഥര്‍ഫോര്‍ഡ്, റൊമാരിയോ ഷെപ്പേര്‍ഡ് (ക്വെന്റിന്‍ സാംപ്സണിന് പകരം), കീമോ പോള്‍, ഷമര്‍ സ്പ്രിംഗര്‍, റോസ്റ്റണ്‍ ചേസ്, ഗുടകേഷ് മോട്ടി, ഷമര്‍ ജോസഫ്.
Content Highlight: Harsha Bhogle Praises West Indies Captain Shai Hope
